Natukodi Pulao : నాటుకోడి పులావ్.. నాటుకోడితో చేసే ఈ పులావ్ చాలా రుచిగా ఉంటుంది. దీనిని ఇష్ట‌ప‌డ‌ని వారు ఉండ‌ర‌నే చెప్ప‌వ‌చ్చు. వీకెండ్స్ లో, స్పెష‌ల్ డేస్ లో, పండ‌గ‌ల‌కు త‌యారు చేసుకోవ‌డానికి ఈ పులావ్ చాలా చ‌క్క‌గా ఉంటుంద‌ని చెప్ప‌వ‌చ్చు. అలాగే ఈ పులావ్ ను త‌యారు చేయ‌డం చాలా సుల‌భం. వంట‌రాని వారు, మొద‌టిసారి చేసేవారు, బ్యాచిల‌ర్స్ ఇలా ఎవ‌రైనా ఈ పులావ్ ను చాలా సుల‌భంగా, చాలా త‌క్కువ స‌మ‌యంలో త‌యారు చేసుకోవ‌చ్చు. తిన్నా కొద్ది తినాల‌నిపించేంత రుచిగా ఉండే ఈ నాటుకోడి పులావ్ ను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
గంట‌పాటు నాన‌బెట్టిన చిట్టి ముత్యాల బియ్యం – 2 క‌ప్పులు, నెయ్యి – 3 టేబుల్ స్పూన్స్, నూనె – 2 టేబుల్ స్పూన్స్, స్టోన్ ప్ల‌వ‌ర్ – ఒక టీ స్పూన్, దాల్చిన చెక్క – 2 ఇంచుల ముక్కలు, యాల‌కులు – 5, న‌ల్ల యాల‌క్కాయ – 1, అనాస పువ్వు – 1, జాప‌త్రి – 1, ల‌వంగాలు – 8, బిర్యానీ ఆకులు – 2, సోంపు గింజ‌లు – ఒక టీ స్పూన్, సాజీరా – ఒక టీస్పూన్, తరిగిన ప‌చ్చిమిర్చి – 8, స‌న్న‌గా పొడుగ్గా తరిగిన ఉల్లిపాయ‌లు – పెద్ద‌వి రెండు, అల్లం వెల్లుల్లిపేస్ట్ – ఒక టేబుల్ స్పూన్, ప‌సుపు – పావు టీ స్పూన్, తరిగిన పుదీనా -ఒక క‌ట్ట, తరిగిన కొత్తిమీర – ఒక క‌ట్ట, తరిగిన ట‌మాటాలు – 2, కారం – ఒక టేబుల్ స్పూన్, ధ‌నియాల పొడి – ఒక టీస్పూన్, పెరుగు – అర‌కిలో, నాటుకోడి చికెన్ – అర‌కిలో, నీళ్లు – పావులీట‌ర్, ఉప్పు – త‌గినంత.
ముందుగా అడుగు మందంగా ఉండే క‌ళాయిలో నూనె,నెయ్యి వేసి వేడి చేయాలి. త‌రువాత మ‌సాలా దినుసులు, ప‌చ్చిమిర్చి వేసి వేయించాలి. త‌రువాత ఉల్లిపాయ ముక్కలు వేసి ఎర్ర‌గా అయ్యే వ‌ర‌కు వేయించాలి. త‌రువాత అల్లం వెల్లుల్లి పేస్ట్, ప‌సుపు, ఉప్పు వేసి ప‌చ్చి వాస‌న పోయే వ‌ర‌కు వేయించాలి. త‌రువాత కొత్తిమీర, పుదీనా వేసి క‌ల‌పాలి. త‌రువాత ట‌మాట ముక్కలు వేసి మూత పెట్టి ముక్కలు మెత్త‌గా అయ్యే వ‌ర‌కు మ‌గ్గించాలి. త‌రువాత కారం, ధ‌నియాల పొడి,, పెరుగు వేసి క‌ల‌పాలి. త‌రువాత చికెన్ వేసి క‌లిపి మూత పెట్టి 4 నిమిషాల పాటు వేయించాలి. త‌రువాత నీళ్లు పోసి మూత పెట్టి నీరంతా పోయే వ‌ర‌కు ఉడికించాలి. ఇలా ఉడికించిన త‌రువాత మ‌రో 4 క‌ప్పుల నీళ్లు పోసి క‌ల‌పాలి. నీళ్లు మ‌రిగిన త‌రువాత నాన‌బెట్టిన బియ్యం వేసి క‌ల‌పాలి. ఇప్పుడు దీనిపై మూత పెట్టి 8 నిమిషాల పాటు పెద్ద మంట‌పై, 7 నిమిషాల పాటు చిన్న మంట‌పై ఉడికించి స్ట‌వ్ ఆఫ్ చేసుకోవాలి. త‌రువాత దీనిని 20 నిమిషాల పాటు అలాగే ఉంచి ఆ త‌రువాత స‌ర్వ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే నాటుకోడి పులావ్ త‌యార‌వుతుంది. దీనిని నేరుగా తిన్నా, రైతాతో తిన్నా చాలా రుచిగా ఉంటుంది.
