Ginger Chicken : రెస్టారెంట్ల‌లో ల‌భించే జింజ‌ర్ చికెన్‌.. ఇలా చేస్తే లొట్ట‌లేసుకుంటూ తింటారు..!

Ginger Chicken : మ‌న‌కు రెస్టారెంట్ ల‌లో ల‌భించే చికెన్ వెరైటీల‌ల్లో జింజ‌ర్ చికెన్ కూడా ఒక‌టి. జింజ‌ర్ చికెన్ చాలా రుచిగా ఉంటుంది. స్టాట‌ర్ గా తిన‌డానికి ఇది చాలా చ‌క్క‌గా ఉంటుంది. చాలా మంది దీనిని రుచి చూసే ఉంటారు. ఈ జింజ‌ర్ చికెన్ ను అదే రుచితో మ‌నం ఇంట్లో కూడా త‌యారు చేసుకోవ‌చ్చు. వీకెండ్స్ లో, స్పెషల్ డేస్ లో ఇలా వెరైటీగా జింజ‌ర్ చికెన్ ను త‌యారు చేసి తీసుకోవ‌చ్చు. ఇంట్లోనే రెస్టారెంట్ స్టైల్ జింజ‌ర్ చికెన్ ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.

జింజ‌ర్ చికెన్ త‌యారీకి కావ‌ల్సిన ప‌దార్థాలు..

అర‌గంట‌పాట ఉప్పు నీటిలో నాన‌బెట్టిన బోన్ లెస్ చికెన్ – 300 గ్రా., కోడిగుడ్డు – 1, ఉప్పు – కొద్దిగా, మైదాపిండి – 2 టేబుల్ స్పూన్స్, కార్న్ ఫ్లోర్ – 2 టేబుల్ స్పూన్స్, నూనె – డీప్ ప్రైకు స‌రిప‌డా, చిన్న‌గా త‌రిగిన వెల్లుల్లి రెబ్బ‌లు – 6, త‌రిగిన అల్లం – ఒక టీ స్పూన్, చిన్న‌గా త‌రిగిన ప‌చ్చిమిర్చి – 1, ఉల్లిపాయ త‌రుగు – 2 టేబుల్ స్పూన్స్, చిల్లీ పేస్ట్ – 2 టీ స్పూన్స్, వెనిగ‌ర్ – ఒక టీ స్పూన్, ట‌మాట కిచ‌ప్ – ఒక టేబుల్ స్పూన్, లైట్ సోయా సాస్ – ఒక టీ స్పూన్, బ్లాక్ పెప్ప‌ర్ పౌడ‌ర్ – అర టీ స్పూన్, వైట్ పెప్ప‌ర్ పౌడ‌ర్ – అర టీ స్పూన్, ఆరోమెటిక్ పౌడ‌ర్ – అర టీ స్పూన్, పంచ‌దార – అర టీ స్పూన్, నీళ్లు – 250 ఎమ్ ఎల్.

జింజ‌ర్ చికెన్ త‌యారీ విధానం..

ముందుగా గిన్నెలో నాన‌బెట్టిన చికెన్ ను నీళ్లు లేకుండా చేసుకుని గిన్నెలోకి తీసుకోవాలి. త‌రువాత ఇందులో ఉప్పు, మైదాపిండి, కార్న్ ఫ్లోర్ ను వేసుకోవాలి. త‌రువాత కోడిగుడ్డును బాగా క‌ల‌పాలి. త‌రువాత 2 టేబుల్ స్పూన్ల కోడిగుడ్డును చికెన్ లో వేసి బాగా క‌లుపుకోవాలి. త‌రువాత క‌ళాయిలో నూనె పోసి వేడి చేయాలి. నూనె బాగా వేడ‌య్యాక చికెన్ ను వేసి వేయించాలి. దీనిని మ‌ధ్య‌స్థ మంట‌పై క్రిస్పీగా అయ్యే వ‌ర‌కు వేయించి ప్లేట్ లోకి తీసుకోవాలి. త‌రువాత క‌ళాయిలో 2 టేబుల్ స్పూన్ల నూనె వేసి వేడి చేయాలి. త‌రువాత వెల్లుల్లి త‌రుగు, అల్లం త‌రుగు, ప‌చ్చిమిర్చి త‌రుగు, ఉల్లిపాయ త‌రుగు వేసి ప‌చ్చి వాస‌న పోయే వ‌ర‌కు వేయించాలి. త‌రువాత చిల్లీ పేస్ట్, వెనిగ‌ర్, ట‌మాట కిచ‌ప్, లైట్ సోయా సాస్, బ్లాక్ పెప్ప‌ర్ పౌడ‌ర్, వైట్ పెప్ప‌ర్ పౌడ‌ర్, అరోమేటిక్ పౌడ‌ర్ వేసి క‌ల‌పాలి. వీటిని నూనె పైకి తేలే వ‌ర‌కు బాగా వేయించిన త‌రువాత ఉప్పు, పంచ‌దార వేసి క‌ల‌పాలి.

త‌రువాత నీళ్లు పోసి క‌ల‌పాలి. నీళ్లు మ‌రిగి చిక్క‌బడిన త‌రువాత చికెన్ వేసి క‌ల‌పాలి. త‌రువాత మ‌రింత అల్లం తరుగు వేసి క‌ల‌పాలి. మ‌సాలాల‌న్ని చికెన్ కు ప‌ట్టిన త‌రువాత స్ట‌వ్ ఆఫ్ చేసి వేడి వేడిగా స‌ర్వ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే జింజ‌ర్ చికెన్ త‌యార‌వుతుంది. దీనిని వేడి వేడిగా తింటే చాలా రుచిగా ఉంటుంది. ఇలా ఇంట్లోనే చాలా సుల‌భంగా జింజ‌ర్ చికెన్ ను త‌యారు చేసి తీసుకోవ‌చ్చు.