నేను చాలా చిన్నప్పటినుంచే ఒక సినిమా చూస్తే ఆ చిత్ర దర్శకుడెవరో అని తెల్సుకునే వాడ్ని. అందరూ హీరో కోసం థియేటర్ కెళితే, నేను మాత్రం డైరెక్టర్ పేరు చూసి వెళ్ళేవాడిని. ఇప్పటికి అదే చేస్తున్నా. నాకు దర్శకుల మీద అంతగా ప్రేమ పెరగడానికి కారణం తిరుపతిస్వామి. పేరు చాలా మందికి తెలియకపోవచ్చు. నేను మాత్రం మర్చిపోలేని దర్శకుడు.
ఎనీ సెంటర్, సింగిల్ హ్యాండ్, గణేష్ వినేవుంటారు. నాగార్జున ఆజాద్ మూవీ చూసేవుంటారు. రెండూ బ్లాక్ బస్టర్ సినిమాలు. ఆజాద్ కు నాలుగు, గణేష్ కు ఐదు నంది అవార్డులు వచ్చాయి.
నాకు పదేళ్లు కూడా లేని వయసులోనే సినిమా ప్రభావం ఎంతలా సమాజం పట్ల ఉంటుందో తెలియచెప్పిన దర్శకుడు. నాకు కూడా సామాజిక స్పృహ ఉన్న సినిమాలు తీయాలనే కోరిక కల‌గజేశాడు. తిరుపతిస్వామి తరువాతి సినిమా ఎప్పుడు వస్తుందో అని వేచి చూసా అంత చిన్న వయసులోనే.
చాలా కాలానికి ఏదో టీవీ ఇంటర్వ్యూలో తిరుపతి స్వామి అకాల మరణం గురించి విన్నా. చాలా బాధపడ్డా. రెండు సినిమాలు బ్లాక్ బస్టర్ అయ్యాక మూడో సినిమా( తమిళ్ విజయ్ కాంత్ తో) రిలీజ్ కి ఒక రోజు ముందు కారు ప్రమాదంలో చనిపోయాడు.
