Palakura Pappu : పాలకూర పప్పును రుచిగా ఇలా చేయండి.. వేడి వేడి అన్నంలో నెయ్యి వేసుకుని తింటే సూపర్ గా ఉంటుంది..

Palakura Pappu : మ‌నం ఆహారంగా తీసుకునే ఆకుకూర‌ల్లో పాల‌కూర ఒక‌టి. పాల‌కూర మ‌న ఆరోగ్యానికి ఎంతో మేలు చేస్తుంద‌న్న సంగ‌తి మ‌న‌కు తెలిసిందే. పాల‌కూర‌తో మ‌నం ఎక్కువ‌గా ప‌ప్పును త‌యారు చేస్తూ ఉంటాం. పాల‌కూర ప‌ప్పు చాలా రుచిగా ఉంటుంది. పాల‌కూర ప‌ప్పును చాలా మంది ఇష్టంగా తింటారు. ఈ ప‌ప్పు త‌యారీలో పులుపు కోసం మ‌నం చింత‌పండు ర‌సాన్ని ఉప‌యోగిస్తూ ఉంటాం. కేవ‌లం చింత‌పండే కాకుండా ఈ ప‌ప్పు త‌యారీలో పులుపు కొర‌కు మ‌నం మామిడికాయ‌ను కూడా ఉప‌యోగించుకోవ‌చ్చు. మామిడికాయ వేసి చేసే ఈ ప‌ప్పు కూడా చాలా రుచిగా ఉంటుంది. అంద‌రూ ఇష్టంగా తినేలా,తేలిక‌గా మామిడికాయ‌తో పాల‌కూర ప‌ప్పును ఎలా త‌యారు చేసుకోవాలో ఇప్పుడు తెలుసుకుందాం.

పాల‌కూర ప‌ప్పు త‌యారీకి కావ‌ల్సిన ప‌దార్థాలు..

కందిప‌ప్పు – 100 గ్రా., త‌రిగిన పెద్ద ఉల్లిపాయ – 1, త‌రిగిన ప‌చ్చిమిర్చి – 2, త‌రిగిన పాల‌కూర – 5 క‌ట్ట‌లు, నీళ్లు – ఒక గ్లాస్, పుల్ల‌టి మామిడికాయ – 1 ( చిన్న‌ది), ఉప్పు – త‌గినంత‌, కారం – ఒక టేబుల్ స్పూన్, ప‌సుపు – అర టీ స్పూన్.

తాళింపు ప‌దార్థాలు..

నూనె – ఒక‌టిన్న‌ర టేబుల్ స్పూన్, తాళింపు ప‌దార్థాలు – ఒక టేబుల్ స్పూన్, ఇంగువ – పావు టీ స్పూన్, క‌చ్చా ప‌చ్చాగా దంచిన వెల్లుల్లి రెబ్బ‌లు – 4, ఎండుమిర్చి – 2, క‌రివేపాకు – ఒక రెమ్మ‌.

పాల‌కూర ప‌ప్పు త‌యారీ విధానం..

ముందుగా కుక్క‌ర్ లో కందిప‌ప్పును తీసుకుని శుభ్రంగా క‌డ‌గాలి. త‌రువాత ఉల్లిపాయ ముక్క‌లు, ప‌చ్చిమిర్చి, పాల‌కూర‌, నీళ్లు పోసి మూత పెట్టాలి. త‌రువాత ఈ ప‌ప్పును 3 విజిల్స్ వ‌చ్చే వ‌ర‌కు ఉడికించుకోవాలి. త‌రువాత మూత తీసి ప‌ప్పును మెత్త‌గా చేసుకోవాలి. అలాగే మామిడికాయ పై ఉండే చెక్కును తీసి ముక్క‌లుగా చేయాలి. ఈ ముక్క‌ల‌ను గిన్నెలో వేసి త‌గిన‌న్ని నీళ్లు పోసి మెత్త‌గా ఉడికించాలి. త‌రువాత ముందుగా ఉడికించిన ప‌ప్పులో ఉప్పు, కారం, మ‌రో అర గ్లాస్ నీళ్లు, ప‌సుపు, ఉడికించిన మామిడికాయ గుజ్జును వేసి క‌ల‌పాలి. త‌రువాత ఈ ప‌ప్పును మ‌రో 5 నిమిషాల పాటు ఉడికించి స్ట‌వ్ ఆఫ్ చేసుకోవాలి. ఇప్పుడు క‌ళాయిలో నూనె వేసి వేడి చేయాలి.

నూనె వేడ‌య్యాక తాళింపు ప‌దార్థాల‌ను ఒక్కొక్క‌టిగా వేసి వేయించుకోవాలి. తాళింపు చ‌క్క‌గా వేగిన త‌రువాత అందులో ముందుగా ఉడికించుకున్న ప‌ప్పును వేసి క‌ల‌పాలి. దీనిని మ‌రో నిమిషం పాటు ఉడికించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే పాల‌కూర ప‌ప్పు త‌యార‌వుతుంది. దీనిని అన్నం, చ‌పాతీ, రోటీ వంటి వాటితో క‌లిపి తింటే చాలా రుచిగా ఉంటుంది. చింత‌పండు ర‌సం వేసి చేసే మామిడికాయ ప‌ప్పు కంటే ఈ విధంగా మామిడికాయ వేసి చేసే పాల‌కూర ప‌ప్పు మ‌రింత రుచిగా ఉంటుంది. దీనిని లొట్ట‌లేసుకుంటూ అంద‌రూ ఎంతో ఇష్టంగా తింటారు.