Allam Murabba : అల్లం ముర‌బ్బ.. ఇది మ‌నంద‌రికీ తెలిసిందే. దీనినే జింజ‌ర్ క్యాండీ అని కూడా పిలుస్తారు. దీనిని చాలా మంది ఇష్టంగా తింటుంటారు. అల్లం ముర‌బ్బ రుచిగా ఉండ‌డ‌మే కాకుండా దీనిని తిన‌డం వ‌ల్ల మ‌న శ‌రీరానికి ఎంతో మేలు క‌లుగుతుంది. ప్ర‌తిరోజూ ఒక అల్లం ముర‌బ్బ ముక్క‌ను తిన‌డం వ‌ల్ల జీర్ణ శ‌క్తి మెరుగుప‌డుతుంది. షుగ‌ర్ వ్యాధి నియంత్ర‌ణ‌లోకి వ‌స్తుంది. ర‌క్త ప్ర‌స‌ర‌ణ చురుకుగా సాగుతుంది.
శ‌రీరంలో పేరుకుపోయిన కొవ్వు క‌రిగి గుండె ఆరోగ్యం మెరుగుప‌డుతుంది. నోటి దుర్వాస‌న త‌గ్గుతుంది. వాంతులు, త‌ల తిర‌గ‌డం వంటి వాటి నుండి కూడా ఉప‌శ‌మ‌నం ల‌భిస్తుంది. త‌ర‌చూ ఇన్ ఫెక్ష‌న్ ల బారిన ప‌డే వారు రోజూ అల్లం ముర‌బ్బ ముక్క‌ను తిన‌డం వ‌ల్ల రోగ నిరోధ‌క శ‌క్తి పెరిగి ఇన్ ఫెక్ష‌న్ ల బారిన ప‌డ‌కుండా ఉంటారు. మైగ్రేన్ త‌ల‌నొప్పి, జ‌లుబు, ద‌గ్గు, గొంతునొప్పి వంటి వాటిని త‌గ్గించ‌డంలోనూ అల్లం ముర‌బ్బ ఉప‌యోగ‌ప‌డుతుంది. అల్లం ముర‌బ్బ మ‌న‌కు బ‌య‌ట ఎక్కువ‌గా దొరుకుతుంది. కానీ దీనిని మ‌నం ఇంట్లోనే చాలా సులువుగా త‌యారు చేసుకోవ‌చ్చు. అల్లం ముర‌బ్బ‌ను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
అల్లం ముర‌బ్బ త‌యారీకి కావ‌ల్సిన ప‌దార్థాలు..
అల్లం ముక్క‌లు – 100 గ్రా., బెల్లం తురుము – 400 గ్రా., నెయ్యి – కొద్దిగా, నీళ్లు – పావు క‌ప్పు, ఉప్పు – చిటికెడు.
అల్లం ముర‌బ్బ త‌యారీ విధానం..
ముందుగా అల్లం ముక్క‌లను జార్ లో వేసి నీళ్లు వేయ‌కుండా మెత్త‌గా చేసుకోవాలి. ఒక ప్లేట్ కు కానీ పీట మీద కానీ నెయ్యిని రాసి ప‌క్క‌న ఉంచుకోవాలి. ఇప్పుడు గిన్నెలో లేదా క‌ళాయిలో బెల్లం తురుమును, నీళ్ల‌ను పోసి బెల్లం క‌రిగే వ‌ర‌కు తిప్పుతూ ఉండాలి. ఇలా కరిగించిన త‌రువాత పాకం వ‌చ్చే వ‌ర‌కు మ‌రిగించాలి. ఒక గిన్నెలో నీళ్ల‌ను తీసుకుని అందులో మ‌రిగించిన బెల్లం మిశ్ర‌మాన్ని వేసి ముద్ద‌గా చేయాలి. ఈ మిశ్ర‌మం ముద్ద‌గా చేయడానికి వ‌స్తే పాకం వ‌చ్చింద‌ని భావించాలి. బెల్లం మిశ్ర‌మం ముద్ద‌గా చేయడానికి రాక‌పోతే పాకం వ‌చ్చే వ‌ర‌కు మ‌రిగించాలి. పాకం వ‌చ్చిన త‌రువాత మెత్త‌గా చేసుకున్న అల్లాన్ని వేసి క‌లుపుకోవాలి.
ఇప్పుడు మంట‌ను చిన్న‌గా చేసి 5 నుండి 6 నిమిషాల పాటు క‌లుపుతూ మ‌రిగించాలి. ఇందులోనే ఉప్పును వేసి క‌లుపుకోవాలి. 5 లేదా 6 నిమిషాల త‌రువాత మ‌రోసారి పాకాన్ని స‌రిచూసుకోవాలి. ముందు చేసిన విధంగానే గిన్నెలో నీళ్ల‌ను తీసుకుని అందులో బెల్లం మిశ్ర‌మాన్ని వేసి ముద్ద‌లా చేసి చూడాలి. ముద్ద‌గా చేయడానికి వ‌స్తే వెంట‌నే స్ట‌వ్ ఆఫ్ చేసుకోవాలి. బెల్లం మిశ్ర‌మం ముద్ద‌గా చేయడానికి రాక‌పోతే మ‌రికొద్ది సేపు మ‌రిగించి స్ట‌వ్ ఆఫ్ చేసుకోవాలి.
స్ట‌వ్ ఆఫ్ చేసిన వెంట‌నే ఈ మిశ్ర‌మాన్ని నెయ్యిని రాసి ఉంచిన ప్లేట్ లేదా పీట మీద వేసి మ‌రీ ప‌లుచ‌గా కాకుండా కొద్దిగా మందంగా ఉండేలా వెడ‌ల్పుగా చేసుకోవాలి. ఇలా వెడ‌ల్పుగా చేసుకున్న మిశ్ర‌మాన్ని కొద్దిగా చ‌ల్ల‌గా అయ్యే వ‌ర‌కు ఉంచి క‌త్తితో కావ‌ల్సిన ప‌రిమాణంలో గాట్లు పెట్టి బెల్లం మిశ్ర‌మం పూర్తిగా చ‌ల్ల‌గా అయ్యే వ‌ర‌కు ఉంచి గాట్లు పెట్టిన ఆకారంలో ముక్క‌లుగా చేసుకోవాలి. ఇలా చేయడం వ‌ల్ల రుచిగా ఉండే, ఆరోగ్యానికి మేలు చేసే అల్లం ముర‌బ్బ త‌యార‌వుతుంది. అల్లం ముర‌బ్బ త‌యారీలో బెల్లానికి బ‌దులుగా చ‌క్కెర‌ను కూడా ఉప‌యోగించ‌వచ్చు. రోజూ ప‌ర‌గ‌డుపున ఒక ముక్క అల్లం ముర‌బ్బ‌ను తిన‌డం వ‌ల్ల మ‌నం ఎన్నో ర‌కాల ఆరోగ్య‌క‌ర‌మైన ప్ర‌యోజ‌నాల‌ను పొంద‌వ‌చ్చు. త‌ర‌చూ రోగాల బారిన ప‌డ‌కుండా ఉంటారు.
