Egg Roast : మ‌న ఆరోగ్యానికి కోడిగుడ్లు ఎంతో మేలు చేస్తాయి. వీటిని తీసుకోవ‌డం వ‌ల్ల మ‌న శ‌రీరానికి కావ‌ల్సిన పోష‌కాలు అందుతాయి. కోడిగుడ్లతో మ‌నం ర‌క‌ర‌కాల వంట‌కాల‌ను త‌యారు చేసి తీసుకుంటూ ఉంటాము. కోడిగుడ్లతో చేసే కూర‌లు రుచిగా ఉండ‌డంతో పాటు వీటిని తీసుకోవ‌డం వ‌ల్ల ఆరోగ్యానికి కూడా ఎంతో మేలు క‌లుగుతుంది. కోడిగుడ్లతో చేసుకోద‌గిన వంట‌కాల్లో ఎగ్ రోస్ట్ కూడా ఒక‌టి. కింద చెప్పిన విధంగా త‌యారు చేసే ఈ ఎగ్ రోస్ట్ చాలా రుచిగా ఉంటుంది. దీనిని అంద‌రూ ఇష్ట‌ప‌డ‌తార‌ని చెప్ప‌వ‌చ్చు. ఇంట్లో కోడిగుడ్లు ఉంటే చాలు చిటికెలో వీటిని త‌యారు చేసుకోవ‌చ్చు. ఎంతో రుచిగా, క‌మ్మ‌గా ఉండే ఈ ఎగ్ రోస్ట్ ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ఎగ్ రోస్ట్ త‌యారీకి కావ‌ల్సిన ప‌దార్థాలు..
చిన్న‌గా త‌రిగిన పెద్ద ఉల్లిపాయ‌లు – 2, నూనె – పావు క‌ప్పు, సోంపు గింజ‌లు – పావు టీ స్పూన్, అల్లం వెల్లుల్లి పేస్ట్ – ఒక టేబుల్ స్పూన్, చిన్న‌గా త‌రిగిన ట‌మాట ముక్క‌లు – ఒక క‌ప్పు, ఉడికించిన కోడిగుడ్లు – 4, ప‌సుపు – పావు టీ స్పూన్, కారం – ఒక టేబుల్ స్పూన్, ఉప్పు – త‌గినంత, నీళ్లు – ఒక క‌ప్పు, త‌రిగిన కొత్తిమీర – కొద్దిగా.
మ‌సాలా పొడి త‌యారీకి కావ‌ల్సిన ప‌దార్థాలు..
మెంతులు – పావు టీ స్పూన్, మిరియాలు – అర టీ స్పూన్, ధ‌నియాలు – ఒక టేబుల్ స్పూన్, దాల్చిన చెక్క – ఒక ఇంచు ముక్క, ల‌వంగాలు – 5, క‌రివేపాకు- ఒక రెమ్మ, యాల‌కులు – 3.
ఎగ్ రోస్ట్ త‌యారీ విధానం..
ముందుగా క‌ళాయిలో మెంతులు వేసి వేయించాలి. త‌రువాత క‌రివేపాకుతో స‌హా మిగిలిన మ‌సాలా దినుసులు వేసి వేయించాలి. త‌రువాత వీటిని జార్ లో వేసి మెత్త‌ని పొడిగా చేసుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక సోంపు గింజ‌లు వేసి వేయించాలి. త‌రువాత ఉల్లిపాయ ముక్క‌లు వేసి ఎర్ర‌గా అయ్యే వ‌ర‌కు వేయించాలి. ఉల్లిపాయ ముక్క‌లు వేగిన త‌రువాత అల్లం వెల్లుల్లి పేస్ట్ వేసి వేయించాలి. దీనిని ఒక నిమిషం పాటు వేయించిన త‌రువాత ట‌మాట ముక్క‌లు వేసి మూత పెట్టి వేయించాలి. వీటిని మ‌ధ్య మ‌ధ్య‌లో క‌లుపుతూ ట‌మాట ముక్క‌లు మెత్త‌గా అయ్యే వ‌ర‌కు వేయించాలి. ట‌మాట ముక్క‌లు వేగిన త‌రువాత ప‌సుపు, కారం, ఉప్పు, సిద్దం చేసుకున్న మ‌సాలా పొడి వేసి వేయించాలి.
త‌రువాత నీళ్లు పోసి క‌లిపి మూత పెట్టి నూనె పైకి తేలే వ‌ర‌కు వేయించాలి. త‌రువాత కోడిగుడ్లను రెండు భాగాలుగా చేసి కూర‌లో వేసుకోవాలి. త‌రువాత‌మూత పెట్టి 2 నిమిషాల పాటు ఉడికించాలి. త‌రువాత గుడ్ల‌ను మ‌రో వైపుకు తిప్పి మ‌రో రెండు నిమిషాల పాటు ఉడికించి కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఎగ్ రోస్ట్ త‌యార‌వుతుంది. దీనిని అన్నం, చ‌పాతీ వంటి వాటితో తింటే చాలా రుచిగా ఉంటుంది. ఈ విధంగా త‌యారు చేసిన ఎగ్ రోస్ట్ ను అంద‌రూ ఎంతో ఇష్టంగా తింటారు.
