మన శరీరంలో లివర్ అనేది ఎంత ముఖ్య‌మైన‌దో ప్ర‌త్యేకంగా చెప్ప‌న‌క్క‌ర్లేదు. మన శరీరంలోని ముఖ్య భాగాల్లో లివర్ కూడా ఒకటి. ఇది పరిమాణంలోకూడా పెద్దది. దీని వల్ల శరీరంలో ఎన్నో పనులు జరుగుతాయి. రోజులో 24 గంటల పాటు నిరంతరాయంగా పనిచేస్తుంది. అందుకే లివర్‌కి ఏ మాత్రం సమస్య వచ్చినా కొన్ని లక్షణాలు కనిపిస్తాయి. మనం ఆరోగ్యంగా ఉండేందుకు లివర్ కూడా ఆరోగ్యంగా ఉండాలి.బాడీలోని ఇతర భాగాల్లానే లివర్ కూడా ఓ ముఖ్య అవయవం. దీనిని కాపాడుకోవడం చాలా ముఖ్యం. ఎందుకంటే మన బాడీలో పేరుకుపోయిన విషపూరిత ట్యాక్సిన్స్‌ని విసర్జించడం నుంచి కొవ్వులు, ప్రోటీన్లు, కార్బోహైడ్రేట్స్ జీవక్రియ గురించి హెల్ప్ చేస్తుంది.వీటితో పాటు పిత్తరసాన్ని కూడా ఉత్పత్తి చేస్తుంది.
శరీరంలోని పలు అవయవాలు, వాటి విధులు సజావుగా నడపడానికి లివర్ ఎంత‌గానో సహాయపడుతుంది. కానీ, మనం మన దినచర్యలో చేసే కొన్ని పొరపాట్లు అది కాలేయానికి ప్రమాదకరంగా మారుతాయి. ముఖ్యంగా, ఉదయాన్నే చేసే చెడు అలవాట్లు కాలేయానికి హాని కలిగిస్తాయని వైద్య నిపుణులు హెచ్చరిస్తున్నారు. కాలేయం పాడైతే, మధుమేహం వంటి తీవ్రమైన వ్యాధుల ప్రమాదం కూడా పెరుగుతుంది. ఉదయాన్నే మొదట నీరు త్రాగడం చాలా ముఖ్యం. కానీ చాలా మంది ఈ అలవాటును విస్మరిస్తారు.. రాత్రి నిద్రపోతున్నప్పుడు శరీరంలో డీహైడ్రేషన్ ఏర్పడుతుంది.. ఉదయం నిద్రలేచిన వెంటనే నీరు త్రాగడం వల్ల శరీరంలో నీటి కొరతను భర్తీ చేస్తుంది. నీరు తాగడం వల్ల కాలేయంలోని విషపూరిత మూలకాలు తొలగిపోయి శరీరాన్ని నిర్విషీకరణ చేయడంలో సహాయపడుతుంది.
చాలా మంది ఉదయాన్నే అల్పాహారంగా వేయించిన లేదా కొవ్వు పదార్ధాలను తినడానికి ఇష్టపడతారు. ఆయిల్, ఫ్యాటీ ఫుడ్స్ తీసుకోవడం వల్ల జీర్ణవ్యవస్థ దెబ్బతినడమే కాకుండా కాలేయంపై కూడా ప్రభావం చూపుతుంది. ఇది కాలేయం సాధారణ పనితీరుకు అంతరాయం కలిగిస్తుంది. చాలా కాలం పాటు నిర్లక్ష్యం చేస్తే, మధుమేహం వంటి వ్యాధులకు దారితీస్తుంది.ఉదయాన్నే కొంత వ్యాయామం చేయడం వల్ల శరీరానికే కాకుండా కాలేయానికి కూడా మేలు జరుగుతుంది. వ్యాయామం చేయడం వల్ల శరీరంలో రక్త ప్రసరణ మెరుగుపడుతుంది. కాలేయ పనితీరు మెరుగుపడుతుంది. జీవనశైలి చాలా నిశ్చలంగా ఉండే వ్యక్తులు, అంటే రోజంతా కూర్చుని ఉదయం వ్యాయామం చేయని వారు వారి కాలేయంపై ప్రతికూల ప్రభావాన్ని అనుభవిస్తారు. చాలా మంది రాత్రి నుండి మిగిలిపోయిన ఆహారాన్ని ఉదయం తింటారు. అయితే ఈ అలవాటు కాలేయానికి హాని చేస్తుంది. ఉదయం నిద్రలేచిన తర్వాత సిగరెట్ తాగడం లేదా మద్యం సేవించడం కాలేయానికి అత్యంత హానికరం. ధూమపానం, ఆల్కహాల్ కాలేయ కణాలను దెబ్బతీస్తాయి. ఇది కాలేయ పనితీరును దెబ్బతీస్తుంది.
