Carrot Masala Curry : మ‌నం క్యారెట్ ను కూడా ఆహారంగా తీసుకుంటూ ఉంటాం. క్యారెట్ ను ఆహారంగా తీసుకోవ‌డం వ‌ల్ల మ‌నం చ‌క్క‌టి ఆరోగ్యాన్ని కూడా సొంతం చేసుకోవ‌చ్చ‌ని మ‌న‌కు తెలిసిందే. ఇత‌ర ఆహార ప‌దార్థాల త‌యారీలో దీనిని ఎక్కువ‌గా ఉప‌యోగిస్తూ ఉంటాం. ఈ క్యారెట్ తో మ‌నం ఎంతో రుచిగా ఉండే మసాలా కూర‌ను కూడా త‌యారు చేసుకోవ‌చ్చు. క్యారెట్ తో చేసే మసాలా కూర చాలా రుచిగా ఉండ‌డంతో పాటు దీనిని త‌యారు చేయ‌డం కూడా చాలా స‌లుభం. క్యారెట్ తో రుచిగా, సుల‌భంగా మసాలా కూర‌ను ఎలా త‌యారు చేసుకోవాలో ఇప్పుడు తెలుసుకుందాం.
క్యారెట్ మసాలా క‌ర్రీ త‌యారీకి కావ‌ల్సిన ప‌దార్థాలు..
స‌న్న‌గా గుండ్రంగా త‌రిగిన క్యారెట్ – పావు కిలో, గ‌రం మసాలా – ఒక టీ స్పూన్, నాన‌బెట్టిన చింత‌పండు – చిన్న నిమ్మ‌కాయంత, ప‌సుపు – అర టీ స్పూన్, ఉప్పు – త‌గినంత, నూనె – 2 టేబుల్ స్పూన్స్, తాళింపు దినుసులు – ఒక టేబుల్ స్పూన్, కారం – ఒక టేబుల్ స్పూన్, త‌రిగిన కొత్తిమీర – కొద్దిగా, క‌రివేపాకు – ఒక రెమ్మ, అల్లం వెల్లుల్లి పేస్ట్ – ఒక టీ స్పూన్.
మసాలా దినుసులు..
ప‌చ్చికొబ్బ‌రి ముక్క‌లు – 2 టేబుల్ స్పూన్స్, ధ‌నియాలు – ఒక టేబుల్ స్పూన్, నువ్వులు – ఒక టేబుల్ స్పూన్స్, బిర్యానీ ఆకు – 1, యాల‌కులు – 2, ల‌వంగాలు – 3, దాల్చిన చెక్క – ఒక ఇంచు ముక్క, ప‌ల్లీలు – 2 టేబుల్ స్పూన్స్, జీల‌క‌ర్ర – ఒక టీ స్పూన్.
క్యారెట్ మసాలా క‌ర్రీ త‌యారీ విధానం..
ముందుగా క‌ళాయిలో ప‌ల్లీల‌ను వేసి వేయించాలి. ప‌ల్లీలు వేగిన త‌రువాత అందులో మసాలా దినుసులు వేసి వేయించాలి. వీటిని దోర‌గా వేయించి ఒక జార్ లోకి తీసుకుని మెత్త‌గా మిక్సీ ప‌ట్టుకోవాలి. త‌రువాత అర గ్లాస్ నీళ్లు పోసుకుంటూ పేస్ట్ లా చేసి ప‌క్క‌కు పెట్టుకోవాలి. ఇప్పుడు క‌ళాయిలో నూనె వేసి వేడి చేయాలి. నూనె వేడయ్యాక క్యారెట్ ముక్క‌లు వేసి మెత్త‌గా అయ్యే వ‌ర‌కు వేయించి ప్లేట్ లోకి తీసుకోవాలి. త‌రువాత అదే నూనెలో తాళింపు దినుసులు, క‌రివేపాకు వేసి వేయించాలి. త‌రువాత అల్లం పేస్ట్ వేసి ప‌చ్చి వాస‌న పోయే వ‌ర‌కు వేయించాలి. త‌రువాత మిక్సీ ప‌ట్టుకున్న మసాలా పేస్ట్ , ప‌సుపు, ఉప్పు, కారం, గ‌రం మసాలా వేసి కలపాలి. దీనిని నూనె పైకి తేలే వ‌ర‌కు బాగా వేయించాలి.
త‌రువాత వేయించిన క్యారెట్ ముక్క‌లు, చింత‌పండు ర‌సం, ఒక గ్లాస్ నీళ్లు పోసి కలపాలి. త‌రువాత దానిపై మూత పెట్టి 15 నిమిషాల పాటు ఉడికించాలి. త‌రువాత మూత తీసి కొత్తిమీర వేసి క‌లిపి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే క్యారెట్ మసాలా క‌ర్రీ త‌యార‌వుతుంది. దీనిని అన్నం, చ‌పాతీ, పుల్కా, రోటి వంటి వాటితో క‌లిపి తింటే చాలా రుచిగా ఉంటుంది. క్యారెట్ తో త‌ర‌చూ చేసే వంట‌కాల‌తో పాటు అప్పుడ‌ప్పుడూ ఇలా మసాలా కూర‌ను కూడా త‌యారు చేసుకుని తిన‌వ‌చ్చు. దీనిని తిన‌డం వ‌ల్ల రుచితో పాటు చ‌క్క‌టి ఆరోగ్యాన్ని కూడా సొంతం చేసుకోవ‌చ్చు.
