చాలా మందికి డెన్మార్క్ గురించి తెలీదు. నాకు మెసేజ్ చేసి మరి అడుగుతుంటారు. అందరి అపోహలు పోగొట్టే ప్రయత్నం చేస్తాను. కోపెన్హాగన్, అర్హుస్, అల్బోర్గ్, ఓడెన్సు – ఇవి ప్రధానమైన నగరాలు. కోపెన్హాగన్ – రాజధాని. ఒకప్పుడు స్వీడన్, నార్వే లకి కూడా ఉమ్మడి రాజధాని. బాల్టిక్ సముద్రం కి ఆనుకుని ఉంటుంది. యూరోప్ వాళ్ళ న్యూయార్క్ సిటీ. బిజీ బిజీ గా ఉంటుంది. స్వీడన్ లోని మాల్మో నగరానికి డైరెక్ట్ గా రైళ్లు నడుస్తాయి. గంట ప్రయాణంలో స్వీడన్ కూడా చూసి రావొచ్చు. అర్హుస్ – రెండవ అతి పెద్ద నగరం. దేశానికి మధ్యలో ఉంటుంది. చిరునవ్వుల నగరంగా దీనికి పేరు. మిమ్మల్ని చూసి నవ్వితే కంగారు పడకండి – అది ఇక్కడవారి కల్చర్. దగ్గర్లో మోర్స్గార్డ్ మ్యూజియం ఉంటుంది – ఆర్కియాలజీ మీద ఇంట్రెస్ట్ ఉన్న వారు తప్పక చూడాల్సిన ప్రాంతం.
అల్బర్గ్ – నార్త్ లో ఉంటుంది, నార్వే కి దగ్గరగా. ఈమధ్య రాజమౌళి గారి కుటుంబం వీక్షించిన పులిపిట్ రాక్ అల్బర్గ్ నుంచి నాలుగు గంటలు దూరం కార్ లో వెళ్తే . రోస్కిల్డ్ నగరం – ఒకప్పటి వైకింగ్స్ నివసించిన సెటిల్మెంట్. ప్రతిసంవత్సరం సమ్మర్ లో ఇక్కడ మ్యూజిక్ ఫెస్టివల్ జరుపుతారు. ప్రపంచం నలుమూలల నుంచి ఇది వీక్షించడానికి వస్తారు. ఇవి కాక బిల్లున్డ్, ఎస్బజెర్గ్, ఎబెల్టాఫ్ట్ అని టౌన్స్ ఉంటాయి. అట్లాంటిక్ మహాసముద్రాన్ని ఆనుకుని వున్న ఎస్బజెర్బ్ కి వెళ్లి Men at Seastatue (Mennesket ved Havet) చూడొచ్చు. ఎబెల్టాఫ్ట్ లో యూరోపియాన్ ఫిలిం స్కూల్ ఉంది. సరదాగా పిక్నిక్ కి వెళ్లొచ్చు. బిల్లున్డ్ లోనే ప్రపంచ ప్రఖ్యాత బొమ్మల కంపెనీ లెగో ముఖ్యకార్యాలయం ఉన్నది. Legoland చూసిరావొచ్చు ఇంట్రెస్ట్ ఉంటే. ఇక్కడ్నుంచి అన్ని ప్రధాన యూరోప్ నగరాలకు ఫ్లైట్లు దొరుకుతాయి.
ఫరోయె ఐలాండ్స్ – డెన్మార్క్ మెయిన్ ల్యాండ్ కి దూరంగా ఉంటాయి. అందమైన, ప్రత్యేకమైన దీవులు చూడాలని కోరిక ఉంటే వెళ్ళిరండి. గ్రీన్లాండ్ కూడా డెన్మార్క్ లో భాగమే. అడ్వెంచర్ ప్రియులు వెళ్లాల్సిందే. టూరిస్ట్ గా కొన్ని రోజులు దేశాన్ని చూడడానికి రావాలనుకునే వారికి ముఖ్య గమనికలు: డెన్మార్క్ చాలా ఖరీదైన దేశం. ఈమధ్య స్విట్జర్లాండ్ వెళ్ళొచ్చాను. ప్రపంచంలోనే అత్యంత ఖరీదైన దేశంగా పాపులారిటీ ఉన్న స్విట్జర్లాండ్, డెన్మార్క్ మీద చీప్ గానే అనిపించింది. మీ బడ్జెట్ లో డెన్మార్క్, స్విట్జర్లాండ్ లో ఒక దేశం మాత్రమే చూడగలను అని అనిపిస్తే స్విట్జర్లాండ్ కే వెళ్ళండి. డెన్మార్క్ లో ప్రత్యేకించి చూసి ఆశ్చర్య పోయేలా ఏమీ ఉండదు. కానీ ఖర్చు మోత మోగిపోతుంది.
వాతావరణం ఎప్పుడు ఎలా మారిపోతుందో తెలీదు. సమ్మర్ లోనే రాడానికి ప్రయత్నించండి. హైకింగ్ ప్రియులకి నిరాశే – ఎందుకంటే డెన్మార్క్ లో కొండలుండవు. ఫ్లాట్ గా ఉండే దేశం. ఆహారానికి ఇబ్బంది పడతారు. కానీ డేనిష్ లైఫ్స్టైల్ ని ఆస్వాదించే మనస్తత్వం ఉన్నవారు తప్పకుండా రావాలి.
