ఇప్పుడంటే నిజానికి చాలా మంది పాత అలవాటును మరిచిపోయారు కానీ.. నిజానికి చాలా మంది భోజనం చేశాక సోంపు గింజలను తినేవారు. దీంతో జీర్ణ సమస్యలు వచ్చేవి కావు. అయితే సోంపు గింజలతో కేవలం జీర్ణ సమస్యలే కాదు, ఇతర అనారోగ్యాలను కూడా దూరం చేసుకోవచ్చు. నిత్యం భోజనం చేశాక సోంపు గింజలను తినడం అలవాటుగా చేసుకుంటే దాంతో పలు ప్రయోజనాలు కలుగుతాయి. అవేమిటంటే..
సోంపు గింజల్లో మన శరీరానికి కావల్సిన పోషకాలు పుష్కలంగా ఉంటాయి. ఫైబర్, విటమిన్‌ సి, కాల్షియం, ఐరన్‌, మెగ్నిషియం, పొటాషియం, మాంగనీస్‌ వంటి పోషకాలు లభిస్తాయి. వీటితో శరీరానికి పోషణ లభిస్తుంది. సోంపు ద్వారా మనకు లభించే విటమిన్‌ సితో శరీర రోగ రోగ నిరోధక శక్తి పెరుగుతుంది. కణజాలానికి శరీరం మరమ్మత్తులు చేసుకుంటుంది. కణాలు నాశనం కూడా ఉంటాయి. సోంపు గింజల్లో ఉండే మాంగనీస్‌ శరీర మెటబాలిజంను పెంచుతుంది. కణజాలాన్ని రక్షిస్తుంది. ఎముకలను వృద్ధి చేస్తుంది. షుగర్‌ లెవల్స్‌ కంట్రోల్‌ అవుతాయి. గాయాలు త్వరగా మానుతాయి.
సోంపు గింజల్లో పవర్‌ఫుల్‌ యాంటీ ఆక్సిడెంట్లు, శక్తివంతమైన మొక్కల ఆధారిత సమ్మేళనాలు ఉంటాయి. 87 రకాలకు పైగా ముఖ్యమైన సమ్మేళనాలు ఈ గింజల్లో ఉంటాయి. రోజ్‌మరీనిక్‌ యాసిడ్‌, క్లోరోజెనిక్‌ యాసిడ్‌, క్వర్సెటిన్‌, అపిజెనిన్‌ అనబడే సమ్మేళనాలు ఉంటాయి. ఇవి యాంటీ ఇన్‌ఫ్లామేటరీ గుణాలను కలిగి ఉంటాయి. అందువల్ల గుండె జబ్బులు, స్థూలకాయం, క్యాన్సర్‌, నాడీ సంబంధ వ్యాధులు, టైప్‌ 2 డయాబెటిస్‌ రాకుండా ఉంటాయి. సోంపు గింజల్లో యాంటీ క్యాన్సర్‌, యాంటీ మైక్రోబియల్‌, యాంటీ వైరల్‌ గుణాలు కూడా ఉంటాయని సైంటిస్టుల పరిశోధనల్లో వెల్లడైంది. సోంపు గింజల్లో ఉండే లిమోనీన్‌ అనబడే సమ్మేళనం హానికారక ఫ్రీ ర్యాడికల్స్‌ నుంచి రక్షణ అందిస్తుంది.
ఆకలిని నియంత్రించే గుణాలు సోంపు గింజల్లో ఉంటాయి. ఆకలి ఎక్కువగా అవుతుందని అనుకునే వారు సోంపు గింజలను తిని చూస్తే ఫలితం ఉంటుంది. లంచ్‌ చేసేముందు కొందరికి సైంటిస్టులు సోంపు గింజలతో చేసిన టీ ఇచ్చారు. దీంతో వారు తక్కువ ఆహారాన్ని తీసుకున్నట్లు గుర్తించారు. అందువల్ల సోంపు గింజలతో అధిక బరువు కూడా తగ్గవచ్చు.
సోంపు గింజలను తినడం వల్ల గుండె జబ్బులు రాకుండా ఉంటాయి. వీటిలో ఉండే ఫైబర్ గుండె జబ్బులు వచ్చే అవకాశాలను చాలా వరకు తగ్గిస్తుందని సైంటిస్టులు చేపట్టిన పరిశోధనలో వెల్లడైంది. అలాగే సోంపు గింజల్లో ఉండే మెగ్నిషియం, పొటాషియం, కాల్షియం వంటి పోషకాలు గుండె ఆరోగ్యాన్ని పదిలంగా ఉంచుతాయి.
సోంపు గింజల్లో క్యాన్సర్‌ కు వ్యతిరేకంగా పోరాడే గుణాలు ఉన్నాయని సైంటిస్టుల పరిశోధనల్లో వెల్లడైంది. వీటిలో ఉండే ఎనిథోల్‌ అనబడే సమ్మేళనం క్యాన్సర్‌ కణాలకు వ్యతిరేకంగా పోరాడుతుందని గుర్తించారు.
సోంపు గింజల్లో గలాక్టోజెనిక్‌ గుణాలు ఉన్నాయి. అంటే పాలిచ్చే తల్లులు వీటిని తీసుకుంటే పాలు సమృద్ధిగా వస్తాయి. అందువల్ల పాలిచ్చే తల్లులు వీటిని నిత్యం ఆహారంలో భాగం చేసుకోవచ్చు. అయితే అందుకు డాక్టర్‌ను సంప్రదించి నిర్ణయం తీసుకోవాల్సి ఉంటుంది.
భోజనం చేసిన తరువాత సోంపు గింజలను తినడం వల్ల జీర్ణ ప్రక్రియ సాఫీగా జరుగుతుంది. తిన్న ఆహారం సరిగ్గా జీర్ణమవుతుంది. మలబద్దకం సమస్య ఏర్పడదు. గ్యాస్‌, అసిడిటీ రాకుండా ఉంటాయి.
