కట్టెల పొయ్యి ఒకసారి బాగా రాజుకుందంటే భగభగ మంటలు వస్తూ వంట త్వరగానే అయిపోతుంది. అయితే మధ్య మధ్యలో పొయ్యిగొట్టంతో ఊదుతూ మంట ఆరిపోకుండా చూస్తుండాలి. అలాగే కర్రలు పొయ్యి లోపలికి తోస్తుండాలి. పొగ వెలుపలికి పోవడానికి తగిన ఏర్పాట్లు ఉండాలి. పొయ్యి మీద వండిన వంటలకు కొద్దిగా పొగ వాసన ఉంటుంది. ఈ రోజుల్లో ఆ స్మోకీ టేస్ట్ కోసం వండిన వంటకం మధ్యలో చిన్న గిన్నెలో మండుతున్న కర్రముక్క ఉంచుతారు. అన్నం వంటివి పొయ్యి మీదవండుతుంటే ఆ ఎర్రని పచ్చని మంటల మధ్య ఉడుకుతున్న వంటకాలకు రుచి ఎక్కువయినట్లని అనిపిస్తుంది. అసలు కొన్ని వంటకాలు కుంపటి మీద చేస్తే రుచిగా ఉంటాయి. కుంపటి మీద వండిన వంటకం నెమ్మదిగా ఉడికి, వేగడం వల్ల వేపుడు కూరలు చాలా బాగా వేగి రుచిగా ఉంటాయి.
వంకాయలు పచ్చడి కోసం కాల్చడానికి, మొక్కజొన్నలు కాల్చడానికి కూడా బొగ్గుల కుంపటి బాగా పనికివస్తుంది. అలాగే మినపరొట్టె (దిబ్బరొట్టె) చేయడానికి బొగ్గుల కుంపటి వాడేవారు. దీనిమీద మెల్లిగా చక్కగా అవుతుంది. గాస్ స్టవ్ మీద వంట సులభంగా, పొగ లేకుండా అవుతుంది. సిమ్ లో పెట్టి చేస్తే వేపుడు కూరలు, అలాగే పరాఠాలు, సూఖా రొట్టెలకి మంట ఎక్కువ, తక్కువ చేస్తూ చేయడానికి అనుకూలంగా ఉంటుంది.
పుల్కాలు, వంకాయలు మొదలయినవి నేరుగా మంటలో పెట్టి కాల్చవచ్చు. గాస్ స్టవ్ మీద వండినపుడు , కొంచెంసేపు హై లో ఉంచి, తగినంత వేడెక్కాక మంట తగ్గించి సిమ్ లో పెట్టి వండితే రుచిగా తయారవుతుంది వంటకం. ఈరోజుల్లో క్రొత్త మోడల్ కట్టెల పొయ్యి లు, కుంపటులు అమ్ముతున్నారు. సరదాగా, కొన్ని ప్రత్యేకమైన వంటలు, స్ట్రీట్ ఫుడ్ వాళ్ళు వాడుతున్నారు.
