సినీ పరిశ్రమలో కళాకారులు ఎప్పటికప్పుడు తమని తాము నిరూపించుకుంటూ ఉండాల్సిన అవసరం ఉంటుంది. ఇక హీరోలు కథ, కథనాలకు అనుగుణంగా ద్విపాత్రాభినయం చేసి అలరించడం అనేది కామన్. వెండితెరపై తమ అభిమాన హీరోలు ఒక పాత్రలో కనిపిస్తేనే అభిమానులు ఉత్సాహంతో ఈలలు, కేకలు వేస్తారు. అలాంటిది వారి అభిమాన హీరోలు ద్విపాత్రాభినయం, లేదా త్రిపాత్రాభినయం చేస్తే.. ఇక అభిమానుల ఆనందానికి అవధులు ఉండవు. తెలుగు చలనచిత్ర పరిశ్రమలో ఇటువంటి ప్రయోగాలకు తొలి తరం నటులే శ్రీకారం చుట్టారు. అప్పటి ఎన్టీఆర్ నుండి ఇప్పటి ఆయన మనవడు నందమూరి కళ్యాణ్ రామ్ వరకు ట్రిపుల్ రోల్ చేసిన ఆ కథానాయకులు ఎవరో ఇప్పుడు తెలుసుకుందాం.
విశ్వవిఖ్యాత నటసార్వభౌమ నందమూరి తారక రామారావు త్రిపాత్రాభినయానికి పర్యాయపదం. టాలీవుడ్ చరిత్రలో మొదటిసారి ట్రిపుల్ రోల్ చేసిన ఏకైక కథానాయకుడు కూడా ఎన్టీఆరే. కులగౌరవం, శ్రీకృష్ణసత్య, శ్రీమద్విరాట పర్వం, దానవీరశూరకర్ణ, శ్రీమద్విరాట వీరబ్రహ్మేంద్ర చరిత్ర, వంటి చిత్రాలలో మూడు, అంతకంటే ఎక్కువ పాత్రలు పోషించి ఆకట్టుకున్నారు. తెలుగు సినిమా హిస్టరీ లోనే ఎక్కువసార్లు ట్రిపుల్ రోల్ చేసి సరికొత్త రికార్డును సృష్టించారు నటశేఖర, సూపర్ స్టార్ కృష్ణ. కుమార రాజా, పగబట్టిన సింహం, రక్తసంబంధం, బంగారు కాపురం, బొబ్బిలి దొర, డాక్టర్ సినీ యాక్టర్, సిరిపురం మొనగాడు వంటి ఏడు చిత్రాలలో మూడు పాత్రలు పోషించారు. నట సామ్రాట్ అక్కినేని నాగేశ్వరరావు టి రామారావు దర్శకత్వం వహించిన నవరాత్రి అనే సినిమాలో ఏకంగా తొమ్మిది క్యారెక్టర్లు చేయడం విశేషం.
అలనాటి అందాల హీరో శోభన్ బాబు కూడా 1983లో ముగ్గురు మొనగాళ్లు అనే చిత్రంలో మొట్టమొదటిసారిగా ట్రిపుల్ రోల్ లో నటించారు. ముగ్గురు మొనగాళ్లు, లారీ డ్రైవర్, పోలీస్ ఆఫీసర్, క్లాసికల్ డాన్సర్ ఇలా ముచ్చటగా మూడు డిఫరెంట్ క్యారెక్టర్లు చేసి మెప్పించారు. నటసింహా నందమూరి బాలకృష్ణ అధినాయకుడు చిత్రంలో మొదటిసారి ట్రిపుల్ లో నటించారు. జై లవకుశ చిత్రంలో వైవిధ్యభరితమైన మూడు పాత్రలలో నటించి తన నటనతో పాత్రలకు ప్రాణం పోశాడు యంగ్ టైగర్ ఎన్టీఆర్. అమిగోస్ మూవీ లో మూడు సరికొత్త గెటప్స్, డిఫరెంట్ క్యారెక్టర్లలో కనిపించి కళ్యాణ్ రామ్ కూడా మూడు పాత్రలు పోషించాడు. కొబ్బరి మట్ట చిత్రంలో మూడు పాత్రలలో నటించిన సంపూర్ణేష్ బాబు ఈ జనరేషన్ లో ఎన్టీఆర్ తర్వాత త్రిపాత్రాభినయం చేసిన హీరోగా రికార్డులకెక్కాడు.
