Apple Burfi : రోజుకో యాపిల్ పండును తింటే డాక్ట‌ర్ వ‌ద్ద‌కు వెళ్లాల్సిన అవ‌స‌ర‌మే రాదంటారు. అలాంటి అద్భుత‌మైన ప్ర‌యోజ‌నాల‌ను మనకు యాపిల్ పండ్లు అందిస్తాయి. అయితే యాపిల్ పండ్ల‌తో ఎంతో రుచిగా ఉండే స్వీట్స్‌ను కూడా చేసుకోవ‌చ్చు. వాటిల్లో యాపిల్ బ‌ర్ఫీ కూడా ఒక‌టి. ఇది మనకు స్వీట్ షాపుల్లోనే ల‌భిస్తుంది. కానీ కాస్త ఓపిక ఉండాలే కానీ స్వీట్ షాపుల లాంటి రుచి వ‌చ్చేలా యాపిల్ బ‌ర్ఫీని మ‌నం ఇంట్లోనే ఎంతో సుల‌భంగా తయారు చేయ‌వ‌చ్చు. దీనికి పెద్ద‌గా శ్ర‌మించాల్సిన ప‌నిలేదు. తయారీ సుల‌భ‌మే. ఈ క్ర‌మంలోనే యాపిల్ బ‌ర్ఫీని ఎలా తయారు చేయాలో ఇప్పుడు తెలుసుకుందాం.
యాపిల్ బ‌ర్ఫీ త‌యారీకి కావలసిన పదార్థాలు..
యాపిల్స్ – 2, జీడిపప్పు – పావు కప్పు, పంచదార – అర కప్పు, చిక్కటి పాలు – మూడు కప్పులు, కొబ్బరి పొడి – అర కప్పు, ఏలకుల పొడి – అర టీ స్పూన్.
యాపిల్ బ‌ర్ఫీ తయారీ విధానం..
ముందుగా జీడిపప్పులను నానబెట్టుకుని మిక్సీలో వేసి మెత్తగా గ్రైండ్ చేసుకోవాలి. అదేవిధంగా యాపిల్ పై తొక్క తీసి అందులో గింజలు లేకుండా మెత్తని గుజ్జులా తయారు చేసి పెట్టుకోవాలి. తరువాత స్టవ్ మీద ఒక గిన్నె ఉంచి చిన్నమంటపై పాలను బాగా కలియబెడుతూ ఉడికించాలి. ఈ విధంగా పాలు బాగా మరుగుతున్న సమయంలో ముందుగా తయారు చేసి పెట్టుకొన్న ఆపిల్ గుజ్జు, జీడిపప్పు మిశ్రమం, కొబ్బరి పొడి వేసి బాగా కలియబెట్టాలి. ఈ మిశ్రమం మొత్తం బాగా దగ్గర పడే సమయంలో ఇందులో చక్కెర పొడి, యాలకుల పొడి వేసి కలియబెట్టుకోవాలి. ఈ విధంగా రెండు నిమిషాలు కలిపిన తర్వాత స్టౌ ఆఫ్ చేసుకోవాలి. ఇప్పుడు ఈ మిశ్రమాన్ని వెడల్పుగా ఉన్న ఒక ప్లేట్ లోకి నెయ్యి పోసి మిశ్రమం మొత్తం అందులోకి వేయాలి. ఈ మిశ్రమాన్ని చల్లారిన తర్వాత మనకు ఏవిధంగా నచ్చితే ఆ విధమైన ఆకారంలో బ‌ర్ఫీలుగా కట్ చేసుకోవ‌చ్చు. దీంతో ఎంతో టేస్టీగా ఉండే యాపిల్ బ‌ర్ఫీ రెడీ అవుతుంది. చాలా త్వ‌ర‌గా దీన్ని తయారు చేసుకోవ‌చ్చు. అంద‌రూ ఇష్టంగా తింటారు.
