శఠగోపం అంటే అత్యంత గోప్య‌మైనది అని అర్థం. శఠగోపంను వెండి, రాగి, కంచుతో తయారు చేస్తారు. దాని మీద విష్ణువు పాదాలుంటాయి. శఠగోపంను శఠగోప్యం, శఠారి అని కూడా పిలుస్తారు. విష్ణుపాదాలు ఉన్న శఠగోపంను తలమీద పెట్టినప్పుడు మన కోరికలు భగవంతుడికి తెలపాలని ఈ శఠగోపం వివరిస్తుంది. పూజారికి కూడా వినిపించకుండా మన కోరికలను భగవంతునికి విన్నవించుకోవాలి. అంటే మన కోరికే శఠగోపం. శఠగోపం మన తలపై పెట్టగానే ఏదో తెలియని అనుభూతి, మానసిక ఉల్లాసం కలుగుతుంది. మానవునికి శత్రువులైన కామమూ, క్రోధమూ, లోభమూ, మోహమూ, మదమూ, మాత్సర్యముల వంటి వాటికి ఇక నుంచి దూరంగా ఉంటామని తలూస్తూ తలవంచి శఠగోపం ద్వారా తీసుకోవటమని మరో అర్థం ఉంది. శఠగోపమును రాగి, కంచు, వెండిలతో తయారు చేయడం వెనక మరో అంతరార్థం ఉంది. శఠగోపం తలమీద ఉంచినప్పుడు శరీరానికి లోహం తగలడం ద్వారా విద్యుదావేశం జరిగి, మనలోని అధిక విద్యుత్‌ బయటకి వెళ్లిపోతుంది. దీని ద్వారా శరీరంలో ఆందోళన, ఆవేశం తగ్గుతాయి.
శఠగోపం రూపం వెనక మరో అర్థం ఉంది. శఠగోపంపై విష్ణుపాదాలు ఉంటాయి. అవి పూర్తీగా భక్తుల తలను తాకడానికి అనుకూలంగా ఉండటం కోసం ఇలా వలయాకారంలో తయారు చేస్తారు. దీన్ని తలపై పెడితే.. భగవంతుని స్పర్శ శిరస్సుకి తగిలి.. భక్తులను అనుగ్రహిస్తారని అర్థం. శఠత్వం అంటే మూర్ఖత్వం, గోపం అంటే దాచిపెట్టడం అని అర్థం. భగవంతుడు మనిషిలో గోప్యంగా ఉన్న మూర్ఖత్వాన్ని, అహంకారాన్ని తొలగించి జ్ఞానిగా చేస్తాడని ఆధ్యాత్మికత వేత్తలు వివరిస్తారు. శఠగోపం గుడిలోని దేవత, దేవుడి విగ్రహానికి ప్రతీక. గుడికి వెళ్లిన భక్తులకు.. దేవతలను తాకే వీలుండదు కాబట్టి.. తీర్థప్రసాదాలిచ్చిన తర్వాత ఆలయ పూజారి శఠగోపంను భక్తుల తలపై పెట్టడం ఆనవాయితీగా వస్తోంది.
శఠగోపంను శఠారి అనిపిస్తారు. ఇక్కడ మరో అర్థం చెబుతున్నారు. శఠం అంటే మోసగాళ్లు, అరి అంటే శత్రువు. అంటే మోసగాళ్లకు శత్రువు అని అర్థం. భక్తుల తలపై శఠగోపం పెట్టగా.. చెడు తలంపులు, ద్రోహం వంటి లక్షణాలు నశించి మంచి ప్రవర్తన అలవడుతుందని అంతరార్థం ఉంది. ఇంతకి గొప్ప అర్థం, అంతరార్థం ఉన్న శఠగోపంను ఇకపై ఆలయంలో తప్పకుండా.. మీ శిరస్సుపై పెట్టించుకుని, ఆ దేవుడి అనుగ్రహ, ఆశీస్సులు పొందండి.
