Aloo Paneer Curry : మ‌నం బంగాళాదుంప‌ల‌తో ర‌క‌ర‌కాల వంట‌కాల‌ను త‌యారు చేస్తూ ఉంటాము. బంగాళాదుంప‌తో చేసే వంట‌కాలు రుచిగా ఉండ‌డంతో పాటు చాలా సుల‌భంగా వీటిని త‌యారు చేసుకోవ‌చ్చు. బంగాళాదుంప‌ల‌తో చేసుకోద‌గిన రుచిక‌ర‌మైన వంట‌కాల్లో ఆలూప‌నీర్ క‌ర్రీ కూడా ఒక‌టి. ఆలూ, పనీర్ క‌లిపి చేసే ఈ క‌ర్రీ చాలా రుచిగా ఉంటుంది. దీనిని త‌యారు చేయ‌డం కూడా చాలా సుల‌భం. ఇంట్లో అంద‌రూ ఈ క‌ర్రీని ఇష్టంగా తింటార‌ని చెప్ప‌వ‌చ్చు. రుచితో పాటు ఆరోగ్యానికి మేలు చేసే ఈ ఆలూ పనీర్ క‌ర్రీని ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ఆలూ పనీర్ క‌ర్రీ త‌యారీకి కావ‌ల్సిన ప‌దార్థాలు..
ట‌మాటాలు – 3, ప‌చ్చిమిర్చి – 3, వెలుల్లి రెబ్బ‌లు – 8, అల్లం – ఒక ఇంచు ముక్క, నూనె – 3 టేబుల్ స్పూన్స్, బంగాళాదుంప ముక్కలు – ఒక క‌ప్పు, జీల‌క‌ర్ర – అర‌టీ స్పూన్, ఎండుమిర్చి – 2, స‌న్న‌గా త‌రిగిన ఉల్లిపాయ – పెద్ద‌ది ఒక‌టి, ప‌సుపు – అర టీ స్పూన్, ఉప్పు – త‌గినంత, కారం – ఒక టీ స్పూన్, ధ‌నియాల పొడి – 2 టీ స్పూన్స్, జీల‌క‌ర్ర పొడి – పావు టీ స్పూన్, నీళ్లు – ఒక గ్లాస్, పనీర్ – 200 గ్రా., క‌సూరి మెంతి – ఒక టీ స్పూన్, గ‌రం మ‌సాలా – అర టీ స్పూన్.
ఆలూ పనీర్ క‌ర్రీ త‌యారీ విధానం..
ముందుగా జార్ లో ట‌మాట ముక్కలు, అల్లం, వెల్లుల్లి రెబ్బ‌లు, ప‌చ్చిమిర్చి వేసి త‌గిన‌న్ని నీళ్లు పోసి మెత్త‌గా మిక్సీ ప‌ట్టుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక బంగాళాదుంప ముక్క‌ల‌ను వేసి ఎర్ర‌గా అయ్యే వ‌ర‌కు వేయించి ప్లేట్ లోకి తీసుకోవాలి. త‌రువాత అదే నూనెలో జీల‌క‌ర్ర, ఎండుమిర్చి వేసి వేయించాలి. ఇవి వేగిన త‌రువాత ఉల్లిపాయ ముక్కలు వేసి వేయించాలి. వీటిని ఎర్ర‌గా అయ్యే వ‌ర‌కు వేయించిన త‌రువాత మిక్సీ ప‌ట్టుకున్న ట‌మాట పేస్ట్ వేసి క‌ల‌పాలి. దీనిని నూనె పైకి తేలే వ‌ర‌కు వేయించిన త‌రువాత ఉప్పు, కారం, ప‌సుపు, ధ‌నియాల పొడి, జీల‌క‌ర్ర పొడి వేసి క‌ల‌పాలి.
దీనిని ఒక నిమిషం పాటు వేయించిన త‌రువాత వేయించిన బంగాళాదుంప ముక్కలు, పనీర్ వేసి క‌ల‌పాలి. త‌రువాత నీళ్లు పోసి క‌లిపి మూత పెట్టి 5 నిమిషాల పాటు ఉడికించాలి. త‌రువాత క‌సూరిమెంతి, గ‌రం మ‌సాలా వేసి క‌ల‌పాలి. త‌రువాత మూత పెట్టి నూనె పైకి తేలే వ‌ర‌కు ఉడికించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఆలూ పనీర్ క‌ర్రీ త‌యార‌వుతుంది. దీనిని రోటి, చ‌పాతీ, పూరీ వంటి వాటితో తింటే చాలా రుచిగా ఉంటుంది. ఈ విధంగా త‌యారు చేసిన ఆలూ పనీర్ క‌ర్రీని అంద‌రూ ఎంతో ఇష్టంగా తింటారు.
