Coffee : రోజూ ఉదయాన్నే బెడ్‌ మీదే కాఫీ తాగే అలవాటు చాలా మందికి ఉంటుంది. బెడ్‌ కాఫీ తాగనిదే కొందరు రోజును ప్రారంభించరు. ఇక కొందరు ఉదయం బ్రేక్ ఫాస్ట్‌ అనంతరం, ఇంకొందరు రోజు మొత్తం కాఫీలను తాగుతుంటారు. చలికాలంలో వేడి వేడి కాఫీ గొంతులో పడుతుంటే వచ్చే మజాయే వేరు. కొందరు టీ తాగరు.. కానీ.. కాఫీ అంటే మాత్రం పడి చచ్చిపోతారు. అయితే రోజూ కాఫీ తాగడం వల్ల ఏమైనా ప్రయోజనాలు ఉంటాయా ? అసలు కాఫీ తాగడం మన ఆరోగ్యానికి మంచిదేనా ? అంటే..
కాఫీ తాగడం వల్ల మనకు అనేక ప్రయోజనాలు కలుగుతాయి. కాఫీలో ఉండే కెఫీన్‌ మనకు ప్రయోజనాలను అందిస్తుంది. ఇది మెదడును చురుగ్గా మారుస్తుంది. దీంతో యాక్టివ్‌గా ఉంటారు. ఉత్సాహంగా పనిచేస్తారు. ఒత్తిడి, ఆందోళన పోతాయి. డిప్రెషన్‌ తగ్గుతుంది. మానసిక ప్రశాంతత లభిస్తుంది. రోజూ ఒత్తిడికి గురయ్యేవారు కాఫీ తాగితే ఎంతో మేలు చేస్తుంది.
కాఫీని తాగడం వల్ల శరీర మెటబాలిజం మెరుగు పడుతుంది. దీంతో క్యాలరీలు వేగంగా ఖర్చవుతాయి. శరీరంలో కొవ్వు కరుగుతుంది. ఫలితంగా అధిక బరువు తగ్గుతారు. అందువల్ల కాఫీ బరువు తగ్గేందుకు మేలు చేస్తుంది.
టైప్‌ 2 డయాబెటిస్‌ ఉన్నవారు కాఫీ తాగడం వల్ల షుగర్‌ లెవల్స్‌ తగ్గుతాయి. డయాబెటిస్‌ అదుపులో ఉంటుంది. దీన్ని సైంటిస్టులు ప్రయోగాత్మకంగా నిరూపించారు కూడా.
వయస్సు మీద పడడం వల్ల ఎవరికైనా సరే సహజంగానే మతిమరుపు వస్తుంది. వృద్ధులు కొందరికి తీవ్రమైన అల్జీమర్స్‌ వస్తుంది. అయితే కాఫీ తాగుతుంటే ఆయా సమస్యలు రాకుండా ముందుగానే జాగ్రత్త పడవచ్చు.
కాఫీ తాగడం వల్ల లివర్ ఆరోగ్యంగా ఉంటుందని సైంటిస్టులు చేపట్టిన అధ్యయనాలు తెలియజేస్తున్నాయి. కాఫీ తాగితే డిప్రెషన్‌ తగ్గడంతోపాటు సూసైడ్‌ చేసుకోవాలనే ఆలోచనలు కూడా తగ్గిపోతాయని సైంటిస్టులు చెబుతున్నారు.
సైంటిస్టులు చేపట్టిన అధ్యయనం ప్రకారం రోజూ కాఫీ తాగే వారి ఆయుర్దాయం ఎక్కువగా ఉంటుందని, వారు ఎక్కువ కాలం పాటు జీవిస్తారని వెల్లడైంది. అలాగే కాఫీ వల్ల కంగారు, ఆందోళన, నిద్రలేమి వంటి సమస్యలు కూడా తగ్గుతాయని చెబుతున్నారు.
అయితే కాఫీని రోజూ తాగవచ్చా ? అంటే.. అవును.. పైన తెలిపిన ప్రయోజనాలను పొందడం కోసం రోజూ కాఫీని తాగవచ్చు. కానీ రోజుకు రెండు కప్పులకు మించి కాఫీ తాగరాదు. ఎందుకంటే ఒక కప్పు కాఫీలో సుమారుగా 90 నుంచి 100 మిల్లీగ్రాముల కెఫీన్‌ ఉంటుంది. రెండు కప్పుల కాఫీ తాగితే మనకు 200 మిల్లీగ్రాముల మేర కెఫీన్‌ లభిస్తుంది. అయితే కెఫీన్‌ కేవలం కాఫీలోనే కాక ఇతర ఆహారాల్లోనూ ఉంటుంది. కనుక కెఫీన్‌ ఉన్న ఆహారాలను కూడా తీసుకుంటే మోతాదు పెరిగిపోతుంది. మనం రోజుకు గరిష్టంగా 300 మిల్లీగ్రాముల మేర కెఫీన్‌ తీసుకోవచ్చు. అంతకు మించితే దుష్పరిణామాలు ఏర్పడుతాయి. కనుక కెఫీన్‌ మోతాదు పెరగకుండా రోజూ కాఫీ తాగాలి. చిన్న కప్పు అయితే 3 నుంచి 4 కప్పులు, పెద్దవి అయితే 2 కప్పుల వరకు కాఫీని తాగవచ్చు. దీంతో కాఫీ వల్ల పైన తెలిపిన ప్రయోజనాలను పొందవచ్చు. అంతకు మించితే మాత్రం అనారోగ్య సమస్యలను ఎదుర్కోవాల్సి వస్తుంది.
