Sweet Red Chutney : మ‌నం ఉద‌యం పూట అల్పాహారాల‌ను తిన‌డానికి ప‌ల్లీ చ‌ట్నీ, కొబ్బ‌రి చ‌ట్నీ, ట‌మాట చ‌ట్నీ ఇలా ర‌క‌ర‌కాల చ‌ట్నీల‌ను తయారు చేస్తూ ఉంటాము. చ‌ట్నీతో తింటేనే ఏ అల్పాహారాలైనా రుచిగా ఉంటాయి. మ‌నం ఎప్పుడూ చేసే ఈ చ‌ట్నీల‌ను తిని తిని బోర్ కొట్టిన వారు కింద చెప్పిన విధంగా రుచిక‌ర‌మైన రెడ్ చ‌ట్నీని తయారు చేసుకుని తిన‌వ‌చ్చు. ఎండు మిర‌ప‌కాయ‌ల‌తో చేసే ఈ చ‌ట్నీ చాలా రుచిగా ఉంటుంది. దీనిని తయారు చేయ‌డానికి ఎక్కువ‌గా స‌మ‌యం కూడా ప‌ట్టదు. ఇడ్లీ, దోశ ఇలా దేనితోనైనా ఈ చ‌ట్నీని తిన‌వ‌చ్చు. ఎంతో రుచిగా ఉండే ఈ రెడ్ చ‌ట్నీని ఎలా తయారు చేసుకోవాలో ఇప్పుడు తెలుసుకుందాం.
రెడ్ చ‌ట్నీ త‌యారీకి కావ‌ల్సిన ప‌దార్థాలు..
బెల్లం -ఒక చిన్న ముక్క, ఉప్పు – త‌గినంత, నూనె – ఒక టేబుల్ స్పూన్, ఎండుమిర్చి – 6, చింత‌పండు – చిన్న నిమ్మ‌కాయంత, వెల్లుల్లి రెబ్బ‌లు – 4, ఆవాలు – అర టీ స్పూన్, జీల‌క‌ర్ర – అర టీ స్పూన్, మెంతులు – పావు టీ స్పూన్, ధ‌నియాలు – 4 టీ స్పూన్, త‌రిగిన ఉల్లిపాయ – 1, క‌రివేపాకు -ఒక రెమ్మ.
రెడ్ చ‌ట్నీ త‌యారీ విధానం..
ముందుగా క‌ళాయిలో నూనె వేసి వేడి చేయాలి. త‌రువాత ఎండుమిర్చి,జీల‌క‌ర్ర, ఆవాలు, మెంతులు, ధ‌నియాలు వేసి వేయించాలి. వీటిని దోర‌గా వేయించిన త‌రువాత క‌రివేపాకు వేసి క‌లపాలి. త‌రువాత కొద్దిగా చింత‌పండు, పావు గ్లాస్ నీళ్లు పోసి 10 నిమిషాల పాటు అలాగే ఉంచాలి. త‌రువాత వీటిని నీటితో స‌హా ఒక జార్ లోకి తీసుకోవాలి. త‌రువాత ఇందులో మిగిలిన ప‌దార్థాల‌న్ని వేసి మెత్త‌గా మిక్సీ ప‌ట్టుకోవాలి. ఈ చ‌ట్నీని గిన్నెలోకి తీసుకుని నేరుగా స‌ర్వ్ చేసుకోవ‌చ్చు లేదా తాళింపు వేసుకుని స‌ర్వ్ చేసుకోవ‌చ్చు. ఈ విధంగా చేయ‌డం వ‌ల్ల ఎంతో రుచిగా ఉండే రెడ్ చ‌ట్నీ త‌యారవుతుంది. దీనిని ఉద‌యం చేసుకునే ఏ అల్పాహారంతో తిన్నా కూడా చాలా రుచిగా ఉంటుంది. త‌ర‌చూ చేసే ప‌ల్లీ చ‌ట్నీ, కొబ్బ‌రి చ‌ట్నీతో పాటు ఇలా రెడ్ చ‌ట్నీని కూడా తయారు చేసుకుని తిన‌వ‌చ్చు.
