యువ హీరో సిద్దు జొన్నలగడ్డ డీజే టిల్లు, టిల్లు స్క్వేర్ చిత్రాలతో వరుసగా సూపర్ హిట్స్ అందుకొని టాలీవుడ్ లో ప్రత్యేక స్థానాన్ని సంపాదించాడు. ముఖ్యంగా యువతలో సిద్దు జొన్నలగడ్డ క్రేజ్ అమాంతం పెరిగిపోయింది. ఈ నేపథ్యంలో బొమ్మరిల్లు భాస్కర్ దర్శకత్వంలో తెరకెక్కిన సిద్దు తాజా చిత్రం జాక్ ఏప్రిల్ 10న ప్రేక్షకుల ముందుకు వచ్చింది. స్పై యాక్షన్ కామెడీగా రూపొందిన జాక్ చిత్రంలో సిద్దు జొన్నలగడ్డ పాత్ర ఆసక్తికరంగానే ఉన్నా, కథ, స్క్రీన్‌ప్లే విషయాల్లో మాత్రం పూర్తిగా నిరాశపరిచింది. ఫస్ట్ హాఫ్ అంతా గందరగోళంగా ఉండటం వల్ల ప్రేక్షకులకు ఎంగేజింగ్ అనిపించలేదు. స్పై సీన్లు, విలన్ సన్నివేశాలు ప్రేక్షకులను బోర్ చేశాయి. స్క్రీన్ ప్లే లో స్పష్టత లేకపోవడంతో సినిమా గ్రిప్ కోల్పోయింది.
ఈ చిత్రంలో బేబీ హీరోయిన్ వైష్ణవి చైతన్య సిద్దుకు జోడీగా నటించింది. కానీ వారిద్దరి మధ్య రొమాంటిక్ సన్నివేశాలు కూడా ప్రేక్షకులను అలరించలేకపోయాయి. ప్రొడక్షన్ వ్యాల్యూస్ కూడా చాలా నిరాశపరిచాయి. సినిమాలో కామెడీ, యాక్షన్ రెండూ వర్కౌట్ కాలేదనే విమర్శలు ఎక్కువగా వినిపిస్తున్నాయి. సిద్దు జొన్నలగడ్డ తన స్టైల్ కామెడీతో ప్రయత్నించినా, స్క్రీన్‌ప్లే సరిగ్గా లేకపోవడం వల్ల అతడి ప్రయత్నం ఫలించలేదు. కొన్ని వన్ లైనర్స్ మినహా సినిమా అంతా ఫ్లాట్ గా సాగిపోయింది. బొమ్మరిల్లు, పరుగు లాంటి చిత్రాలతో మంచి గుర్తింపు తెచ్చుకున్న బొమ్మరిల్లు భాస్కర్ మరోసారి తన దర్శకత్వంతో నిరాశపరిచాడు. కామెడీ, యాక్షన్, దేశభక్తి, మదర్ సెంటిమెంట్ ఇలా ప్రతీ అంశాన్ని ప్రయత్నించినా, ఏదీ ప్రేక్షకుల మనసుకు హత్తుకోలేదు. ఈ చిత్రం ద్వారా తిరిగి తన కెరీర్ ను నిలబెట్టుకునే అవకాశం వృథా చేశాడనే కామెంట్లు వినిపిస్తున్నాయి.
అచ్చు రాజమణి అందించిన సంగీతం, బ్యాక్‌గ్రౌండ్ స్కోర్ ఏమాత్రం ఆకట్టుకోలేదు. ఈ అంశం కూడా సినిమాకు పెద్ద మైనస్ గా నిలిచింది. పాటలు, బీజియం రెండూ ప్రేక్షకులను నిరాశపరిచాయి. ఈ సినిమాకు ఏదైనా పాజిటివ్ ఉందంటే అది కేవలం సిద్దు పండించిన కొన్ని కామెడీ సీన్లే అని ప్రేక్షకుల అభిప్రాయం. రెండు భారీ విజయాల తర్వాత జాక్ తో సిద్దు జొన్నలగడ్డ కెరీర్‌లో స్పీడ్ బ్రేకర్ పడిందని చెబుతున్నారు. మొత్తంగా జాక్ మూవీ ప్రేక్షకుల అంచనాలను అందుకోలేకపోయింది. ఈ సినిమా బాక్సాఫీస్ వద్ద ఎలాంటి ఫలితాలను నమోదు చేస్తుందో చూడాలి.
