Spinach Rice : పాలకూరలో ఎన్నో పోషకాలు ఉంటాయన్న సంగతి తెలిసిందే. మన శరీరానికి కావల్సిన దాదాపు అన్ని పోషకాలు పాలకూరలో ఉంటాయి. కనుక పాలకూరను ఆహారంలో భాగం చేసుకోవాలని వైద్యులు చెబుతుంటారు. అయితే దీన్ని రోజూ భిన్న రకాలుగా వండుకుని తినవచ్చు. వాటిల్లో పాలకూర రైస్ ఒకటి. పాలకూర అంటే ఇష్టపడని వారు కూడా దీన్ని ఇలా రైస్‌లా తయారు చేసుకుని తినవచ్చు. దీంతో రుచికి రుచి.. ఆరోగ్యానికి ఆరోగ్యం.. రెండూ లభిస్తాయి. ఇక పాలకూర రైస్‌ను ఎలా తయారు చేయాలో ఇప్పుడు తెలుసుకుందాం.
పాలకూర రైస్ తయారీకి కావల్సిన పదార్థాలు..
బాస్మతి బియ్యం లేదా సాధారణ బియ్యం – రెండు కప్పులు, పాలకూర రసం లేదా ఉడికించిన పాలకూర – రెండు కప్పులు, కొబ్బరిపాలు – ఒక కప్పు, నీళ్లు – ఒక కప్పు, పచ్చిమిర్చి – ఆరు, క్యారెట్‌ – ఒకటి (పెద్దది), పచ్చి బఠానీలు – అర కప్పు (నానబెట్టినవి), యాలకులు – రెండు, అల్లం ముద్ద – అర టీస్పూన్‌, పాల మీగడ – ఒక టీస్పూన్‌, కరివేపాకు – నాలుగు రెబ్బలు, కొత్తిమీర, పుదీనా – కొద్దిగా.
పాలకూర రైస్ తయారు చేసే విధానం..
నానబెట్టిన బఠానీలను ఉడికించుకోవాలి. తాజాగా దొరికితే వాటినే వాడొచ్చు. ఇప్పుడు పొయ్యిపై పాత్ర పెట్టి మీగడ వేసి యాలకులు, కరివేపాకు, పచ్చిమిర్చి, అల్లం ముద్ద వేసి వేయించాలి. తరువాత పాలకూర రసం, కొబ్బరిపాలు, నీళ్లు, క్యారెట్‌ ముక్కలు, ఉడికించిన బఠానీ, కొత్తిమీర, పుదీనా ఒక దాని తరువాత ఒకటి వేయాలి. రసం మరుగుతున్నప్పుడు కడిగిన బియ్యం వేసి కలిపి సన్నని మంటపై ఉంచి ఉడకనివ్వాలి. అన్నం పూర్తిగా తయారయ్యాక దింపే ముందు మరికాస్త కొత్తిమీర, పుదీనా వేస్తే సరిపోతుంది. దీన్ని కుక్కర్‌లో కూడా ఉడికించుకోవచ్చు. అయితే ఒక కూత రాగానే సిమ్‌లో ఉంచి ఆ తరువాత ఆఫ్ చేయాలి. ఉప్పు, నూనె, మసాలా లేకుండా పోషకాలతోపాటు రుచినందించే ఆరోగ్యకరమైన రైస్ ఇది. నూనె ఉండదు కాబట్టి త్వరగా జీర్ణమవుతుంది. పిల్లలు, వృద్ధులు కూడా తినవచ్చు. పాలకూరలో సహజ ఉప్పు ఉంటుంది కాబట్టి రుచిలోనూ ఆ తేడా తెలియదు. పాలకూరను ఇలా రైస్‌తో కలిపి వండి తింటే అందులో ఉండే పోషకాలన్నీ లభిస్తాయి. దీంతో రుచి.. ఆరోగ్యం రెండూ మీ సొంతమవుతాయి.
