Potato Sandwich : మ‌నం బ్రెడ్ తో చేసే ర‌క‌ర‌కాల వంట‌కాలు త‌యారు చేస్తూ ఉంటాం. బ్రెడ్ తో సుల‌భంగా త‌యారు చేసుకోద‌గిన చిరుతిళ్ల‌ల్లో ఆలూ సాండ్ విచ్ ఒక‌టి. బ్రెడ్, బంగాళాదుంపలను క‌లిపి చేసే ఈ సాండ్ విచ్ చాలా రుచిగా ఉంటుంది. కేవ‌లం నిమిషాల వ్య‌వ‌ధిలోనే దీనిని త‌యారు చేసుకోవ‌చ్చు. ఈ సాండ్ విచ్ ను ముఖ్యంగా పిల్ల‌లు ఎంతో ఇష్టంగా తింటారు. చాలా సుల‌భంగా త‌యారు చేసుకోగ‌లిగే ఈ ఆలూ సాండ్ విచ్ ను ఎలా త‌యారు చేసుకోవాలో ఇప్పుడు తెలుసుకుందాం.
ఆలూ సాండ్ విచ్ త‌యారీకి కావ‌ల్సిన ప‌దార్థాలు..
ట‌మాట కిచ‌ప్ – ఒక టీ స్పూన్, మ‌యోనీస్ – ఒక టేబుల్ స్పూన్, బ్రెడ్ స్లైసెస్ – 2, బ‌ట‌ర్ – ఒక టేబుల్ స్పూన్.
బంగాళాదుంప మిశ్ర‌మం త‌యారీకి కావ‌ల్సిన ప‌దార్థాలు..
ఉడికించిన బంగాళాదుంప‌లు – 2, ఉల్లిపాయ తరుగు – 2 టీ స్పూన్స్, చిన్న‌గా తరిగిన ప‌చ్చిమిర్చి – 1, కొత్తిమీర తరుగు – ఒక టేబుల్ స్పూన్, ఉప్పు – త‌గినంత, జీల‌క‌ర్ర పొడి – అర టీ స్పూన్, కారం – అర టీ స్పూన్, గ‌రం మ‌సాలా – పావు టీ స్పూన్, నిమ్మ‌ర‌సం – ఒక టీ స్పూన్, చిల్లీ ప్లేక్స్ – అర టీ స్పూన్.
ఆలూ సాండ్ విచ్ త‌యారీ విధానం..
ముందుగా ఒక గిన్నెలో బంగాళాదుంపలను ఉండ‌లు లేకుండా మెత్త‌గా చేసి వేసుకోవాలి. త‌రువాత ఇందులో బంగాళాదుంప మిశ్ర‌మానికి కావ‌ల్సిన ప‌దార్థాల‌న్నీ వేసి బాగా క‌లుపుకుని ప‌క్క‌కు ఉంచాలి. ఇప్పుడు బ్రెడ్ స్లైసెస్ ను తీసుకుని ఒక బ్రెడ్ స్లైస్ కు ట‌మాట కిచ‌ప్ ను, మ‌రో బ్రెడ్ స్లైస్ కు మ‌యోనీస్ ను రాయాలి. త‌రువాత ట‌మాట కిచ‌ప్ రాసిన బ్రెడ్ స్లైస్ మీద ముందుగా త‌యారు చేసిన బంగాళాదుంప మిశ్ర‌మాన్ని ఉంచి స్ప్రెడ్ చేయాలి.
త‌రువాత దానిపై మ‌యోనీస్ రాసుకున్న బ్రెడ్ స్లైస్ ను ఉంచాలి. ఇప్పుడు క‌ళాయిలో బ‌ట‌ర్ వేసి వేడి చేయాలి. బ‌ట‌ర్ వేడ‌య్యాక త‌యారు చేసుకున్న సాండ్ విచ్ ను ఉంచి రెండు వైపులా ఎర్ర‌గా అయ్యే వ‌ర‌కు కాల్చుకుని ప్లేట్ లోకి తీసుకోవాలి. త‌రువాత సాండ్ విచ్ ను మ‌ధ్య‌లోకి క‌ట్ చేసుకుని స‌ర్వ్ చేసుకోవాలి. దీనిని ట‌మాట కిచ‌ప్, మ‌యోనీస్ తో క‌లిపి తింటే చాలా రుచిగా ఉంటుంది. అల్పాహారంగా లేదా స్నాక్స్ గా ఇలా ఆలూ సాండ్ విచ్ ను త‌యారు చేసుకుని తిన‌వ‌చ్చు. దీనిని అంద‌రూ ఎంతో ఇష్టంగా తింటారు.
