Wheat Flour Chips : గోధుమ‌పిండితో మ‌నం చ‌పాతీ, రోటీ, పుల్కా వంటి వాటిని త‌యారు చేస్తూ ఉంటాము. వీటితో పాటు వివిధ ర‌కాల చిరుతిళ్ల‌ను కూడా త‌యారు చేస్తూ ఉంటాము. వాటిలో గోధుమపిండి చిప్స్ కూడా ఒక‌టి. గోధుమ‌పిండితో చేసే ఈ చిప్స్ క‌ర‌క‌రలాడుతూ చాలా రుచిగా ఉంటాయి. టీ టైం స్నాక్స్ గా తిన‌డానికి ఇవి చాలా చ‌క్క‌గా ఉంటాయి. అలాగే పిల్ల‌ల‌కు బాక్స్ లో స్నాక్స్ గా కూడా వీటిని పెట్ట‌వ‌చ్చు. తిన్నా కొద్ది తినాల‌నిపించేంత రుచిగా ఉండే ఈ గోధుమపిండి చిప్స్ ను ఎలా త‌యారు చేసుకోవాలో ఇప్పుడు తెలుసుకుందాం.
గోధుమపిండి చిప్స్ త‌యారీకి కావ‌ల్సిన ప‌దార్థాలు..
గోధుమపిండి – ఒక క‌ప్పు, బొంబాయి ర‌వ్వ – అర క‌ప్పు, మైదాపిండి – ఒక క‌ప్పు, ఉప్పు -త‌గినంత, కారం – ఒక టీ స్పూన్, వంట‌సోడా – పావు టీ స్పూన్, వాము -ఒక టీ స్పూన్, నెయ్యి లేదా బ‌ట‌ర్ – అర టేబుల్ స్పూన్, నూనె – డీప్ ప్రైకు స‌రిప‌డా.
గోధుమపిండి చిప్స్ త‌యారీ విధానం..
ముందుగా ఒక గిన్నెలో గోధుమ‌పిండిని తీసుకోవాలి. తరువాత మిగిలిన ప‌దార్థాల‌ను ఒక్కొక్క‌టిగా వేసి క‌ల‌పాలి. తరువాత నెయ్యి లేదా బ‌ట‌ర్ వేసి క‌లుపుకోవాలి. తరువాత కొద్ది కొద్దిగా నీళ్లు పోసుకుంటూ చ‌పాతీ పిండి కంటే గ‌ట్టిగా పిండిని క‌లుపుకోవాలి. తరువాత దీనిపై మూత పెట్టి పిండిని 10 నిమిషాల పాటు నాన‌బెట్టాలి. పిండి చ‌క్క‌గా నానిన తరువాత ఉండ‌లుగా చేసుకోవాలి. తరువాత ఒక్కో ఉండ‌ను తీసుకుంటూ పొడి పిండిని చ‌ల్లుకుంటూ ప‌లుచ‌గా చ‌పాతీలా వ‌త్తుకోవాలి. తరువాత క‌త్తితో డైమండ్ ఆకారంలో లేదా మ‌న‌కు న‌చ్చిన ఆకారంలో క‌ట్ చేసుకోవాలి.
ఇలా అన్నింటిని త‌యారు చేసుకున్న తరువాత క‌ళాయిలో నూనె పోసి వేడి చేయాలి. నూనె వేడ‌య్యాక క‌ట్ చేసుకున్న చిప్స్ ను వేసి వేయించాలి. వీటిని మ‌ధ్య‌స్థ మంట‌పై రెండు వైపులా ఎర్ర‌గా అయ్యే వ‌ర‌కు వేయించి ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే గోధుమపిండి చిప్స్ త‌యార‌వుతాయి. వీటిని గాలి త‌గ‌ల‌కుండా నిల్వ చేసుకోవ‌డం వ‌ల్ల 20 రోజుల పాటు తాజాగా ఉంటాయి. పిల్ల‌లు వీటిని ఎంతో ఇష్టంగా తింటారు.
