Chicken Garelu : మ‌నం చికెన్ ను కూడా ఆహారంగా తీసుకుంటూ ఉంటాం. దానితో ర‌క‌ర‌కాల కూర‌ల‌ను, చిరుతిళ్ల‌ను త‌యారు చేస్తూ ఉంటాం. చికెన్ తో చేసే చిరుతిళ్లు చాలా రుచిగా ఉంటాయి. చాలా మంది చికెన్ వంట‌కాల‌ను ఇష్టంగా తింటారు. చికెన్ తో చేసుకోద‌గిన చిరుతిళ్ల‌ల్లో చికెన్ గారెలు ఒక‌టి. పెస‌ర‌ప‌ప్పు వేసి చేసే ఈ చికెన్ గారెలు చాలా రుచిగా ఉంటాయి. వీటిని త‌యారు చేయ‌డం కూడా చాలా తేలిక. రుచిగా, సులభంగా చికెన్ తో గారెల‌ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాల గురించి ఇప్పుడు తెలుసుకుందాం.
చికెన్ గారెల త‌యారీకి కావ‌ల్సిన ప‌దార్థాలు..
పెస‌ర‌ప‌ప్పు – ఒక క‌ప్పు, బోన్ లెస్ చికెన్ – 100 గ్రా., అల్లం – ఒక ఇంచు ముక్క, వెల్లుల్లి రెబ్బ‌లు – 4, ప‌చ్చిమిర్చి – 5, ఉప్పు – త‌గినంత, నూనె – డీప్ ఫ్రైకు స‌రిప‌డా, జీల‌క‌ర్ర – అర టీ స్పూన్, ధ‌నియాల పొడి – ఒక టీ స్పూన్, కారం – అర టీ స్పూన్, ప‌సుపు – చిటికెడు, త‌రిగిన కొత్తిమీర – కొద్దిగా, త‌రిగిన పుదీనా – కొద్దిగా, వంట‌సోడా – పావు టీ స్పూన్, బియ్యం పిండి – 3 టీ స్పూన్స్.
చికెన్ గారెల త‌యారీ విధానం..
ముందుగా పెస‌ర‌ప‌ప్పును శుభ్రంగా క‌డ‌గాలి. త‌రువాత త‌గిన‌న్ని నీళ్లు పోసి రెండు గంట‌ల పాటు నాన‌బెట్టాలి. త‌రువాత నీటిని వ‌డ‌క‌ట్టి నాన‌బెట్టిన ప‌ప్పు నుండి గుప్పెడు పెస‌ర‌ప‌ప్పును ప‌క్క‌కు తీసి ఉంచాలి. ఇప్పుడు జార్ లో శుభ్రం చేసిన చికెన్ ను వేసి మెత్త‌గా మిక్సీ ప‌ట్టుకుని గిన్నెలోకి తీసుకోవాలి. త‌రువాత అదే జార్ లో నాన‌బెట్టుకున్న పెస‌ర‌ప‌ప్పు, అల్లం, వెల్లుల్లి రెబ్బ‌లు, ప‌చ్చిమిర్చి వేసి క‌చ్చా ప‌చ్చాగా మిక్సీ ప‌ట్టుకోవాలి. త‌రువాత దీనిని కూడా చికెన్ ను తీసుకున్న గిన్నెలోకి తీసుకోవాలి. అలాగే ప‌క్క‌కు తీసిన పెస‌ర‌ప‌ప్పును కూడా వేసుకోవాలి. ఇప్పుడు నూనె త‌ప్ప మిగిలిన ప‌దార్థాల‌న్నీ వేసి బాగా క‌ల‌పాలి. త‌రువాత క‌ళాయిలో నూనె పోసి వేడి చేయాలి.
నూనె వేడ‌య్యాక చేతికి త‌డి చేసుకుంటూ కొద్ది కొద్దిగా పిండిని తీసుకుంటూ గారెల ఆకారంలో వ‌త్తుకుని నూనెలో వేసుకోవాలి. ఈ గారెల‌ను మ‌ధ్య‌స్థ మంట‌పై రెండు వైపులా ఎర్ర‌గా అయ్యే వ‌ర‌కు కాల్చుకుని టిష్యూ పేప‌ర్ ఉంచిన ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే చికెన్ గారెలు త‌యార‌వుతాయి. వీటిని నేరుగా తిన్నా కూడా చాలా రుచిగా ఉంటాయి. చికెన్ ను నేరుగా తిన‌ని పిల్ల‌ల‌కు ఇలా గారెల రూపంలో చికెన్ ను అందించ‌వ‌చ్చు. సాయంత్రం స‌మ‌యంలో స్నాక్స్ గా తిన‌డానికి ఈ గారెలు చ‌క్క‌గా ఉంటాయి. వీటిని ఒక్క‌టి కూడా విడిచిపెట్ట‌కుండా అంద‌రూ ఎంతో ఇష్టంగా తింటారు.
