Coconut Milk Pulao : కొబ్బ‌రితో పాటు కొబ్బరి పాలను కూడా మ‌నం ఆహారంగా తీసుకుంటూ ఉంటాం. కొబ్బరి పాలు మ‌న ఆరోగ్యానికి ఎంతో మేలు చేస్తాయి. వీటిలో మ‌న శ‌రీరానికి అవ‌స‌ర‌మ‌య్యే ఎన్నో పోష‌కాలు ఉంటాయి. కొబ్బరి పాలను ఆహారంలో భాగంగా తీసుకోవ‌డం వ‌ల్ల మ‌నం ఎన్నో ఆరోగ్య ప్ర‌యోజ‌నాల‌ను పొంద‌వ‌చ్చు. కొబ్బరి పాలను మ‌నం వంట‌ల్లో విరివిరిగా ఉప‌యోగిస్తూ ఉంటాం. కూర‌ల్లో వాడ‌డంతో పాటు కొబ్బరి పాల‌తో మ‌నం ఎంతో రుచిగా ఉండే పులావ్ ను కూడా త‌యారు చేసుకోవ‌చ్చు. కొబ్బరి పాల పులావ్ చాలా రుచిగా ఉంటుంది. దీనిని బ్యాచిల‌ర్స్,వంట‌రాని వారు కూడా సుల‌భంగా త‌యారు చేసుకోవ‌చ్చు. మసాలా వంటకాలతో క‌లిపి తింటే ఈ పులావ్ చాలా రుచిగా ఉంటుంది. కొబ్బరి పాల‌తో రుచిగా, క‌మ్మ‌గా పులావ్ ను ఎలా త‌యారు చేసుకోవాలో ఇప్పుడు తెలుసుకుందాం.
కొబ్బరి పాల పులావ్ త‌యారీకి కావ‌ల్సిన ప‌దార్థాలు..
కొబ్బరి కాయ – 1, బియ్యం – 2 క‌ప్పులు, నూనె -ఒక టేబుల్ స్పూన్, నూనె – ఒక టేబుల్ స్పూన్, బిర్యానీ ఆకులు – 2, అనాస పువ్వు – 1, దాల్చిన చెక్క – ఒక ఇంచు ముక్క, ల‌వంగాలు – 4, యాల‌కులు – 4, సాజీరా – ఒక టీ స్పూన్, త‌రిగిన ఉల్లిపాయ – 1, త‌రిగిన ప‌చ్చిమిర్చి – 2, అల్లం వెల్లుల్లి పేస్ట్ – ఒక టేబుల్ స్పూన్, త‌రిగిన పుదీనా – 2 టేబుల్ స్పూన్స్, కొబ్బరి పాలు – 4 క‌ప్పులు, ఉప్పు – త‌గినంత, ధ‌నియాల పొడి – అర టీ స్పూన్, గ‌రం మసాలా – అర టీ స్పూన్, త‌రిగిన కొత్తిమీర – కొద్దిగా.
కొబ్బరి పాల పులావ్ త‌యారీ విధానం..
ముందుగా ప‌చ్చి కొబ్బ‌రిని ముక్క‌లుగా క‌ట్ చేసుకుని జార్ లోకి తీసుకోవాలి. త‌రువాత పేస్ట్ గా చేసి దాని నుండి 4 క‌ప్పుల కొబ్బరి పాలను తీసుకోవాలి. పాలు కొద్దిగా త‌క్కువ అయితే అందులో నీటిని పోయ‌వ‌చ్చు. త‌రువాత బియ్యాన్ని క‌డిగి నాన‌బెట్టాలి. ఇప్పుడు క‌ళాయిలో నూనె, నెయ్యి వేసి వేడి చేయాలి. నూనె వేడ‌య్యాక మసాలా దినుసులు వేసి వేయించాలి. త‌రువాత ఉల్లిపాయ ముక్క‌లు, ప‌చ్చిమిర్చి వేసి వేయించాలి. త‌రువాత అల్లం పేస్ట్, పుదీనా వేసి ప‌చ్చి వాస‌న పోయే వ‌ర‌కు వేయించాలి. త‌రువాత కొబ్బరి పాలు, ఉప్పు వేసి క‌ల‌పాలి. కొబ్బరి పాలు మ‌రిగిన త‌రువాత బియ్యం, ధ‌నియాల పొడి, గ‌రం మసాలా, కొత్తిమీర వేసి క‌ల‌పాలి. దీనిని నీరంతా ఇగిరి పోయే వ‌ర‌కు ఉడికించాలి.
నీరంతా పోయిన త‌రువాత మ‌రోసారి క‌లుపుకుని పైన కొత్తిమీర చల్లుకోవాలి. త‌రువాత మూత పెట్టి పులావ్ పొడి పొడిగా అయ్యే వ‌ర‌కు చిన్న మంట‌పై ఉడికించుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే కొబ్బరి పాల పులావ్ త‌యార‌వుతుంది. దీనిని చికెన్, మ‌ట‌న్ క‌ర్రీల‌తో లేదా వెజ్ మసాలా వంటకాలతో క‌లిపి తింటే చాలా రుచిగా ఉంటుంది. వీకెండ్స్ లో స్పెష‌ల్ డేస్ లో ఇలా కొబ్బరి పాల‌తో పులావ్ ను త‌యారు చేసుకుని తిన‌వ‌చ్చు. ఈ పులావ్ ను అంద‌రూ ఎంతో ఇష్టంగా తింటారు.
