Tomato Kobbari Kurma : టమాట కొబ్బ‌రి కుర్మా.. ట‌మాటాలు, కొబ్బ‌రి పాలు క‌లిపి చేసే ఈ కుర్మా చాలా రుచిగా ఉంటుంది. చ‌పాతీ, అన్నం, రోటీ, అట్టు, దోశ వంటి వాటితో తిన‌డానికి ఇది చాలా చ‌క్క‌గా ఉంటుంది. దీనిని త‌యారు చేయ‌డం కూడా చాలా సుల‌భం. ట‌మాటాల‌తో త‌రుచూ ఒకేర‌కం వంట‌కాలు కాకుండా ఇలా వెరైటీగా కూడా త‌యారు చేసి తీసుకోవ‌చ్చు. ఈ క‌ర్రీని ఒక్క‌సారి రుచిచూస్తే చాలు మళ్లీ మళ్లీ ఇదే కావాలంటారు. క‌మ్మ‌గా, రుచిగా ఉండ‌డంతో పాటు ఎందులోకైనా తిన‌డానికి చ‌క్క‌గా ఉండే టమాట కొబ్బ‌రి కుర్మాను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
టమాట కొబ్బ‌రి కుర్మా త‌యారీకి కావ‌ల్సిన ప‌దార్థాలు..
నూనె – 3 టేబుల్ స్పూన్స్, బిర్యానీ ఆకు – 1, దాల్చిన చెక్క – ఒక ఇంచు ముక్క, యాల‌కులు – 3, సోంపు – ఒక టీ స్పూన్, త‌రిగిన ప‌చ్చిమిర్చి – 2, త‌రిగిన ఉల్లిపాయ – 1, క‌రివేపాకు – ఒక రెమ్మ, నాటు ట‌మాటాలు – 3, త‌రిగిన ట‌మాటాలు – పావుకిలో, ప‌సుపు – అర టీ స్పూన్, ఉప్పు – త‌గినంత, కారం – ఒక టేబుల్ స్పూన్, ధ‌నియాల పొడి – ఒక టీ స్పూన్, జీల‌క‌ర్ర పొడి – ఒక టీ స్పూన్, నీళ్లు – 200 ఎమ్ ఎల్, గ‌రం మ‌సాలా – అర టీ స్పూన్, చిక్క‌టి కొబ్బ‌రి పాలు – ముప్పావు క‌ప్పు, త‌రిగిన కొత్తిమీర – కొద్దిగా.
టమాట కొబ్బ‌రి కుర్మా త‌యారీ విధానం..
ముందుగా క‌ళాయిలో నూనె వేసి వేడి చేయాలి. త‌రువాత దాల్చిన చెక్క, యాల‌కులు,సోంపు గింజ‌లు వేసి వేయించాలి. త‌రువాత ప‌చ్చిమిర్చి, ఉల్లిపాయ ముక్క‌లు, క‌రివేపాకు వేసి వేయించాలి.ఉల్లిపాయ ముక్క‌లు వేగిన త‌రువాత ట‌మాటాల‌ను పేస్ట్ లాగా చేసి వేసుకోవాలి. దీనిని నూనె పైకి తేలే వరకు వేయించిన త‌రువాత టమాట ముక్క‌లు వేసి మూత పెట్టి మెత్త‌బ‌డే వరకు ఉడికించాలి. టమాట ముక్క‌లు మెత్త‌బ‌డిన త‌రువాత ప‌సుపు, ఉప్పు, కారం, ధ‌నియాల పొడి, జీల‌క‌ర్ర పొడి వేసి క‌ల‌పాలి. త‌రువాత నీళ్లు పోసి క‌ల‌పాలి. దీనిపై మూత పెట్టి మ‌ధ్య మ‌ధ్య‌లో క‌లుపుతూ ఉడికించాలి. దీనిని 10 నిమిషాల పాటు ఉడికించిన త‌రువాత కొబ్బ‌రి పాలు, గ‌రం మ‌సాలా వేసి క‌ల‌పాలి. త‌రువాత మూత పెట్టి మ‌రో 10 నిమిషాల పాటు ఉడికించాలి. త‌రువాత కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే టమాట కొబ్బ‌రి కుర్మా త‌యార‌వుతుంది. ఈ క‌ర్రీ చాలా రుచిగా ఉంటుంది. దీనిని అంద‌రూ ఎంతో ఇష్టంగా తింటారు.
