Poha Fingers : పోహా ఫింగ‌ర్స్ గురించి తెలుసా.. ఎంతో రుచిగా ఉంటాయి.. ఎలా చేయాలంటే..?

Poha Fingers : మ‌నం అటుకుల‌ను ఆహారంగా తీసుకుంటూ ఉంటాం. వీటితో ర‌క‌ర‌కాల ఆహార ప‌దార్థాల‌ను త‌యారు చేసుకుని తింటూ ఉంటాం. అటుకుల‌తో చేసే ఆహార ప‌దార్థాలు చాలా రుచిగా ఉంటాయి. ఈ అటుకుల‌తో చేసుకోద‌గిన చిరుతిళ్ల‌ల్లో పోహా ఫింగ‌ర్స్ కూడా ఒక‌టి. బంగాళాదుంప‌లు వేసి చేసే ఈ స్నాక్స్ చాలా రుచిగా ఉంటాయి. వీటిని త‌యారు చేయ‌డం కూడా చాలా తేలిక‌. ఎంతో రుచిగా క‌ర‌క‌ర‌లాడుతూ ఉండే ఈ పోహ ఫింగర్స్ ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.

క్రిస్పీ పోహా ఫింగ‌ర్స్ త‌యారీకి కావ‌ల్సిన ప‌దార్థాలు..

అటుకులు – ఒక క‌ప్పు, ఉడికించిన బంగాళాదుంప‌లు – 2, చిన్న‌గా త‌రిగిన ప‌చ్చిమిర్చి – 2, మిరియాల పొడి – ఒక టీ స్పూన్, నూనె – డీప్ ఫ్రైకు స‌రిప‌డా, ఉప్పు – త‌గినంత‌, త‌రిగిన కొత్తిమీర – కొద్దిగా.

క్రిస్పీ పోహా ఫింగ‌ర్స్ త‌యారీ విధానం..

ముందుగా ఉడికించిన బంగాళాదుంప‌ల‌ను ఉండలు లేకుండా తురుముకోవాలి. త‌రువాత అటుకుల‌ను ఒక జార్ లో వేసి మెత్త‌ని పొడిలా చేసుకోవాలి. ఇప్పుడు బంగాళాదుంప తురుమును ఒక గిన్నెలోకి తీసుకోవాలి. త‌రువాత ఇందులో నూనె త‌ప్ప మిగిలిన ప‌దార్థాల‌న్నీ వేసి క‌ల‌పాలి. త‌రువాత మిక్సీ ప‌ట్టుకున్న అటుకుల పొడిని కొద్ది కొద్దిగా వేసుకుంటూ క‌లుపుకోవాలి. త‌రువాత బంగాళాదుంప మిశ్ర‌మాన్ని ఉండలుగా చేసుకోవాలి. ఇప్పుడు ఒక్కో ఉండ‌ను తీసుకుంటూ ఫింగర్స్ ఆకారంలో చేత్తో చుట్టుకోవాలి. ఇలా అన్నింటిని త‌యారు చేసుకున్న త‌రువాత క‌ళాయిలో నూనె పోసి వేడి చేయాలి.

నూనె వేడ‌య్యాక ముందుగా త‌యారు చేసుకున్న ఫింగ‌ర్స్ ను వేసి కాల్చుకోవాలి. వీటిని మ‌ధ్య‌స్థ మంట‌పై ఎర్ర‌గా అయ్యే వ‌ర‌కు కాల్చుకుని టిష్యూ ఉన్న పేప‌ర్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే పోహా ఫింగ‌ర్స్ త‌యార‌వుతాయి. వీటిని ట‌మాట కిచ‌ప్ తో క‌లిపి తింటే చాలా రుచిగా ఉంటుంది. సాయంత్రం స‌మ‌యాల్లో ఇలా అటుకుల‌తో స్నాక్స్ ను త‌యారు చేసుకుని తిన‌వ‌చ్చు. వీటిని పిల్ల‌లు మ‌రింత ఇష్టంగా తింటారు.