Tomato Gravy Curry : ట‌మాట గ్రేవీ క‌ర్రీ.. టమాటాలతో చేసే ఈ కూర చాలా రుచిగా ఉంటుంది. దేనితో తిన్నా కూడా ఈ కూర చాలా చ‌క్క‌గా ఉంటుంది. ఇంట్లో కూర‌గాయ‌లు లేన‌ప్పుడు టమాటాలతో అప్ప‌టిక‌ప్పుడు ఈ కూర‌ను తయారు చేసుకోవ‌చ్చు. దీనిని తయారు చేయ‌డం చాలా సుల‌భం. త‌రుచూ చేసే ట‌మాట కూర‌ల కంటే ఈ కూర మ‌రింత రుచిగా ఉంటుంది. ఒక్కసారి ఈ కూర‌ను రుచి చూస్తే చాలు మ‌ళ్లీ ఇదే కావాలంటారు. తిన్నా కొద్ది తినాల‌నిపించేంత రుచిగా ఉండే ఈ ట‌మాట గ్రేవీ కూర‌ను ఎలా తయారు చేసుకోవాలో ఇప్పుడు తెలుసుకుందాం.
ట‌మాట గ్రేవీ క‌ర్రీ త‌యారీకి కావ‌ల్సిన ప‌దార్థాలు..
ప‌ల్లీలు – పావు క‌ప్పు, ఎండు కొబ్బ‌రి ముక్క‌లు – ఒక టేబుల్ స్పూన్, ధనియాలు – 2 టీ స్పూన్స్, దాల్చిన చెక్క – ఒక ఇంచు ముక్క, ల‌వంగాలు – 4, యాల‌కులు – 2, నువ్వులు – 2 టీ స్పూన్స్, జీల‌క‌ర్ర – అర టీ స్పూన్, క‌సూరి మెంతి -ఒక టీ స్పూన్, నూనె – 5 టీ స్పూన్స్, స‌న్న‌గా త‌రిగిన ఉల్లిపాయ – 1, ప‌చ్చిమిర్చి – 2, ఆవాలు – అర టీ స్పూన్, అల్లం వెల్లుల్లి పేస్ట్ – ఒక టీ స్పూన్, క‌రివేపాకు – ఒక రెమ్మ, ఉప్పు – త‌గినంత, ప‌సుపు – పావు టీ స్పూన్, కారం – 2 టీ స్పూన్స్, నాన‌బెట్టిన చింతపండు – చిన్న నిమ్మ‌కాయంత, నీళ్లు – త‌గినంత, బెల్లం – ఒక చిన్న ముక్క, త‌రిగిన ప‌చ్చిమిర్చి – 2, పండిన టమాటాలు – 4, త‌రిగిన కొత్తిమీర – కొద్దిగా.
ట‌మాట గ్రేవీ క‌ర్రీ త‌యారీ విధానం..
ముందుగా క‌ళాయిలో ప‌ల్లీలు, ఎండు కొబ్బ‌రి ముక్క‌లు వేసి వేయించాలి. త‌రువాత ధనియాలు, దాల్చిన చెక్క, ల‌వంగాలు, యాల‌కులు, నువ్వులు,జీల‌క‌ర్ర వేసి వేయించాలి. ఇవి వేగిన త‌రువాత క‌సూరిమెంతి వేసి కలపాలి. త‌రువాత వీటిని గిన్నెలోకి తీసుకుని ప‌క్కకు ఉంచాలి. త‌రువాత అదే క‌ళాయిలో నూనె వేసి వేడి చేయాలి. నూనె వేడ‌య్యాక ఉల్లిపాయ ముక్క‌లు వేసి వేయించాలి. వీటిని ఎర్ర‌గా అయ్యే వ‌ర‌కు వేయించిన త‌రువాత గిన్నెలోకి తీసుకోవాలి. ఇప్పుడు జార్ లో ముందుగా వేయించిన దినుసులు వేసి మెత్త‌ని పొడిలా చేసుకోవాలి. త‌రువాత ఇందులోనే వేయించిన ఉల్లిపాయ ముక్క‌లు, ప‌చ్చిమిర్చి, త‌గిన‌న్ని నీళ్లు పోసి మెత్త‌ని పేస్ట్ లాగా చేసుకోవాలి. త‌రువాత అదే క‌ళాయిలో ఆవాలు, అల్లం వెల్లుల్లి పేస్ట్, క‌రివేపాకు వేసి వేయించాలి. త‌రువాత మిక్సీ ప‌ట్టుకున్న పేస్ట్ వేసి కలపాలి.
దీనిని క‌లుపుతూ నూనె పైకి తేలే వ‌ర‌కు వేయించిన త‌రువాత ఉప్పు, కారం, ప‌సుపు వేసి కలపాలి. దీనిని ఒక నిమిషం పాటు వేయించిన త‌రువాత చింతపండు ర‌సం, నీళ్లు, బెల్లం ముక్క వేసి కలపాలి. త‌రువాత ప‌చ్చిమిర్చిని వేసుకోవాలి. ఇప్పుడు ట‌మాటాల‌పై ఉండే తొడిమ‌ను తీసేసి ట‌మాట లోపలికి మ‌సాలా వెళ్లేలా ట‌మాట ఫైభాగంలో ఫోర్క్ తో గుజ్జు బ‌య‌ట‌కు వ‌చ్చేలా గాట్లు పెట్టుకోవాలి. త‌రువాత ఈ ట‌మాటాల‌ను కూర‌లో వేసి మూత పెట్టి ఉడికించాలి. వీటిని 4 నిమిషాల పాటు ఉడికించిన త‌రువాత ట‌మాటాల‌ను మ‌రో వైపుకు తిప్పుకోవాలి. ఇప్పుడు మర‌లా మూత పెట్టి టమాటాలు మెత్త‌గా అయ్యి నూనె పైకి తేలే వ‌ర‌కు ఉడికించాలి. త‌రువాత కొత్తిమీర‌ను చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ట‌మాట గ్రేవీ క‌ర్రీ త‌యార‌వుతుంది. దీనిని అన్నం, చ‌పాతీ, రోటీ, పులావ్, బిర్యానీ వంటి వాటితో తింటే చాలా రుచిగా ఉంటుంది.
