Veg Kathi Rolls : వెజ్ ఖాటీ రోల్.. మ‌న‌కు బ‌య‌ట ల‌భించే చిరుతిళ్ల‌ల్లో ఇది కూడా ఒక‌టి. స్నాక్స్ గా తీసుకోవ‌డానికి, లంచ్ బాక్స్ లోకి ఈ రోల్ చాలా చ‌క్క‌గా ఉంటుంద‌ని చెప్ప‌వ‌చ్చు. పిల్ల‌లు కూడా ఈ రోల్ ను ఎంతో ఇష్టంగా తింటారు. ఈ రోల్ ను మ‌నం ఇంట్లో కూడా చాలా సుల‌భంగా త‌యారు చేసుకోవ‌చ్చు. దీనిని త‌యారు చేయ‌డం చాలాతేలిక. మొద‌టిసారి చేసే వారు ఈ రోల్ ను ప‌ర్ఫెక్ట్ గా త‌యారు చేసుకోవ‌చ్చు. అంద‌రూ ఎంతో ఇష్టంగా తినే ఈ వెజ్ ఖాటీ రోల్ ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
వెజ్ ఖాటీ రోల్ త‌యారీకి కావ‌ల్సిన ప‌దార్థాలు..
గోధుమ‌పిండి – అర క‌ప్పు, మైదాపిండి – అర క‌ప్పు, ఉప్పు – కొద్దిగా, నూనె – ఒక టేబుల్ స్పూన్, స‌న్న‌గా త‌రిగిన ఉల్లిపాయ – 1, స‌న్న‌గా త‌రిగిన ట‌మాటాలు – 2, క్యాబేజి త‌రుగు – అర క‌ప్పు, గ‌రం మ‌సాలా – పావు టీ స్పూన్, కారం – ముప్పావు టీ స్పూన్, ధ‌నియాల పొడి – అర టీ స్పూన్, ట‌మాట కిచ‌ప్ – 2 టేబుల్ స్పూన్స్, త‌రిగిన క్యాప్సికం – చిన్న‌ది ఒక‌టి, ప‌నీర్ – 75 గ్రా.
పుదీనా చ‌ట్నీ త‌యారీకి కావ‌ల్సిన ప‌దార్థాలు..
పుదీనా – ఒక పెద్ద క‌ట్ట, పెరుగు – 3 టేబుల్ స్పూన్స్, త‌రిగిన కొత్తిమీర – ఒక పెద్ద క‌ట్ట, ప‌చ్చిమిర్చి – 4, జీల‌క‌ర్ర – అర టీ స్పూన్, ఉప్పు – త‌గినంత.
వెజ్ ఖాటీ రోల్ త‌యారీ విధానం..
ముందుగా ఒక గిన్నెలో గోధుమ‌పిండి, మైదాపిండి, ఉప్పు, నూనె వేసి క‌ల‌పాలి. త‌రువాత తగినన్ని నీళ్లు పోసుకుంటూ చ‌పాతీ పిండి కంటే మెత్త‌గా క‌లుపుకోవాలి. త‌రువాత దీనిపై మూత పెట్టి ప‌క్క‌కు ఉంచాలి. ఇప్పుడు క‌ళాయిలో రెండు టేబుల్ స్పూన్ల నూనె వేసి వేడి చేయాలి. నూనె వేడ‌య్యాక ఉల్లిపాయ ముక్క‌లు వేసి వేయించాలి. ఇవి మెత్త‌బ‌డిన త‌రువాత ట‌మాట ముక్క‌లు వేసి వేయించాలి. ఇవి కొద్దిగా మెత్త‌బ‌డిన త‌రువాత క్యాబేజి తురుము వేసి ప‌చ్చి వాస‌న పోయే వ‌ర‌కు వేయించాలి. త‌రువాత గ‌రం మ‌సాలా, ఉప్పు, కారం, ధ‌నియాల పొడి వేసి క‌ల‌పాలి. వీటిని ఒక నిమిషం పాటు వేయించిన త‌రువాత ట‌మాట కిచ‌ప్, క్యాప్సికం వేసి క‌ల‌పాలి. క్యాప్సికం మెత్త‌బ‌డిన త‌రువాత ప‌నీర్ ను పొడి పొడిగా చేసుకుని వేసుకోవాలి. దీనిని మ‌రో రెండు నిమిషాల పాటు వేయించి స్ట‌వ్ ఆఫ్ చేసి చ‌ల్లారనివ్వాలి.
ఇప్పుడు పుదీనా చ‌ట్నీ కోసం జార్ లో త‌యారీకి కావ‌ల్సిన ప‌దార్థాల‌న్నీ వేసి తగినన్ని నీళ్లు పోసి మెత్త‌ని పేస్ట్ లాగా చేసుకోవాలి. త‌రువాత ముందుగా క‌లిపి పెట్టిన పిండిని ఉండలుగా చేసుకోవాలి. త‌రువాత ఒక్కో ఉండ‌ను తీసుకుంటూ పిండి చ‌ల్లుకుంటూ చ‌పాతీలా వ‌త్తుకోవాలి. త‌రువాత దీనిని వేడి వేడి పెనం మీద వేసి నూనె వేయ‌కుండా రెండు వైపులా చ‌క్క‌గా కాల్చుకుని ప్లేట్ లోకి తీసుకోవాలి. ఇలా అన్నింటిని త‌యారు చేసుకున్న త‌రువాత ఒక్కో చ‌పాతీని తీసుకుంటూ ముందుగా దానిపై గ్రీన్ చ‌ట్నీని రాసుకోవాలి. త‌రువాత 3 టేబుల్ స్పూన్ల ప‌నీర్ మిశ్ర‌మాన్ని వేసి గ‌ట్టిగా రోల్ చేసుకుని మ‌ధ్య‌లోకి క‌ట్ చేసి స‌ర్వ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే వెజ్ ఖాటీ రోల్స్ త‌యార‌వుతాయి. వీటిని అంద‌రూ ఎంతో ఇష్టంగా తింటార‌ని చెప్ప‌వ‌చ్చు.
