విశాఖపట్నానికి చెందిన స్టేషన్ మాస్టర్‌కు.. ఛత్తీస్‌గ‌ఢ్‌లోని దుర్గ్‌కు చెందిన మహిళతో 2011 అక్టోబర్ 12న వివాహం జరిగింది. అయితే పెళ్లికి ముందే ఆమెకు మరొకరితో సంబంధం ఉండటంతో.. ఈ వివాహం ఆమెకు ఏమాత్రం ఇష్టం లేకపోయింది. దీంతో భార్యాభర్తల మధ్య గొడవలు జరిగేవి. భార్య తీరు నచ్చని స్టేషన్ మాస్టర్.. తన అత్తామామలకు విషయం చెప్పగా.. సర్దుకుపో బాబు, తాను మారుతుందిలే అని వారు అతడికి నచ్చజెప్పారు. కానీ ఆమె తీరు మారలేదు. పైగా భర్త మంచం మీద తన పక్కన ఉన్న సమయంలోనే.. ప్రియుడికి ఫోన్ చేసి మాట్లాడేది. ఫలితంగా భార్యాభర్తల మధ్య గొడవలు జరిగేవి. ఆ వివాహ బంధం.. తుమ్మితే ఊడిపోయే ముక్కులా మారింది.
ఇదిలా ఉండగా.. ఓ రోజు రాత్రి స్టేషన్ మాస్టర్ డ్యూటీలో ఉండగా.. భార్య అతడికి కాల్ చేసింది. ఫోన్లోనే ఇద్దరి మధ్య గొడవ జరిగింది. పనిలో ఉండటంతో.. తర్వాత ఇంట్లో మాట్లాడుకుందాం.. ఓకే? అని చెప్పి ఆయన ఫోన్ పెట్టేశారు. అయితే ఆ సమయంలో తన వర్క్ మైక్రోఫోన్ ఆన్లో ఉన్న విషయం ఆ స్టేషన్ మాస్టర్ మర్చిపోయారు. స్టేషన్ మాస్టర్ నోటి నుంచి వచ్చిన ఓకే అనే మాటను మైక్రో ఫోన్ ద్వారా విన్న ఆయన కొలీగ్.. గూడ్స్ రైలు వెళ్లేందుకు ఆయన అనుమతి ఇచ్చారని భావించి.. అది వెళ్లేందుకు గ్రీన్ సిగ్నల్ ఇచ్చారు. బ్యాడ్ లక్ ఏంటంటే.. ఆయన మాట్లాడిన మాటల్లో ఆ ఓకే అనే మాట మాత్రమే అవతలి వ్యక్తికి వినిపించింది.
అయితే అది మావోయిస్ట్ ప్రాబల్య ప్రాంతం కావడం.. రాత్రి వేళల్లో ఆ ప్రాంతంలో రైళ్ల రాకపోకలు నిషిద్ధం. కానీ స్టేషన్ మాస్టర్ ఓకే చెప్పడంతో.. రైలు రాత్రి సమయంలో ముందుకెళ్లింది. లక్కీగా దానికి ఎలాంటి ప్రమాదం చోటు చేసుకోలేదు. కానీ ఇది రాత్రి నిబంధనలకు విరుద్ధం కావడంతో.. రైల్వేకు రూ.3 కోట్ల మేర నష్టం వాటిల్లిందట. దీనికి కారణమైన స్టేషన్ మాస్టర్‌ను రైల్వే శాఖ సస్పెండ్ చేసింది. దీంతో ఆ అధికారి దాంపత్యం జీవితం మరింత చిక్కుల్లో పడింది. అప్పటికే భార్య తీరుతో విసిగిపోయిన ఆ స్టేషన్ మాస్టర్.. విశాఖపట్నం ఫ్యామిలీ కోర్టులో విడాకుల కోసం పిటిషన్ దాఖలు చేశారు. ప్రతిగా.. స్టేషన్ మాస్టర్ పైన ఆయన భార్య సెక్షన్ 498 ఏ కింద వేధింపుల కేసు పెట్టింది. ప్రభుత్వ ఉద్యోగి అయిన తన బావను, 70 ఏళ్ల మామను, ఆడపడుచును కూడా ఈ కేసులో ఇరికించింది.
భర్త, ఆయన కుటుంబ సభ్యుల వల్ల తన ప్రాణాలకు ప్రమాదం ఉందని ఆరోపించింది. సుప్రీం కోర్టుకు వెళ్లి మరీ.. విడాకుల కేసును విశాఖపట్నం నుంచి దుర్గ్‌కు మార్పించుకుంది. దుర్గ్ ఫ్యామిలీ కోర్టు ఆ స్టేషన్ మాస్టర్ విడాకుల పిటిషన్‌ను రద్దు చేయగా.. ఆయన ఛత్తీస్‌గ‌ఢ్ హైకోర్టును ఆశ్రయించారు. ఇన్నేళ్లపాటు ఈ వ్యవహారం కోర్టులో నలిగింది. జస్టిస్ రజని దూబే, జస్టిస్ సంజయ్ కుమార్ జైశ్వాల్తో కూడిన ధర్మాసనం ఈ కేసులో తీర్పు వెలువరించింది. స్టేషన్ మాస్టర్ భార్య క్రూరంగా వ్యవహరించిందని న్యాయస్థానం అభిప్రాయపడింది. ఫ్యామిలీ కోర్టు తీర్పును రివర్స్ చేస్తూ.. ఆయనకు విడాకులు మంజూరు చేసింది.
తన భర్తకు వదినతో అక్రమ సంబంధం ఉందంటూ.. స్టేషన్ మాస్టర్ భార్య తప్పుడు ఆరోపణలు చేసినట్లు కోర్టు గుర్తించింది. వరకట్నం, వేధింపుల ఆరోపణలు కూడా తప్పని తేల్చింది. కట్నానికి సంబంధించి ఆమె తగిన ఆధారాలను సమర్పించలేకపోయింది. భర్త కుటుంబ సభ్యులు వారితో కలిసి ఉండటం లేదు కాబట్టి.. వారిపైనా ఆమె చేసిన ఆరోపణలను కోర్టు కొట్టివేసింది. భార్య తనతో ఫోన్లో వాగ్వాదానికి దిగడం సరే’ ఘటనకు దారి తీసిందని, తప్పుడు నివేదికలు సమర్పించడం, నిరాధారమైన ఆరోపణలు చేయడం.. ఇవన్నీ మానసిక క్రూరత్వమేనని పేర్కొంటూ డివిజన్ బెంచ్ స్టేషన్ మాస్టర్‌కు విడాకులు మంజూరు చేసింది.
