Poha Vada : అటుకులతో మ‌నం ర‌క‌ర‌కాల చిరుతిళ్ల‌ను త‌యారు చేస్తూ ఉంటాము. అటుకులతో చేసే చిరుతిళ్లు చాలా రుచిగా ఉంటాయి. అలాగే చాలా సుల‌భంగా, చాలా త‌క్కువ స‌మ‌యంలో ఈ చిరుతిళ్ల‌ను త‌యారు చేసుకోవ‌చ్చు. అటుకులతో చేసుకోద‌గిన చిరుతిళ్ల‌ల్లో పోహ వ‌డ‌లు కూడా ఒక‌టి. అటుకులతో చేసే ఈ వ‌డ‌లు చాలా రుచిగా ఉంటాయి. అలాగే చాలా క్రిస్పీగా ఉంటాయి. ఈ వ‌డ‌ల‌ను కేవ‌లం 20 నిమిషాల్లోనే త‌యారు చేసుకోవ‌చ్చు. అలాగే ఎవ‌రైనా చాలా తేలిక‌గా త‌యారు చేసుకోవ‌చ్చు. ఎంతో రుచిగా, క్రిస్పీగా ఉండే ఈ పోహ వ‌డ‌ల‌ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
పోహ వ‌డ త‌యారీకి కావ‌ల్సిన ప‌దార్థాలు..
లావు అటుకులు – 2 క‌ప్పులు, చిన్న‌గా తరిగిన ప‌చ్చిమిర్చి – 2, తరిగిన ఉల్లిపాయ – 1, అల్లం త‌రుగు – ఒక టీ స్పూన్, తరిగిన కరివేపాకు – ఒక రెమ్మ, ఉప్పు – త‌గినంత, శ‌న‌గ‌పిండి – 2 టీ స్పూన్స్, తరిగిన కొత్తిమీర – కొద్దిగా, బియ్యంపిండి – 2 టేబుల్ స్పూన్స్, ప‌సుపు – కొద్దిగా, జీల‌క‌ర్ర పొడి – పావు టీ స్పూన్, ధ‌నియాల పొడి -ఒక టీ స్పూన్, నూనె – డీప్ ఫ్రైకు స‌రిప‌డా.
పోహ వ‌డ త‌యారీ విధానం..
ముందుగా అటుకుల‌ను శుభ్రంగా క‌డగాలి.త‌రువాత ఇందులో త‌గినన్ని నీళ్లు పోసి 10 నిమిషాల పాటు నాన‌బెట్టాలి. త‌రువాత ఈ అటుకుల్లో ఉండే నీటిని పిండేస్తూ గిన్నెలోకి తీసుకోవాలి. త‌రువాత ఇందులో నూనె త‌ప్ప మిగిలిన ప‌దార్థాల‌న్నీ వేసి బాగా క‌ల‌పాలి. అవ‌స‌ర‌మైతే కొద్దిగా నీటిని చ‌ల్లుకుంటూ క‌లుపుకోవాలి. త‌రువాత కొద్ది కొద్దిగా పిండిని తీసుకుంటూ వ‌డ‌లాగా వ‌త్తుకుని ప్లేట్ లోకి తీసుకోవాలి. త‌రువాత క‌ళాయిలో నూనె పోసి వేడి చేయాలి. నూనె వేడ‌య్యాక వ‌డ‌ల‌ను వేసి వేయించాలి. వీటిని మ‌ధ్య‌స్థ మంట‌పై రెండు వైపులా ఎర్ర‌గా, క్రిస్పీగా అయ్యే వ‌ర‌కు కాల్చుకుని ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే పోహ‌వ‌డ‌లు త‌యార‌వుతాయి. వీటిని ట‌మాట కిచ‌ప్ లేదా వేయించిన ప‌చ్చిమిర్చితో తింటే చాలా రుచిగా ఉంటాయి. వేడి వేడిగా ఏదైనా స్నాక్స్ తినాల‌నిపించిన‌ప్పుడు ఇలా అప్ప‌టిక‌ప్పుడు అటుకులతో వ‌డ‌ల‌ను త‌యారు చేసుకుని తిన‌వ‌చ్చు. ఈ వ‌డ‌ల‌ను ఒక్క‌టి కూడా విడిచిపెట్టకుండా ఇంట్లో అంద‌రూ తింటారు.
