Dondakaya Fry : మ‌నం ఆహారంగా తీసుకునే కూర‌గాయ‌ల్లో దొండ‌కాయ ఒక‌టి. ఇత‌ర కూర‌గాయ‌ల వ‌లె దొండ‌కాయ‌లు కూడా మ‌న ఆరోగ్యానికి ఎంతో మేలు చేస్తాయి. వీటితో చేసే వంట‌కాల‌ను తిన‌డం వ‌ల్ల రుచితో పాటు ఆరోగ్యాన్ని కూడా సొంతం చేసుకోవ‌చ్చు. దొండ‌కాయ‌ల‌తో ఎక్కువ‌గా చేసే వంట‌కాల్లో దొండ‌కాయ ఫ్రై కూడా ఒక‌టి. చ‌క్క‌గా వండాలే కానీ దొండ‌కాయ ఫ్రై చాలా రుచిగా ఉంటుంది. ఇంట్లో అంద‌రూ ఇష్టంగా తినేలా రుచిగా ఈ దొండ‌కాయ ఫ్రైను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
దొండ‌కాయ ఫ్రై త‌యారీకి కావ‌ల్సిన ప‌దార్థాలు..
తరిగిన దొండ‌కాయ‌లు – అర‌కిలో, ప‌చ్చికొబ్బ‌రి ముక్క‌లు – 2 టేబుల్ స్పూన్స్, పుట్నాల ప‌ప్పు – ఒక టేబుల్ స్పూన్, కారం – ఒక టేబుల్ స్పూన్, జీల‌క‌ర్ర – ఒక టీ స్పూన్, ఉప్పు – త‌గినంత, ప‌సుపు – అర టీ స్పూన్, నూనె – 2 టేబుల్ స్పూన్స్, క‌చ్చా ప‌చ్చాగా దంచిన వెల్లుల్లి రెబ్బ‌లు – 5.
దొండ‌కాయ ఫ్రై త‌యారీ విధానం..
ముందుగా జార్ లో ప‌చ్చికొబ్బ‌రి ముక్క‌లు, పుట్నాల ప‌ప్పు వేసి బ‌రక‌గా మిక్సీ ప‌ట్టుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక జీల‌క‌ర్ర వేసి వేయించాలి. త‌రువాత దొండ‌కాయ ముక్క‌లు వేసి క‌ల‌పాలి. త‌రువాత వీటిపై మూత పెట్టి మ‌ధ్య మ‌ధ్య‌లో క‌లుపుతూ దొండ‌కాయ ముక్కలను 5 నిమిషాల పాటు మగ్గించాలి. త‌రువాత మూత తీసి దొండ‌కాయ ముక్కలను క‌ర‌క‌ర‌లాడేలా వేయించాలి. దొండ‌కాయ ముక్క‌లు పూర్తిగా వేగిన త‌రువాత ఉప్పు, వెల్లుల్లి రెబ్బ‌లు, ప‌సుపు, కారం వేసి క‌ల‌పాలి. త‌రువాత మిక్సీ ప‌ట్టుకున్న కొబ్బ‌రి మిశ్ర‌మం వేసి రెండు నిమిషాల పాటు వేయించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే దొండ‌కాయ ఫ్రై త‌యార‌వుతుంది. దీనిని అన్నం, చపాతీ, పుల్కా వంటి వాటితో క‌లిపి తింటే చాలా రుచిగా ఉంటుంది. దొండ‌కాయ‌ల‌ను ఇష్ట‌ప‌డని వారు ఈ ఫ్రైకు ఎంతో ఇష్టంగా తింటారు.
