Pachimirchi Kothimeera Karam : మ‌నం ప‌చ్చిమిర్చితో వివిధ ర‌కాల ప‌చ్చ‌ళ్ల‌ను త‌యారు చేస్తూ ఉంటాము. ప‌చ్చిమిర్చి వేసి చేసే ప‌చ్చ‌ళ్లు చాలా రుచిగా ఉంటాయి. అలాగే చాలా సుల‌భంగా వీటిని త‌యారు చేసుకోవ‌చ్చు. ఇలా ప‌చ్చిమిర్చితో చేసుకోద‌గిన రుచిక‌ర‌మైన వంట‌కాల్లో ప‌చ్చిమిర్చి కొత్తిమీర కారం కూడా ఒక‌టి. అల్పాహారాలతో, అన్నంతో తిన‌డానికి ఇది చాలా చ‌క్క‌గా ఉంటుంది. చాలా సుల‌భంగా ఈ కారాన్ని మ‌నం త‌యారు చేసుకోవ‌చ్చు. వంట చేయడానికి స‌మ‌యం త‌క్కువ‌గా ఉన్న‌ప్పుడు ఇంట్లో కూర‌గాయ‌లు ఏం లేన‌ప్పుడు ఇలా ప‌చ్చిమిర్చి కొత్తిమీర కారాన్ని త‌యారు చేసి తీసుకోవ‌చ్చు. ఎంతో రుచిగా ఉండే ప‌చ్చిమిర్చి కొత్తిమీర కారాన్ని ఎలా త‌యారు చేసుకోవాలో ఇప్పుడు తెలుసుకుందాం.
ప‌చ్చిమిర్చి కొత్తిమీర కారం త‌యారీకి కావ‌ల్సిన ప‌దార్థాలు..
ప‌చ్చిమిర్చి – 20, కొత్తిమీర – ఒక చిన్న క‌ట్ట, నూనె – ఒక టేబుల్ స్పూన్, మెంతులు – పావు టీ స్పూన్, ఆవాలు – ఒక టీ స్పూన్, జీల‌క‌ర్ర – అర టీ స్పూన్, వెల్లుల్లి రెబ్బ‌లు – 10, చింత‌పండు – ఉసిరికాయంత, ప‌సుపు – చిటికెడు, ఉప్పు – త‌గినంత.
తాళింపుకు కావ‌ల్సిన ప‌దార్థాలు..
నూనె – ఒక టేబుల్ స్పూన్, తాళింపు దినుసులు – ఒక టేబుల్ స్పూన్, ఎండుమిర్చి – 2, క‌రివేపాకు – ఒక రెమ్మ, ఇంగువ – కొద్దిగా.
ప‌చ్చిమిర్చి కొత్తిమీర కారం త‌యారీ విధానం..
ముందుగా ప‌చ్చిమిర్చిని ముక్క‌లుగా చేసుకోవాలి. తరువాత క‌ళాయిలో నూనె వేసి వేడి చేయాలి. తరువాత మెంతులు, ఆవాలు, జీల‌క‌ర్ర వేసి వేయించాలి. తరువాత ప‌చ్చిమిర్చి వేసి వేయించాలి. ఇవి కొద్దిగా వేగిన తరువాత వెల్లుల్లి రెబ్బ‌లు, చింత‌పండు, కొత్తిమీర వేసి వేయించాలి. ఇవ‌న్నీ వేగిన తరువాత ప‌సుపు వేసి క‌లిపి స్ట‌వ్ ఆఫ్ చేసుకోవాలి. ఇవ‌న్నీ చ‌ల్లారిన తరువాత వీటిని జార్ లోకి తీసుకోవాలి. తరువాత ఉప్పు వేసి మిక్సీ ప‌ట్టుకోవాలి. దీనిని మ‌రీ మెత్త‌గా కాకుండా కొద్దిగా బ‌ర‌క‌గా ఉండేలా మిక్సీ ప‌ట్టుకుని గిన్నెలోకి తీసుకోవాలి.
తరువాత తాళింపుకు క‌ళాయిలో నూనె వేసి వేడి చేయాలి. తరువాత తాళింపు దినుసులు వేసి వేయించాలి. తరువాత ఎండుమిర్చి, క‌రివేపాకు, ఇంగువ వేసి వేయించి స్ట‌వ్ ఆఫ్ చేసుకోవాలి. ఈ తాళింపును ముందుగా త‌యారు చేసుకున్న కారంలో వేసి క‌ల‌పాలి. ఇలా చేయ‌డం వల్ల ఎంతో రుచిగా ఉండే ప‌చ్చిమిర్చి కొత్తిమీర కారం త‌యార‌వుతుంది. దీనిని వేడివేడి అన్నం, నెయ్యితో తింటే చాలా రుచిగా ఉంటుంది. ఈ విధంగా త‌యారు చేసిన ప‌చ్చిమిర్చి కొత్తిమీర కారాన్ని అంద‌రూ ఎంతో ఇష్టంగా తింటారు.
