జిమ్ కి వెళ్ళి వర్కవుట్లతో నీరసపడ్డారా? మీరు మరోమారు రీఛార్జ్ అవ్వాలంటే తక్షణమే శక్తినిచ్చే ప్రొటీన్లు, ఖనిజాలు, కాల్షియం మొదలైనవి కావాలి. వర్కవుట్ల తర్వాత చాక్లెట్ పాలు తాగితే ఈ పోషకాలు శరీరానికి సత్వరమే అందుతాయంటున్నారు పోషకాహార నిపుణులు. ఒక్క గ్లాసెడు చాక్లెట్ పాలు తాగితే అందులో శరీరానికి వెంటనే కావలసిన కార్బో హైడ్రేట్లు, ప్రొటీన్లు, కాల్షియం వుంటాయట.
సాధారణంగా లభించే సోయా ప్రొటీన్ల కంటే కూడా పాల ఆధారిత ప్రొటీన్లు శరీరానికి వెంటనే అందుతాయట. ఒక కప్పు చాక్లెట్ మిల్క్ లో 8 నుండి 11 గ్రాముల మధ్య ప్రొటీన్లు లభిస్తాయి. ఈ పాలు కండలు పెంచాలనుకునే వారికి ప్రత్యేక లాభాన్ని కలిగిస్తాయి. చాక్లెట్ మిల్క్ లో వాడే ఆవు పాలలో 80 శాతం కేసిన్ ప్రొటీన్లు, 20 శాతం వీ ప్రొటీన్ వుండి ఇవి కండరాల నిర్మాణానికి సహకరిస్తాయి.
దీనితోపాటు ప్రతిరోజూ కావలసిన కాల్షియం కూడా శరీరానికి అందుతుంది. కనుక, జిమ్ కి వెళ్ళే వారు రోజూ ఒక గ్లాసెడు చాక్లెట్ పాలు తాగితే వారి లక్ష్యం నెరవేరినట్లే.
