Teenmar Dosa : మ‌నం మ‌న అభిరుచికి త‌గినట్టు వివిధ రుచుల్లో దోశ‌ల‌ను తయారు చేసుకుని తింటూ ఉంటాము. అలాగే మ‌న‌కు హోట‌ల్స్, రోడ్ల ప‌క్క‌న బండ్ల మీద కూడా దోశ‌లు ల‌భిస్తూ ఉంటాయి. మ‌న‌కు బ‌య‌ట ఎక్కువ‌గా ల‌భించే వెరైటీ దోశ‌ల‌ల్లో తీన్మార్ దోశ కూడా ఒక‌టి. ఈ దోశ చాలా క‌ల‌ర్ ఫుల్ గా చాలా రుచిగా ఉంటుంది. ఈ దోశ‌ను ఒక‌టి తింటే చాలు మ‌న క‌డుపు నిండి పోతుంద‌ని చెప్ప‌వ‌చ్చు. చాలా మంది దీనిని రుచి చూసే ఉంటారు. ఈ తీన్మార్ దోశ‌ను మ‌నం ఇంట్లో కూడా చాలా సుల‌భంగా తయారు చేసుకోవ‌చ్చు. దీనిని తయారు చేయ‌డం కూడా చాలా సుల‌భం. ఒక్కసారి ఈ తీన్మార్ దోశ‌ను తింటే చాలు మ‌ళ్లీ మ‌ళ్లీ ఇదే కావాలంటారు. ఎంతో రుచిగా ఉండే ఈ తీన్మార్ దోశ‌ను ఎలా తయారు చేసుకోవాలి… త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
తీన్మార్ దోశ త‌యారీకి కావ‌ల్సిన ప‌దార్థాలు..
చిన్న‌గా త‌రిగిన ఉల్లిపాయ – 1, క్యాబేజి తురుము – ఒక క‌ప్పు, క్యారెట్ తురుము – ఒక క‌ప్పు, ఉడికించి స్వీట్ కార్న్ – ఒక క‌ప్పు, ప‌నీర్ తురుము – అర క‌ప్పు, బ‌ట‌ర్ – ఒక టీ స్పూన్, బీట్ రూట్ తురుము – కొద్దిగా, త‌రిగిన కొత్తిమీర – కొద్దిగా.
దోశ కారం త‌యారీకి కావ‌ల్సిన ప‌దార్థాలు..
నాన‌బెట్టిన ఎండుమిర్చి – 10, ఉల్లిపాయ – 1, త‌రిగిన ట‌మాటాలు – 3, వెల్లుల్లి రెబ్బ‌లు – 2, ఉప్పు – త‌గినంత, బెల్లం – ఒక చిన్న ముక్క, నూనె – 2 టీ స్పూన్స్, ఆవాలు – పావు టీ స్పూన్, జీల‌క‌ర్ర – పావు టీ స్పూన్, క‌రివేపాకు – ఒక రెమ్మ.
ఆలూ మ‌సాలా త‌యారీకి కావ‌ల్సిన ప‌దార్థాలు..
నూనె – 2 టీ స్పూన్, ఆవాలు – అర టీ స్పూన్, జీల‌క‌ర్ర – అర టీ స్పూన్, క‌రివేపాకు – ఒక రెమ్మ, స‌న్న‌గా పొడ‌వుగా త‌రిగిన ఉల్లిపాయ‌లు – 2, చిన్న‌గా త‌రిగిన ప‌చ్చిమిర్చి – 2, ఉప్పు – త‌గినంత, ప‌సుపు – పావు టీ స్పూన్, ఉడికించిన బంగాళాదుంప‌లు – 3, త‌రిగిన కొత్తిమీర – కొద్దిగా.
తీన్మార్ దోశ త‌యారీ విధానం..
ముందుగా దోశ కారం తయారు చేసుకోవ‌డానికి ఒక జార్ లో నాన‌బెట్టిన ఎండుమిర్చి, ఉల్లిపాయ ముక్క‌లు, ట‌మాటాలు, వెల్లుల్లి రెబ్బ‌లు, ఉప్పు, బెల్లం వేసి మెత్త‌గా మిక్సీ ప‌ట్టుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక ఆవాలు, జీల‌క‌ర్ర, క‌రివేపాకు వేసి వేయించాలి. త‌రువాత మిక్సీ ప‌ట్టుకున్న కారం వేసి క‌ల‌పాలి. దీనిపై మూత పెట్టి మ‌ధ్య మ‌ధ్య‌లో కలుపుతూ నూనె పైకి తేలే వ‌ర‌కు ఉడికించి స్ట‌వ్ ఆఫ్ చేసుకోవాలి. త‌రువాత ఆలూ మ‌సాలా తయారు చేసుకోవ‌డానికి ఒక క‌ళాయిలో నూనె వేసి వేడి చేయాలి. త‌రువాత ఆవాలు, జీల‌క‌ర్ర, క‌రివేపాకు వేసి వేయించాలి. త‌రువాత ఉల్లిపాయ ముక్క‌లు, ప‌చ్చిమిర్చి వేసి వేయించాలి. ఉల్లిపాయ ముక్క‌లు మెత్త‌బ‌డిన త‌రువాత ప‌సుపు, ఉప్పు వేసి క‌ల‌పాలి.
త‌రువాత బంగాళాదుంప‌ల‌ను మెత్త‌గా చేసి వేసుకోవాలి. దీనిని అంతా క‌లిసేలా క‌లుపుకుని 3 నిమిషాల పాటు వేయించి కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇప్పుడు స్ట‌వ్ మీద పెనాని ఉంచి వేడి చేయాలి. త‌రువాత నూనె వేసి టిష్యూ పేప‌ర్ తో తుడుచుకోవాలి. ఇప్పుడు దోశ‌పిండిని తీసుకుని దోశ‌లాగా వేసుకోవాలి. దోశ కొద్దిగా కాలిన త‌రువాత కొద్దిగా ఉల్లిపాయ ముక్క‌లు, క్యాబేజి తురుము, క్యారెట్ తురుము, దోశ కారం, ఆలూ మ‌సాలా, స్వీట్ కార్న్, ప‌నీర్ తురుము వేసి స్మాష్ చేసుకోవాలి. త‌రువాత దీనిని దోశ అంతా స్ప్రెడ్ చేసుకోవాలి. త‌రువాత బ‌ట‌ర్, బీట్ రూట్ తురుము, చీస్ వేసుకోవాలి. దోశ చ‌క్క‌గా కాలిన త‌రువాత మ‌డ‌త పెట్టి ప్లేట్ లోకి తీసుకోవాలి. లేదంటే రెండు ప‌క్క‌ల ఉండు అంచుల‌ను క‌ట్ చేసుకుని దోశ‌ను మూడు ముక్క‌లుగా క‌ట్ చేసుకుని రోల్ చేసి ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే తీన్మార్ దోశ త‌యార‌వుతుంది. దీనిని అంద‌రూ ఎంతో ఇష్టంగా తింటారు. ఎప్పుడూ ఒకేర‌కం దోశ‌లు కాకుండా ఇలా వెరైటీగా మ‌రింత రుచిగా కూడా ఈ దోశ‌ల‌ను తయారు చేసుకుని తిన‌వ‌చ్చు.
