Nune Vankaya Kura : వంకాయ‌ల‌తో ర‌క‌ర‌కాల వంట‌కాల‌ను త‌యారు చేసుకుని తింటూ ఉంటాం. వంకాయ‌ల‌తో చేసే వంట‌కాలు చాలా రుచిగా ఉంటాయి. చాలా మంది వంకాయ‌ల‌ను ఇష్టంగా తింటారు. వంకాయ‌ల‌తో చేసే వంట‌కాల‌ను తిన‌డం వ‌ల్ల రుచితో పాటు ఆరోగ్యాన్ని కూడా సొంతం చేసుకోవ‌చ్చు. ఈ వంకాయ‌ల‌తో రుచిగా, సుల‌భంగా చేసుకోద‌గిన వంట‌కాల్లో నూనె వంకాయ కూర కూడా ఒక‌టి. ఈ కూర తిన్నా కొద్ది తినాల‌నిపించేంత రుచిగా ఉంటుంది. వంట‌రాని వారు, మొద‌టి సారి చేసే వారు ఎవ‌రైనా ఈ కూర‌ను సుల‌భంగా త‌యారు చేసుకోవ‌చ్చు. వంకాయ‌ల‌తో ఎంతో రుచిగా ఉండే నూనె వంకాయ కూర‌ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
నూనె వంకాయ కూర త‌యారీకి కావ‌ల్సిన ప‌దార్థాలు..
గుత్తి వంకాయలు – అర‌కిలో, ప‌సుపు – పావు టీ స్పూన్, ఉప్పు – త‌గినంత, గ‌రం మ‌సాలా – ఒక టీ స్పూన్, నీళ్లు – ఒక గ్లాస్, త‌రిగిన కొత్తిమీర – కొద్దిగా, క‌రివేపాకు – ఒక రెమ్మ.
మ‌సాలా పేస్ట్ త‌యారీకి కావ‌ల్సిన ప‌దార్థాలు..
నూనె – 3 టేబుల్ స్పూన్స్, ప‌ల్లీలు – 2 టేబుల్ స్పూన్స్, జీల‌క‌ర్ర – ఒక టీ స్పూన్, శ‌న‌గ‌ప‌ప్పు – ఒక టేబుల్ స్పూన్, దాల్చిన చెక్క – ఒక ఇంచు ముక్క, ల‌వంగాలు – 3, యాల‌కులు – 3, ధ‌నియాలు – ఒక టేబుల్ స్పూన్, మెంతులు – పావు టీ స్పూన్, వెల్లుల్లి రెబ్బ‌లు – 5, ప‌చ్చిమిర్చి – 2, అల్లం – ఒక ఇంచు ముక్క, త‌రిగిన ఉల్లిపాయ – 1, ఎండుమిర్చి – 5, నువ్వులు – ఒక టేబుల్ స్పూన్, క‌రివేపాకు – ఒక రెమ్మ, చింత‌పండు – రెండు రెమ్మ‌లు, నీళ్లు – అర గ్లాస్.
నూనె వంకాయ కూర త‌యారీ విధానం..
ముందుగా ఒక క‌ళాయిలో నూనె వేసి వేడి చేయాలి. నూనె వేడ‌య్యాక చింత‌పండు, నీళ్లు త‌ప్ప మిగిలిన మ‌సాలా ప‌దార్థాల‌న్నీ వేసి దోర‌గా వేయించాలి. మ‌సాలా దినుసుల‌న్నీ చ‌క్క‌గా వేగిన త‌రువాత వీటిని ఒక జ‌ల్లిగంటెలోకి తీసుకుని నూనె వేర‌య్యేలా వ‌డ‌క‌ట్టుకోవాలి. ఇలా వ‌డ‌క‌ట్టుకున్న నూనెతోనే మ‌నం కూర‌ను త‌యారు చేసుకోవాలి. త‌రువాత ఈ దినుసుల‌ను ఒక జార్ లోకి తీసుకుని అందులో చింత‌పండు వేసి మిక్సీ ప‌ట్టుకోవాలి. త‌రువాత నీళ్లు పోసి మెత్త‌గా మిక్సీ ప‌ట్టుకుని ప‌క్క‌కు ఉంచాలి. త‌రువాత వ‌డ‌క‌ట్టుకున్న నూనెను క‌ళాయిలోకి తీసుకుని వేడి చేయాలి. నూనె వేడ‌య్యాక వంకాయ‌ల‌ను నాలుగు ముక్క‌లుగా క‌ట్ చేసుకుని నూనెలో వేసుకోవాలి. వీటిని పూర్తిగా వేయించిన త‌రువాత ఒక ప్లేట్ లోకి తీసుకోవాలి. త‌రువాత అదే నూనెలో మిక్సీ ప‌ట్టుకున్న మ‌సాలా పేస్ట్, ఉప్పు, గ‌రం మ‌సాలా వేసి క‌ల‌పాలి.
దీనిని నూనె పైకి తేలే వ‌ర‌కు ఉడికించిన త‌రువాత వంకాయలు, నీళ్లు వేసి క‌ల‌పాలి. దీపిపై మూత పెట్టి మ‌ధ్య మ‌ధ్యలో క‌లుపుతూ 15 నిమిషాల పాటు ఉడికించాలి. త‌రువాత కొత్తిమీర, క‌రివేపాకు వేసి క‌లిపి మ‌రో రెండు నిమిషాల పాటు ఉడికించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే నూనె వంకాయ కూర త‌యార‌వుతుంది. దీనిని అన్నం, బ‌గారా అన్నం, పులావ్, బిర్యానీ వంటి వాటితో క‌లిపి తింటే చాలా రుచిగా ఉంటుంది. ఒక్క వంకాయ‌ను కూడా విడిచి పెట్ట‌కుండా అంద‌రూ ఈ కూర‌ను ఇష్టంగా తింటారు. మ‌సాలా దినుసులు వేయించిన నూనెతో కూర చేయ‌డం వ‌ల్ల ఈ కూర చాలా రుచిగా ఉంటుంది.
