Kadai Paneer : రెస్టారెంట్ల‌లో ల‌భించే క‌డై ప‌నీర్‌ను.. ఇంట్లోనే ఇలా చేసుకోవ‌చ్చు..!

Kadai Paneer : మ‌న‌కు రెస్టారెంట్ ల‌లో ల‌భించే ప‌నీర్ వెరైటీల‌లో క‌డాయి ప‌నీర్ కూడా ఒక‌టి. క‌డాయి ప‌నీర్ చాలా రుచిగా ఉంటుంది. రోటీ, చ‌పాతీ, నాన్, బ‌ట‌ర్ నాన్ వంటి వాటితో తింటే ఈ కూర చాలా రుచిగా ఉంటుంది. ఈ క‌డాయి ప‌నీర్ కర్రీని రెప్టారెంట్ స్టైల్ లో మ‌నం ఇంట్లో కూడా త‌యారు చేసుకోవ‌చ్చు. ఈ క‌ర్రీని త‌యారు చేయ‌డం చాలా సుల‌భం. ప‌నీర్ ఉంటే చాలు నిమిషాల వ్వ‌వ‌ధిలోనే ఈ క‌ర్రీని మ‌నం త‌యారు చేసుకోవ‌చ్చు. రెస్టారెంట్ స్టైల్ క‌డాయి ప‌నీర్ క‌ర్రీని ఇంట్లో ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.

క‌డాయి ప‌నీర్ త‌యారీకి కావ‌ల్సిన ప‌దార్థాలు..

నూనె – 3 టీ స్పూన్స్, పనీర్ – 200 గ్రా., త‌రిగిన ఉల్లిపాయ – 1, అల్లం – ఒక ఇంచు ముక్క‌, జీడిప‌ప్పు – 10, వెల్లుల్లి రెబ్బ‌లు – 10, ట‌మాట ముక్క‌లు – అర క‌ప్పు, బ‌ట‌ర్ – ఒక టీ స్పూన్, బిర్యానీఆకు – 1, త‌రిగిన ప‌చ్చిమిర్చి – 2, ప‌సుపు – పావు టీ స్పూన్, కారం – ఒక‌టిన్న‌ర టీ స్పూన్, ధ‌నియాల పొడి -ఒక టీ స్పూన్, పెట‌ల్స్ లాగా త‌రిగిన ఉల్లిపాయ – 1, పెట‌ల్స్ లాగా తరిగిన క్యాప్సికం – 1, నీళ్లు – అర క‌ప్పు, ఉప్పు – త‌గినంత‌, క‌సూరి మెంతి – ఒక టీ స్పూన్, త‌రిగిన కొత్తిమీర – కొద్దిగా.

మ‌సాలా త‌యారీకి కావల్సిన ప‌దార్థాలు..

ధ‌నియాలు – ఒక టీ స్పూన్, జీల‌క‌ర్ర – అర టీ స్పూన్, ఎండుమిర్చి – 1, మిరియాలు – అర‌ టీ స్పూన్, యాల‌కులు – 2, ల‌వంగాలు – 3, దాల్చిన చెక్క – ఒక చిన్న ముక్క‌.

క‌డాయి ప‌నీర్ త‌యారీ విధానం..

ముందుగా ఒక క‌ళాయిలో మ‌సాలా పొడికి కావ‌ల్సిన ప‌దార్థాలు వేసి వేయించాలి. త‌రువాత వీటిని జార్ లో వేసి పొడిగా చేసుకుని గిన్నెలోకి తీసుకోవాలి. త‌రువాత అదే క‌ళాయిలో నూనె వేసి వేడి చేయాలి. నూనె వేడ‌య్యాక ప‌నీర్ ముక్క‌లు వేసి రంగు మారే వ‌ర‌కు వేయించి ప్లేట్ లోకి తీసుకోవాలి. త‌రువాత అదే క‌ళాయిలో ఉల్లిపాయ‌లు, జీడిప‌ప్పు, ట‌మాట ముక్క‌లు, అల్లం, వెల్లుల్లి రెబ్బ‌లు వేసి క‌ల‌పాలి. త‌రువాత మూత పెట్టి మెత్త‌గా అయ్యే వ‌ర‌కు ఉడికించి స్ట‌వ్ ఆఫ్ చేసుకోవాలి. ఇవి చ‌ల్లారిన త‌రువాత జార్ లో వేసి పేస్ట్ లాగా చేసుకోవాలి. ఇప్పుడు క‌ళాయిలో బ‌ట‌ర్, నూనె వేసి వేడి చేయాలి. త‌రువాత బిర్యానీ ఆకు, ప‌చ్చిమిర్చి వేసి వేయించాలి.

త‌రువాత ప‌సుపు, ఉప్పు, కారం, ధ‌నియాల పొడి వేసి క‌ల‌పాలి. త‌రువాత మిక్సీ ప‌ట్టుకున్న ఉల్లిపాయ పేస్ట్ వేసి క‌ల‌పాలి. దీనిని నూనె పైకి తేలే వ‌ర‌కు వేయించిన త‌రువాత ఉల్లిపాయ ముక్క‌లు, క్యాప్సికం ముక్క‌లు వేసి క‌ల‌పాలి. త‌రువాత మూత పెట్టి అవి మెత్త‌బడే వ‌ర‌కు వేయించాలి. త‌రువాత నీళ్లు, క‌సూరి మెంతి, మిక్సీ ప‌ట్టుకున్న పొడి వేసి క‌ల‌పాలి. దీనిని 3 నిమిషాల‌పాటు ఉడికించిన త‌రువాత ప‌నీర్ ముక్క‌లు వేసి క‌లిపి మూత పెట్టాలి. దీనిని చిన్న మంట‌పై నూనె పైకి తేలే వ‌ర‌కు ఉడికించాలి. త‌రువాత కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల రెస్టారెంట్ స్టైల్ క‌డాయి ప‌నీర్ త‌యార‌వుతుంది. దీని రుచికి అంద‌రూ ఫిదా అవ్వాల్సిందే.