Dondakaya Fry : దొండ‌కాయ‌లు.. మ‌నం ఆహారంగా తీసుకునే కూర‌గాయ‌ల్లో ఇది ఒక‌టి. దొండ‌కాయ‌ల‌తో ర‌క‌ర‌కాల వంట‌కాలను త‌యారు చేసుకుని తింటూ ఉంటాం. దొండ‌కాయ‌ల‌తో చేసే వంటకాలు రుచిగా ఉండ‌డంతో పాటు వీటిని తీసుకోవ‌డం వ‌ల్ల మ‌న ఆరోగ్యానికి కూడా మేలు క‌లుగుతుంది. దొండ‌కాయ‌ల‌తో మ‌నం త‌ర‌చుగా దొండకాయ వేపుడును త‌యారు చేస్తూ ఉంటాం. దొండకాయ వేపుడు చాలారుచిగా ఉంటుంది. అయితే మ‌నం ఎక్కువ‌గా ఈ వేపుడును ఎండుకారం వేసి త‌యారు చేస్తూ ఉంటాం. కేవ‌లం ఎండుకార‌మే కాకుండా ప‌చ్చి కారం వేసి కూడా మ‌నం ఈ వేపుడును త‌యారు చేయ‌వ‌చ్చు. ప‌చ్చికారం వేసి దొండకాయ వేపుడును ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
దొండకాయ ఫ్రై త‌యారీకి కావల్సిన ప‌దార్థాలు..
చిన్న‌గా త‌రిగిన దొండ‌కాయ‌లు – అర‌కిలో, ప‌చ్చిమిర్చి – 4 లేదా కారానికి త‌గిన‌న్ని, ప‌చ్చి కొబ్బ‌రి ముక్క‌లు – 2 టేబుల్ స్పూన్స్, వెల్లుల్లి రెబ్బ‌లు – 5, నూనె – 2 టేబుల్ స్పూన్స్, జీలకర్ర – ఒక టీ స్పూన్, ఉప్పు – త‌గినంత, ప‌సుపు – అర టీ స్పూన్, క‌రివేపాకు – ఒక రెమ్మ.
దొండకాయ ఫ్రై త‌యారీ విధానం..
ముందుగా జార్ లో ప‌చ్చిమిర్చి, కొబ్బ‌రి ముక్క‌లు, వెల్లుల్లి రెబ్బ‌లు వేసి బ‌ర‌క‌గా మిక్సీ ప‌ట్టుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక జీలకర్ర వేసి వేయించాలి. త‌రువాత దొండకాయ ముక్క‌లు వేసి క‌ల‌పాలి. ఇప్పుడు వీటిపై మూత పెట్టి మ‌ధ్య మ‌ధ్య‌లో క‌లుపుతూ ముక్కలను వేయించాలి. దొండకాయ ముక్క‌లు వేగిన త‌రువాత ఉప్పు, ప‌సుపు వేసి క‌ల‌పాలి. వీటిని మ‌రో రెండు నిమిషాల పాటు వేయించిన త‌రువాత మిక్సీ ప‌ట్టుకున్న మిశ్ర‌మం వేసి క‌ల‌పాలి. ఈ ముక్కలను మ‌రో రెండు నిమిషాల పాటు క‌లుపుతూ వేయించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే దొండకాయ ఫ్రై త‌యార‌వుతుంది.దీనిని నేరుగా అన్నంతో తిన‌వ‌చ్చు లేదా సైడ్ డిష్ గా కూడా తిన‌వ‌చ్చు. దొండ‌కాయ‌ల‌తో త‌ర‌చూ చేసే వంట‌కాల‌తో పాటు. అప్పుడ‌ప్పుడూ ఇలా కూడా త‌యారు చేసుకుని తిన‌వ‌చ్చు.
