Kuska Rice : మ‌నం ర‌క‌ర‌కాల రైస్ వెరైటీస్ ను త‌యారు చేస్తూ ఉంటాం. వాటిలో కుష్కా రైస్ కూడా ఒక‌టి. ఈ రైస్ చాలా రుచిగా ఉంటుంది. బిర్యానీకి ఏ మాత్రం త‌క్కువ కాకుండా ఉంటుంది ఈ రైస్. గ్రేవి కూర‌ల‌తో తింటే ఈ రైస్ చాలా రుచిగా ఉంటుంది. దీనిని మ‌నం చాలా సుల‌భంగా ఇంట్లో కూడా త‌యారు చేసుకోవ‌చ్చు. వంట‌రాని వారు, బ్యాచిలర్స్ ఇలా ఎవ‌రైనా దీనిని త‌యారు చేసుకోవ‌చ్చు. తిన్నా కొద్ది తినాల‌నిపించేంత రుచిగా ఉండే ఈ కుష్కా రైస్ ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు.. ఏమిటి.. అన్న వివ‌రాల‌ను ఇప్పుడు తెలుసుకుందాం.
కుష్కా రైస్ త‌యారీకి కావ‌ల్సిన ప‌దార్థాలు..
నాన‌బెట్టిన బాస్మ‌తీ బియ్యం – 500 గ్రా., ఉడికించిన కోడిగుడ్లు – 5, పొడుగ్గా తరిగిన ఉల్లిపాయ‌లు – 2, తరిగిన ట‌మాటా – 1, పెరుగు – 50 గ్రా., కారం – ఒక టేబుల్ స్పూన్, గ‌రం మ‌సాలా – అర టేబుల్ స్పూన్, తరిగిన ప‌చ్చిమిర్చి – 4, జీడిప‌ప్పు – 2 టేబుల్ స్పూన్స్, అల్లం – ఒక ఇంచు ముక్క, వెల్లుల్లి రెబ్బ‌లు – 6, నూనె – 2 టేబుల్ స్పూన్స్, ఉప్పు – త‌గినంత, నెయ్యి – ఒక టేబుల్ స్పూన్, తరిగిన పుదీనా – 2 టేబుల్ స్పూన్స్, తరిగిన కొత్తిమీర – 2 టేబుల్ స్పూన్స్, ప‌సుపు – చిటికెడు.
మ‌సాలా దినుసులు..
దాల్చిన చెక్క – ఒక ఇంచు ముక్క, ల‌వంగాలు – 3, యాల‌కులు – 3, బిర్యానీ ఆకు – 2, అనాస పువ్వు – 1, సాజీరా – ఒక టీ స్పూన్.
కుష్కా రైస్ త‌యారీ విధానం..
ముందుగా క‌ళాయిలో నూనె వేసి వేడి చేయాలి. నూనె వేడ‌య్యాక ఉల్లిపాయ ముక్కలు, దాల్చిన చెక్క, ల‌వంగాలు, అల్లం, వెల్లుల్లి రెబ్బ‌లు, ప‌చ్చిమిర్చి వేసి వేయించాలి. ఉల్లిపాయ ముక్కలు వేగిన త‌రువాత ట‌మాట ముక్కలు వేసి వేయించాలి. ట‌మాట ముక్కలు మెత్త‌బ‌డిన త‌రువాత స్ట‌వ్ ఆఫ్ చేసి చ‌ల్లార‌నివ్వాలి. త‌రువాత వీట‌న్నింటిని జార్ లో వేసి మెత్త‌గా మిక్సీ పట్టుకోవాలి. త‌రువాత అదే క‌ళాయిలో నెయ్యి, మ‌రో టేబుల్ స్పూన్ నూనె వేసి వేడి చేయాలి. త‌రువాత కోడిగుడ్ల‌కు గాట్లు పెట్టుకుని వేసుకుని వేయించాలి. కోడిగుడ్లు ఎర్ర‌గా వేగిన త‌రువాత ఉప్పు, కారం, ప‌సుపు వేసి క‌ల‌పాలి. కోడిగుడ్లను చ‌క్క‌గా వేయించి ప్లేట్ లోకి తీసుకోవాలి.
త‌రువాత అదే నూనెలో మ‌సాలా దినుసులు, జీడిప‌ప్పు, ఉల్లిపాయ ముక్కలు, ప‌చ్చిమిర్చి వేసి వేయించాలి. ఉల్లిపాయ ముక్కలు వేగిన త‌రువాత మిక్సీ పట్టుకున్న పేస్ట్ వేసి క‌ల‌పాలి. దీనిని మ‌రో రెండు నిమిషాల పాటు వేయించిన త‌రువాత పెరుగు, ఉప్పు, కారం, గ‌రం మ‌సాలా వేసి క‌ల‌పాలి. దీనిని నూనె పైకి తేలే వ‌ర‌కు వేయించిన త‌రువాత బియ్యం, కొత్తిమీర, పుదీనా వేసి క‌ల‌పాలి. త‌రువాత ఇందులో ఒక గ్లాస్ బియ్యానికి ఒక‌టిన్న‌ర గ్లాస్ నీళ్లు పోసి క‌ల‌పాలి. బియ్యం ఉడికి నీళ్లు ఇగురుతున్న‌ప్పుడు వేయించిన కోడిగుడ్లను పైన ఉంచి మూత పెట్టాలి. ఇప్పుడు మంట‌ను చిన్న‌గా చేసి 10 నిమిషాల పాటు ఉడికించి స్ట‌వ్ ఆఫ్ చేసుకోవాలి.
దీనిని మ‌రో 5 నిమిషాల పాటు అలాగే ఉంచి ఆ త‌రువాత స‌ర్వ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే కుష్కా రైస్ త‌యార‌వుతుంది. దీనిని నేరుగా తిన్నా కూడా చాలా రుచిగా ఉంటుంది. అలాగే మ‌సాలా కూర‌లు, రైతాతో తిన్నా కూడా చాలా రుచిగా ఉంటుంది. వీకెండ్స్ లో లేదా నోటికి రుచిగా ఏదైనా తినాల‌నిపించిన‌ప్పుడు ఇలా కుష్కా రైస్ ను త‌యారు చేసుకుని తిన‌వ‌చ్చు.
