Kobbari Boorelu : మ‌నం ప‌చ్చి కొబ్బ‌రితో ర‌క‌ర‌కాల తీపి వంట‌కాల‌ను తయారు చేస్తూ ఉంటాం. ప‌చ్చి కొబ్బరి మ‌న ఆరోగ్యానికి ఎంతో మేలు చేస్తుంది. కొబ్బ‌రితో చేసే తీపి వంట‌కాలు రుచిగా ఉండ‌డంతో పాటు వీటిని తయారు చేయ‌డం కూడా చాలా సుల‌భం. ప‌చ్చి కొబ్బ‌రితో చేసుకోద‌గిన రుచిక‌ర‌మైన వంట‌కాల్లో కొబ్బరి బూరెలు కూడా ఒక‌టి. వీటినే పూర్ణాలు అని కూడా అంటారు. అయితే ఈ బూరెల‌ను తయారు చేయ‌డానికి ఎటువంటి ప‌ప్పును నాన‌బెట్టాల్సిన అవ‌స‌రం లేదు. అలాగే పిండిని రుబ్బాల్సిన ప‌ని కూడా లేదు. చాలా సుల‌భంగా వీటిని మ‌నం తయారు చేసుకోవ‌చ్చు. ఎంతో రుచిగా, క‌మ్మ‌గా ఉండే ఈ కొబ్బరి బూరెల‌ను ఎలా తయారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
కొబ్బరి బూరెల త‌యారీకి త‌యారీకి కావ‌ల్సిన ప‌దార్థాలు..
మిన‌ప‌ప్పు – ఒక క‌ప్పు, పొడి బియ్యం పిండి – 2 క‌ప్పులు, ఉప్పు – త‌గినంత, బెల్లం తురుము – ఒక క‌ప్పు, ప‌చ్చి కొబ్బరి తురుము – 3 క‌ప్పులు, జీడిప‌ప్పు ప‌లుకులు – పిడికెడు, యాల‌కులపొడి – అర టీ స్పూన్, నూనె – డీప్ ఫ్రైకు స‌రిప‌డా.
కొబ్బరి బూరెల త‌యారీ విధానం..
ముందుగా జార్ లో మిన‌ప‌ప్పు వేసి వీలైనంత మెత్త‌గా మిక్సీ ప‌ట్టుకోవాలి. తరువాత ఈ పిండిని జ‌ల్లించి ఒక గిన్నెలోకి తీసుకోవాలి. తరువాత ఇందులో బియ్యం పిండి, ఉప్పు వేసి క‌ల‌పాలి. తరువాత తగినన్ని నీళ్లు పోస్తూ పిండిని క‌లుపుకోవాలి. దీనిపై మూత ఉంచి పిండిని గంట పాటు నాన‌బెట్టుకోవాలి. తరువాత క‌ళాయిలో బెల్లం, కొబ్బరి తురుము వేసి క‌లుపుతూ వేడి చేయాలి. ఇలా 15 నిమిషాల పాటు వేడి చేసిన తరువాత జీడిప‌ప్పు ప‌లుకులున, యాల‌కుల పొడి వేసి క‌ల‌పాలి. దీనిని మ‌రో 5 నిమిషాల పాటు క‌లుపుతూ ఉడికించి స్ట‌వ్ ఆఫ్ చేసుకోవాలి. తరువాత ఇందులో 2 టీ స్పూన్ల బియ్యం పిండి వేసి కలిపి చ‌ల్లార‌నివ్వాలి. కొబ్బరి మిశ్ర‌మం చ‌ల్లారిన తరువాత మ‌న‌కు కావ‌ల్సిన ఆకారంలో ఉండలుగా చేసుకోవాలి.
ఇప్పుడు ముందుగా కలిపి ఉంచిన పిండిలో తగినన్ని నీళ్లు పోసి పిండిని కావ‌ల్సినంత ప‌లుచ‌గా క‌లుపుకోవాలి. తరువాత క‌ళాయిలో నూనె పోసి వేడి చేయాలి. నూనె బాగా వేడ‌య్యాక కొబ్బరి ఉండ‌ల‌ను పిండిలో ముంచి విదిలించి నూనెలో వేసుకోవాలి. ఇలా తగినన్ని వేసుకున్న తరువాత మ‌ధ్య‌స్థ మంట‌పై అటూ ఇటూ క‌లుపుతూ వేయించాలి. వీటిని ఎర్ర‌గా క్రిస్పీగా అయ్యే వ‌ర‌కు వేయించి ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే కొబ్బరి బూరెలు త‌యార‌వుతాయి. వీటిని అంద‌రూ ఎంతో ఇష్టంగా తింటారు. ఈ బూరెలు 3 నుండి 4 రోజుల పాటు నిల్వ కూడా ఉంటాయి. తీపి తినాల‌నిపించిన‌ప్పుడు, పండుగ‌ల‌కు ఇలా కొబ్బరి బూరెల‌ను తయారు చేసుకుని తిన‌వ‌చ్చు.
