Mutton Fry Recipe : మ‌ట‌న్ తో చేసుకోద‌గిన రుచిక‌ర‌మైన వంట‌కాల్లో మ‌ట‌న్ ఫ్రై కూడా ఒక‌టి. మ‌ట‌న్ ఫ్రై చాలా రుచిగా ఉంటుంది. చాలా మంది దీనిని ఇష్టంగా తింటారు. సైడ్ డిష్ గా తిన‌డానికి, స్నాక్స్ గా తీసుకోవ‌డానికి ఇది చాలా చ‌క్క‌గా ఉంటుంది. మ‌ట‌న్ ఫ్రైను వివిధ రుచుల్లో త‌యారు చేస్తూ ఉంటారు. కింద చెప్పిన విధంగా త‌యారు చేసే మ‌ట‌న్ ఫ్రై కూడా చాలా రుచిగా ఉంటుంది. ఒక్కసారి ఈ మ‌ట‌న్ ఫ్రైను రుచి చూస్తే మ‌ళ్లీ మ‌ళ్లీ ఇదే కావాలంటారు. ఈ మ‌ట‌న్ ఫ్రైను త‌యారు చేయడం చాలా తేలిక. లొట్ట‌లేసుకుంటూ తినాల‌నిపించేంత రుచిగా ఉండే ఈ మ‌ట‌న్ ఫ్రైను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
మ‌ట‌న్ ఫ్రై త‌యారీకి కావ‌ల్సిన ప‌దార్థాలు..
నూనె – 3 టేబుల్ స్పూన్స్, నెయ్యి – ఒక టేబుల్ స్పూన్, జీడిప‌ప్పు – 2 టేబుల్ స్పూన్స్, వెల్లుల్లి త‌రుగు – ఒక టేబుల్ స్పూన్, చిన్న‌గా త‌రిగిన ఉల్లిపాయ ముక్క‌లు- ఒక క‌ప్పు, త‌రిగిన పుదీనా – 2 టేబుల్ స్పూన్స్, పెరుగు – 2 టేబుల్ స్పూన్స్, త‌రిగిన ప‌చ్చిమిర్చి – 3, క‌రివేపాకు – ఒక రెమ్మ, ఉప్పు – త‌గినంత, మిరియాల పొడి – అర టీ స్పూన్, ధ‌నియాల పొడి – ఒక టీ స్పూన్, జీల‌క‌ర్ర పొడి – అర టీ స్పూన్, మ‌ట‌న్ మ‌సాలా – ఒక టీ స్పూన్, క‌సూరిమెంతి – ఒక టీ స్పూన్, త‌రిగిన కొత్తిమీర – కొద్దిగా.
మ‌ట‌న్ ఉడికించ‌డానికి కావ‌ల్సిన ప‌దార్థాలు..
నూనె – ఒక టేబుల్ స్పూన్, అల్లం వెల్లుల్లి పేస్ట్ – ఒక టేబుల్ స్పూన్, మ‌ట‌న్ – అర‌కిలో, ప‌సుపు – అర టీ స్పూన్, ఉప్పు – ఒక టీ స్పూన్, కారం – 2 టీ స్పూన్స్, నీళ్లు – ఒక క‌ప్పు.
మ‌ట‌న్ ఫ్రై త‌యారీ విధానం..
ముందుగా కుక్క‌ర్ లో నూనె వేసి వేడి చేయాలి. నూనె వేడ‌య్యాక అల్లం వెల్లుల్లి పేస్ట్ వేసి వేయించాలి. త‌రువాత మ‌ట‌న్ వేసి కలపాలి. త‌రువాత ప‌సుపు, ఉప్పు, కారం వేసి కలపాలి. దీనిని 4 నిమిషాల పాటు వేయించిన త‌రువాత నీళ్లు పోసి కలపాలి. త‌రువాత మూత పెట్టి 5 నుండి 6 విజిల్స్ వ‌చ్చే వ‌ర‌కు లేదా మ‌ట‌న్ మెత్త‌గా అయ్యే వ‌ర‌కు ఉడికించి స్ట‌వ్ ఆఫ్ చేసుకోవాలి. త‌రువాత అడుగు మందంగా ఉండే క‌ళాయిలో నూనె, నెయ్యి వేసి వేడి చేయాలి. త‌రువాత జీడిప‌ప్పు వేసి వేయించి ప్లేట్ లోకి తీసుకోవాలి. త‌రువాత అదే నూనెలో వెల్లుల్లి త‌రుగు వేసి వేయించాలి. త‌రువాత ఉల్లిపాయ ముక్క‌లు, పుదీనా వేసి వేయించాలి. ఉల్లిపాయ ముక్క‌లు వేగిన త‌రువాత మ‌ట‌న్ ను నీటితో స‌హా వేసుకోవాలి.
దీనిని నీరంతా పోయే వ‌ర‌కు పెద్ద మంట‌పై వేయించిన త‌రువాత పెరుగు వేసి కలపాలి. మ‌ట‌న్ చ‌క్క‌గా వేగి నూనె పైకి తేలిన త‌రువాత ప‌చ్చిమిర్చి, క‌రివేపాకు వేసి వేయించాలి. రెండు నిమిషాల పాటు వేయించిన త‌రువాత మిరియాల పొడి, ధ‌నియాల పొడి, జీల‌క‌ర్ర పొడి, మ‌ట‌న్ మ‌సాలా వేసి కలపాలి. దీనిని ఒక నిమిషం పాటు వేయించిన త‌రువాత క‌సూరిమెంతి, కొత్తిమీర వేసి కలపాలి. దీనిని మ‌రో నిమిషం పాటు వేయించి స్ట‌వ్ ఆఫ్ చేసుకోవాలి. ఇలా చేయడం వ‌ల్ల ఎంతో రుచిగా ఉండే మ‌ట‌న్ ఫ్రై త‌యార‌వుతుంది. ఈ విధంగా త‌యారు చేసిన మ‌ట‌న్ ఫ్రైను ఒక్క ముక్క కూడా విడిచిపెట్ట‌కుండా అంద‌రూ ఎంతో ఇష్టంగా తింటారు.
