పూరీలు అంటే చాలా మందికి ఇష్ట‌మే. పూరీలను ఉద‌యం చాలా మంది బ్రేక్‌ఫాస్ట్ రూపంలో తింటుంటారు. పూరీల‌లోకి ఆలు క‌ర్రీ, మిక్స్‌డ్ వెజిట‌బుల్ క‌ర్రీతోపాటు చికెన్‌, మ‌ట‌న్ వంటివి కూడా ఎంతో రుచిగా ఉంటాయి. కనుక పూరీలను చాలా మంది ఇష్టంగా తింటుంటారు. అయితే కొంద‌రు ఎంత చేసినా పూరీలు మెత్తగా రావు. పొంగ‌వు. కానీ కింద తెలిపిన విధంగా చేస్తే.. పూరీలు చాలా మెత్తగా వస్తాయి. అలాగే పొంగుతాయి. ఎక్కువ సేపు ఉన్నా పూరీలు మెత్త‌గానే ఉంటాయి. ఎంతో రుచిగా ఉంటాయి. ఇక పూరీలు మెత్తగా పొంగుతూ రావాలంటే ఏం చేయాలో ఇప్పుడు తెలుసుకుందాం.
పూరీలను త‌యారు చేసేందుకు గాను ముందుగా మ‌న‌కు ప‌దార్థాలు కావాలి. ఇందుకు గాను గోధుమ పిండిని 2 క‌ప్పులు, బొంబాయి ర‌వ్వ‌ను పావు క‌ప్పు మోతాదులో తీసుకోవాలి. అలాగే పాలు అర క‌ప్పు, ఉప్పు 1 టీస్పూన్‌, నూనె వేయించేందుకు స‌రిప‌డా తీసుకోవాలి. అలాగే నీళ్ల‌ను కూడా తగినన్ని తీసుకోవాలి. ఇక ఇప్పుడు పూరీల పిండిని క‌ల‌పాలి. ముందుగా ఒక గిన్నెలో గోధుమ పిండిని, బొంబాయి ర‌వ్వ‌ను, ఉప్పును వేసి బాగా క‌లుపుకోవాలి. త‌రువాత పాల‌ను పోసి క‌లిపిన త‌రువాత తగినన్ని నీళ్ల‌ను పోసి మరీ మెత్తగా కాకుండా క‌లుపుకోవాలి. ఇప్పుడు గిన్నెపై మూత పెట్టి 10 నిమిషాల పాటు క‌దిలించ‌కుండా ఉంచాలి. 10 నిమిషాల త‌రువాత పిండిని మ‌రోసారి బాగా క‌లుపుకుని కావ‌ల్సిన ప‌రిమాణంలో ముద్ద‌లుగా చేసుకుని పొడి పిండిని వేసుకుంటూ మరీ ప‌లుచ‌గా కాకుండా కొద్దిగా మందంగా ఉండేలా పూరీలను వ‌త్తుకోవాలి.
ఇలా అన్ని పూరీలను చేసుకున్న త‌రువాత క‌ళాయిలో నూనె పోసి నూనె వేడ‌య్యాక మంట‌ను మ‌ధ్య‌స్థంగా చేసి ఒక్కో పూరీని వేసుకుంటూ గ‌రిటెతో పూరీని నూనె లోప‌లికి వెళ్లేలా వ‌త్తుకోవాలి. ఇలా చేయ‌డం వ‌ల్ల పూరీలు బాగా పొంగుతాయి. ఇప్పుడు పూరీని మ‌రో వైపున‌కు తిర‌గేసి ఎర్ర‌గా అయ్యే వ‌ర‌కు కాల్చుకుని ఒక గిన్నెలోకి లేదా హాట్ బాక్స్ లోకి తీసుకొని మూత పెట్టుకోవాలి. ఇలా చేయ‌డం వ‌ల్ల పూరీలు మెత్తగా ఉంటాయి. పూరీ పిండిని క‌లిపేట‌ప్పుడు లేదా పూరీలను వ‌త్తేట‌ప్పుడు నూనెను వాడ‌రాదు. నూనెను ఉప‌యోగించ‌డం వ‌ల్ల పూరీలను కాల్చేట‌ప్పుడు అవి ఎక్కువ‌గా నూనెను పీల్చుకుంటాయి. దీంతో పూరీలు స‌రిగ్గా రావు. కనుక పిండిని క‌లిపే స‌మ‌యంలో లేదా పూరీలను వ‌త్తే స‌మ‌యంలో నూనెను ఉప‌యోగించ‌రాదు. దీంతో పూరీలు మెత్తగా వస్తాయి. పొంగుతాయి.
అలాగే పూరీలను ఎక్కువ సేపు నూనెలో ఉంచ‌డం వ‌ల్ల అవి గ‌ట్టిగా త‌యార‌వుతాయి. కనుక పూరీలు వేగీ వేగగానే వాటిని వెంట‌నే నూనె నుంచి తీసేయాలి. ఎక్కువ సేపు ఉంచ‌రాదు. దీని వ‌ల్ల పూరీలు మెత్తగా పొంగుతూ వస్తాయి. ఇలా ప‌లు చిట్కాల‌ను పాటించడం వ‌ల్ల ఎంతో రుచిక‌ర‌మైన మెత్త‌నైన పూరీలను ఎంచ‌క్కా తిన‌వ‌చ్చు.
