ఈ మ‌ధ్య కాలంలో స్త్రీలు మాత్ర‌మే కాదు పురుషులు కూడా త‌మ శిరోజాల సంర‌క్ష‌ణ‌కు అధిక ప్రాధాన్య‌త‌ను ఇస్తున్నారు. ఇక జుట్టు రాలిపోవ‌డం అన్న‌ది ప్ర‌ధాన స‌మ‌స్య‌గా మారింది. మహిళలు త‌మ జుట్టు రాలిపోతుంద‌ని తీవ్ర ఆందోళ‌న చెందుతున్నారు. అలాగే పురుషులు బ‌ట్ట‌త‌ల వ‌స్తుందేమోన‌ని భ‌య‌ప‌డుతున్నారు. దీనికి తోడు చుండ్రు, జుట్టు చిట్లిపోవ‌డం వంటి స‌మ‌స్య‌లు కూడా ఇబ్బంది పెడుతున్నాయి. అయితే రోజువారి దిన‌చ‌ర్య‌లో భాగంగా కొన్ని చిట్కాల‌ను పాటిస్తే దాంతో శిరోజాల‌ను సంర‌క్షించుకోవ‌డం చాలా తేలిక‌వుతుంది. ఇక ఆ సూచ‌న‌లు, చిట్కాలు ఏమిటో ఇప్పుడు తెలుసుకుందాం.
తలస్నానం చేసిన తర్వాత తలను తడిగా వుంచుకోకండి. దీనివల్ల చుండ్రు ఏర్పడుతుంది. అలాగని వెంటనే హాట్ ఎయిర్ బ్లోయర్ వంటి వాటితో వెంటనే జుట్టు ఆరబెట్టుకోవటం మంచిది కాదు. జుట్టును నెమ్మదిగా టవల్ తో తుడిచి పొడిగా అయ్యేటట్లు చెయ్యాలి. జుట్టు తడిగా వున్నప్పుడు తల దువ్వుకోకూడదు. కుదుళ్ళలో నుండి వెంట్రుకలు ఊడి వస్తాయి. జుట్టు పొడిగా వున్నప్పుడు దువ్వుకోండి.
తలకు రోజూ నూనె రాసుకోవటం లేదా వారానికి రెండుసార్లయినా నూనె రాసుకోవడం వల్ల కేశాలు బలంగా ఉంటాయి. జుట్టు జిడ్డుగా వున్న కారణంగా దానికి నూనె అవసరం లేదని భావించవద్దు.
చుండ్రు విపరీతంగా వుంటే నాలుగు టొమోటోలను తీసుకుని వాటిని మెత్తగా నలిపి ఆ గుజ్జును తలకు బాగా పట్టించండి. రెండు నిమిషాలు మర్ధన చెయ్యండి. ఆ తర్వాత తలస్నానం చెయ్యాలి.
