Bendakaya Curry Recipe : బెండ‌కాయ‌లు.. వీటిని కూడా మ‌నం ఆహారంగా తీసుకుంటూ ఉంటాం. బెండ‌కాయ‌లో ఎన్నో విలువైన పోష‌కాల‌తో పాటు ఆరోగ్య ప్ర‌యోజ‌నాలు కూడా దాగి ఉన్నాయి. వీటిని కూడా త‌ప్ప‌కుండా ఆహారంలో భాగంగా తీసుకోవాలి. బెండకాయలతో మ‌నం ర‌క‌ర‌కాల వంట‌కాల‌ను త‌యారు చేసుకుని తింటూ ఉంటాం. బెండకాయలతో చేసే ఎటువంటి వంట‌క‌మైనా చాలా రుచిగా ఉంటుంది. ఈ బెండకాయలతో రుచిగా, సుల‌భంగా అయ్యేలా కూర‌ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
బెండ‌కాయ క‌ర్రీ త‌యారీకి కావ‌ల్సిన ప‌దార్థాలు..
త‌రిగిన బెండ‌కాయ‌లు – పావు కిలో, స‌న్న‌గా త‌రిగిన ఉల్లిపాయ – 1, అల్లం – ఒక ఇంచు ముక్క, వెల్లుల్లి రెబ్బ‌లు – 6, ప‌చ్చిమిర్చి – 2, నూనె – 2 టేబుల్ స్పూన్స్, ప‌సుపు – పావు టీ స్పూన్, జీల‌క‌ర్ర – ఒక టీ స్పూన్, క‌రివేపాకు – ఒక రెమ్మ, త‌రిగిన ట‌మాటాలు – రెండు, ఉప్పు – త‌గినంత, కారం – ఒక టీ స్పూన్, ధ‌నియాల పొడి – ఒక టీ స్పూన్, జీల‌క‌ర్ర పొడి – అర టీ స్పూన్, గ‌రం మ‌సాలా పొడి – అర టీ స్పూన్, పెరుగు – 2 టేబుల్ స్పూన్స్, నీళ్లు – అర గ్లాస్, త‌రిగిన కొత్తిమీర – కొద్దిగా.
బెండ‌కాయ క‌ర్రీ త‌యారీ విధానం..
ముందుగా బెండ‌కాయ‌ల‌ను శుభ్రంగా క‌డిగి ముక్క‌లుగా చేసుకోవాలి. తరువాత ఒక జార్ లో ఉల్లిపాయ ముక్కలను, అల్లం ముక్క‌ను, వెల్లుల్లి రెబ్బ‌ల‌ను, ప‌చ్చిమిర్చిని వేసి మ‌రీ మెత్త‌గా కాకుండా మిక్సీ ప‌ట్టుకోవాలి. ఇప్పుడు క‌ళాయిలో నూనె వేసి వేడి చేయాలి. నూనె వేడ‌య్యాక అందులో బెండ‌కాయ ముక్కలను, ప‌సుపును వేసి వేయించాలి. బెండ‌కాయ ముక్కలను పూర్తిగా వేయించుకుని ఒక ప్లేట్ లోకి తీసుకోవాలి. తరువాత అదే క‌ళాయిలో జీల‌క‌ర్ర, క‌రివేపాకు వేసి వేయించాలి. ఇవి వేగిన తరువాత ముందుగా మిక్సీ ప‌ట్టుకున్న ఉల్లిపాయ మిశ్ర‌మాన్ని వేసి వేయించుకోవాలి. ఈ మిశ్ర‌మం వేగిన తరువాత ట‌మాట ముక్కలను వేయాలి. తరువాత ఉప్పు, కారం, గ‌రం మ‌సాలా, ధ‌నియాల పొడి, జీల‌క‌ర్ర పొడి వేసి క‌ల‌పాలి.
దీనిని రెండు నిమిషాల పాటు వేయించిన తరువాత ఇందులో కొద్దిగా నీటిని పోసి మూత పెట్టి ట‌మాట ముక్క‌లు మెత్త‌గా అయ్యే వ‌ర‌కు ఉడికించాలి. ట‌మాట ముక్క‌లు ఉడికిన తరువాత ఇందులో పెరుగును వేసి క‌ల‌పాలి. తరువాత ముందుగా వేయించిన బెండ‌కాయ ముక్కలను, నీళ్ల‌ను పోసి క‌లిపి మూత పెట్టి నూనె పైకి తేలే వ‌ర‌కు ఉడికించాలి. తరువాత కొత్తిమీర‌ను వేసి క‌లిపి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే బెండ‌కాయ క‌ర్రీ త‌యార‌వుతుంది. దీనిని అన్నం, చ‌పాతీ వంటి వాటితో క‌లిపి తింటే చాలా రుచిగా ఉంటుంది. త‌ర‌చూ చేసే బెండ‌కాయ కూర‌ల కంటే ఈ విధంగా చేసిన బెండ‌కాయ కూర మ‌రింత రుచిగా ఉంటుంది. ఈ కూర‌ను కూడా అంద‌రూ ఎంతో ఇష్టంగా తింటారు.
