Ragi Pindi Puri : మ‌నం రాగిపిండితో ర‌క‌ర‌కాల వంట‌కాల‌ను తయారు చేసుకుని తింటూ ఉంటాము. రాగిపిండితో చేసే వంట‌కాలు రుచిగా ఉండ‌డంతో పాటు వీటిని తీసుకోవ‌డం వ‌ల్ల మ‌న ఆరోగ్యానికి కూడా మేలు క‌లుగుతుంది. మైదాపిండి, కార్న్ ఫ్లోర్ ల‌కు బ‌దులుగా రాగిపిండితో వంట‌కాలు తయారు చేసి తీసుకోవ‌డం వ‌ల్ల మ‌నం ఎన్నో ఆరోగ్య ప్ర‌యోజ‌నాల‌ను పొంద‌వ‌చ్చు. రాగిపిండితో చేసుకోద‌గిన రుచిక‌ర‌మైన వంట‌కాల్లో రాగిపిండి పూరీలు కూడా ఒక‌టి. రాగిపిండి పూరీలు మెత్త‌గా,రుచిగా ఉంటాయి. వీటిని తయారు చేసుకోవ‌డం కూడా చాలా సుల‌భం. రాగిపిండితో సుల‌భంగా పూరీల‌ను ఎలా తయారు చేసుకోవాలో.. ఇప్పుడు తెలుసుకుందాం.
రాగిపిండి పూరీల త‌యారీకి కావ‌ల్సిన ప‌దార్థాలు..
రాగిపిండి – ఒక క‌ప్పు, గోధుమ‌పిండి – ఒక క‌ప్పు, బొంబాయి ర‌వ్వ – 2 టీ స్పూన్స్, నూనె – డీప్ ఫ్రైకు స‌రిప‌డా.
రాగిపిండి పూరీల త‌యారీ విధానం..
ముందుగా గిన్నెలో రాగిపిండిని తీసుకోవాలి. త‌రువాత గోధుమ‌పిండి, ర‌వ్వ వేసి క‌ల‌పాలి. త‌రువాత కొద్ది కొద్దిగా నీళ్లు పోస్తూ పిండిని క‌లుపుకోవాలి. పిండిని చ‌క్క‌గా క‌లుపుకున్న త‌రువాత మూత‌పెట్టి 10 నిమిషాల పాటు ప‌క్క‌కు ఉంచాలి. త‌రువాత పిండిని తీసుకుంటూ ఉండలుగా చేసుకోవాలి. ఇప్పుడు ఒక్కో ఉండ‌ను తీసుకుంటూ నూనె రాసుకుంటూ పూరీలాగా వత్తుకోవాలి. ఇప్పుడు ఈ పూరీల‌ను వేడి వేడి నూనెలో వేసుకోవాలి. పూరీ వేయ‌గానే గంటెతో పూరీని నూనె లోప‌లికి వత్తుకోవాలి. ఇలా చేయ‌డం వ‌ల్ల పూరీ బాగా పొంగుతుంది. పూరీని రెండు వైపులా కాల్చుకుని ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే రాగిపిండి పూరీలు త‌యార‌వుతాయి. వీటిని చ‌ట్నీ, నాన్ వెజ్ క‌ర్రీలు, మ‌సాలా కూర‌ల‌తో తింటే చాలా రుచిగా ఉంటాయి. ఈ విధంగా తయారు చేసిన పూరీల‌ను అంద‌రూ ఎంతో ఇష్టంగా తింటారు.
