Pepper Chicken Fry : మ‌న‌కు రెస్టారెంట్ ల‌లో ర‌క‌ర‌కాల చికెన్ వెరైటీలు ల‌భిస్తూ ఉంటాయి. మ‌న‌కు ల‌భించే చికెన్ వెరైటీల‌లో పెప్ప‌ర్ చికెన్ ఫ్రై కూడా ఒక‌టి. మిరియాల ఘాటుతో ఈ చికెన్ చాలా చ‌క్క‌గా ఉంటుంది. ఈ పెప్ప‌ర్ చికెన్ ఫ్రైను అదే రుచితో మ‌నం ఇంట్లో కూడా త‌యారు చేసుకోవ‌చ్చు. ఈ చికెన్ ఫ్రైను ఎవ‌రైనా చాలా తేలిక‌గా త‌యారు చేసుకోవ‌చ్చు. రుచిగా అలాగే చాలా సుల‌భంగా ఈ పెప్ప‌ర్ చికెన్ ఫ్రైను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
పెప్ప‌ర్ చికెన్ ఫ్రై త‌యారీకి కావల్సిన ప‌దార్థాలు..
నూనె – 75 ఎమ్ ఎల్, ఆవాలు – అర టీ స్పూన్, ఎండుమిర్చి – 6, క‌రివేపాకు – రెండు రెమ్మ‌లు, వెల్లుల్లి రెబ్బ‌లు – 15, చిన్న‌గా త‌రిగిన ఉల్లిపాయ – 1, అల్లం వెల్లుల్లి పేస్ట్ – ఒక టేబుల్ స్పూన్, అర గంట పాటు ఉప్పు నీటిలో నాన‌బెట్టిన చికెన్ – అర కిలో, ఉప్పు – త‌గినంత, పసుపు – పావు టీ స్పూన్, కారం – ఒక టీ స్పూన్, నిమ్మ‌ర‌సం – అర చెక్క, నెయ్యి – ఒక టీ స్పూన్, త‌రిగిన కొత్తిమీర – కొద్దిగా.
మ‌సాలా పొడి త‌యారీకి కావల్సిన ప‌దార్థాలు..
దాల్చిన చెక్క – ఒక ఇంచు ముక్క, ప‌త్త‌ర్ ఫూల్ – 1, మ‌రాఠి మొగ్గ – చిన్న‌ది ఒక‌టి, ల‌వంగాలు – 3, అనాస పువ్వు – 1, ధ‌నియాలు – ఒక టేబుల్ స్పూన్, మిరియాలు – 2 టేబుల్ స్పూన్స్, జీల‌క‌ర్ర – ఒక టీ స్పూన్, సోంపు గింజ‌లు – ఒక టీ స్పూన్.
పెప్ప‌ర్ చికెన్ ఫ్రై త‌యారీ విధానం..
ముందుగా క‌ళాయిలో మ‌సాలా పొడికి కావల్సిన ప‌దార్థాలు వేసి దోర‌గా వేయించాలి. త‌రువాత వీటిని జార్ లో వేసి పొడిగా చేసుకోవాలి. ఇప్పుడు అడుగు మందంగా ఉండే క‌ళాయిలో నూనె వేసి వేడి చేయాలి. నూనె వేడ‌య్యాక ఆవాలు, ఎండుమిర్చి వేసి వేయించాలి. త‌రువాత క‌రివేపాకు, వెల్లుల్లి రెబ్బ‌లు వేసి వేయించాలి. వెల్లుల్లి రెబ్బ‌లు కొద్దిగా రంగు మారిన త‌రువాత ఉల్లిపాయ ముక్క‌లు వేసి వేయించాలి. వీటిని ఎర్ర‌గా వేయించిన త‌రువాత అల్లం వెల్లుల్లి పేస్ట్ వేసి ప‌చ్చి వాస‌న పోయే వ‌ర‌కు వేయించాలి. త‌రువాత చికెన్, ఉప్పు వేసి క‌ల‌పాలి. త‌రువాత దీనిపై మూత పెట్టి 10 నిమిషాల పాటు వేయించాలి.
త‌రువాత పసుపు, కారం, నిమ్మ‌ర‌సం, మిక్సీ ప‌ట్టుకున్న పొడి వేసి క‌ల‌పాలి. త‌రువాత దీనిపై మూత‌ను ఉంచి మ‌రో 15 నిమిషాల పాటు మ‌ధ్య మ‌ధ్య‌లో క‌లుపుతూ వేయించాలి. అడుగు ప‌ట్టిన మ‌సాలాల‌ను కూడా గంటెతో గీరుతూ క‌లుపుతూ ఉండాలి. ఇలా 15 నిమిషాల పాటు వేయించిన త‌రువాత నెయ్యి, కొత్తిమీర వేసి క‌లిపి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే పెప్ప‌ర్ చికెన్ ఫ్రై త‌యార‌వుతుంది. ఈ ఫ్రై త‌యారు చేసుకోవ‌డానికి ఐర‌న్ క‌ళాయిని ఉప‌యోగించ‌డం మంచిది. దీనిని సైడ్ డిష్ గా లేదా స్టాట‌ర్ గా తింటే చాలా రుచిగా ఉంటుంది. చికెన్ తో త‌ర‌చూ చేసే వంట‌కాల‌తో పాటు అప్పుడ‌ప్పుడూ ఇలా కూడా త‌యారు చేసుకుని తిన‌వ‌చ్చు. ఈ పెప్ప‌ర్ చికెన్ ఫ్రైను అంద‌రూ ఎంతో ఇష్టంగా తింటారు.
