Dondakaya Kobbarikaram : దొండ‌కాయ‌ల‌తో మ‌నం వివిధ ర‌కాల వంట‌కాల‌ను త‌యారు చేస్తూ ఉంటాము. దొండ‌కాయ‌ల‌తో చేసే వంట‌కాలు రుచిగా ఉండ‌డంతో పాటు వీటిని తిన‌డం వ‌ల్ల మ‌న ఆరోగ్యానికి కూడా మేలు క‌లుగుతుంది. దొండ‌కాయ‌ల‌తో ఎక్కువ‌గా చేసే వంట‌కాల్లో దొండ‌కాయ ఫ్రై కూడా ఒక‌టి. దొండ‌కాయ ఫ్రై చాలా రుచిగా ఉంటుంది. అయితే త‌రుచూ ఒకేర‌కంగా కాకుండా ఈ దొండ‌కాయ ప్రైను మ‌నం మ‌రింత రుచిగా కూడా త‌యారు చేసుకోవ‌చ్చు. కింద చెప్పిన విధంగా కొబ్బ‌రికారం వేసి త‌యారు చేసే దొండ‌కాయ వేపుడు కూడా చాలా రుచిగా ఉంటుంది. దొండ‌కాయ‌ల‌ను ఇష్ట‌ప‌డ‌ని వారు కూడా ఈ వేపుడును ఇష్టంగా తింటారు. దీనిని త‌యారు చేయ‌డం కూడా చాలా సుల‌భం. కొబ్బ‌రికారం వేసి మ‌రింత రుచిగా దొండ‌కాయ వేపుడును ఎలా త‌యారు చేసుకోవాలో ఇప్పుడు తెలుసుకుందాం.
దొండ‌కాయ కొబ్బ‌రికారం తయారీకి కావ‌ల్సిన ప‌దార్థాలు..
నూనె – 2 టేబుల్ స్పూన్స్, తాళింపు దినుసులు – ఒక టేబుల్ స్పూన్, ఎండుమిర్చి – 1, త‌రిగిన ఉల్లిపాయ – పెద్ద‌ది ఒక‌టి, క‌రివేపాకు – ఒక రెమ్మ, గుండ్ర‌టి ముక్క‌లుగా క‌ట్ చేసుకున్న దొండ‌కాయ‌లు – 400 గ్రా., ఉప్పు – త‌గినంత, ప‌సుపు – పావు టీ స్పూన్, త‌రిగిన కొత్తిమీర – కొద్దిగా.
కొబ్బ‌రికారం తయారీకి కావ‌ల్సిన ప‌దార్థాలు..
శ‌న‌గ‌ప‌ప్పు – 2 టీ స్పూన్స్, ధ‌నియాలు – ఒక టీ స్పూన్, జీల‌క‌ర్ర – అర టీ స్పూన్, ఎండుమిర్చి – 5, నువ్వులు – ఒక టేబుల్ స్పూన్, ప‌చ్చికొబ్బ‌రి ముక్క‌లు – పావు క‌ప్పు, వెల్లుల్లి రెబ్బ‌లు – 6.
దొండ‌కాయ కొబ్బ‌రికారం తయారీ విధానం..
ముందుగా క‌ళాయిలో శ‌న‌గ‌ప‌ప్పు వేసి వేయించాలి. తరువాత ధ‌నియాలు, జీల‌క‌ర్ర వేసి వేయించాలి. ఇవి వేగిన తరువాత ఎండుమిర్చి వేసి వేయించాలి. చివ‌ర‌గా నువ్వులు వేసి వేయించి స్ట‌వ్ ఆఫ్ చేసుకోవాలి. తరువాత వీటిని జార్ లోకి తీసుకుని ఇందులోనే కొబ్బ‌రి ముక్క‌లు, వెల్లుల్లి రెబ్బ‌లు వేసి మిక్సీ ప‌ట్టుకుని ప‌క్క‌కు ఉంచాలి. తరువాత క‌ళాయిలో నూనె వేసి వేడి చేయాలి. నూనె వేడ‌య్యాక తాళింపు దినుసులు, ఎండుమిర్చి వేసి వేయించాలి. తరువాత ఉల్లిపాయ ముక్క‌లు, క‌రివేపాకు వేసి వేయించాలి. ఇవి వేగిన తరువాత దొండ‌కాయ ముక్క‌లు, ఉప్పు, ప‌సుపు వేసి క‌ల‌పాలి.
తరువాత మూత పెట్టి మ‌ధ్య మ‌ధ్య‌లో క‌లుపుతూ దొండ‌కాయ ముక్క‌ల‌ను పూర్తిగా వేయించాలి. దొండ‌కాయ ముక్క‌లు చ‌క్క‌గా వేగిన తరువాత మిక్సీ ప‌ట్టుకున్న కారం వేసి క‌ల‌పాలి. తరువాత మూత పెట్టి మ‌రో 2 నిమిషాల పాటు వేయించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే దొండ‌కాయ కొబ్బ‌రికారం త‌యార‌వుతుంది. దీనిని అన్నంతో తింటే చాలా రుచిగా ఉంటుంది. అలాగే ప‌ప్పు, సాంబార్ వంటి వాటితో సైడ్ డిష్ గా తిన్నా కూడా చాలా రుచిగా ఉంటుంది. ఈ విధంగా త‌యారు చేసిన దొండ‌కాయ కొబ్బ‌రికారాన్ని అందరూ ఎంతో ఇష్టంగా తింటారు.
