Pesarapappu Charu : మనం పెసరపప్పుతో వివిధ ర‌కాల వంట‌కాల‌ను తయారు చేస్తూ ఉంటాము. పెసరపప్పుతో చేసే వంట‌కాల‌ను తీసుకోవ‌డం వ‌ల్ల మనం రుచితో పాటు ఆరోగ్యాన్ని కూడా పొంద‌వ‌చ్చు. పెసరపప్పుతో చేసుకోద‌గిన వంట‌కాల్లో పెస‌ర‌ప‌ప్పు చారు కూడా ఒక‌టి. పెస‌ర‌ప‌ప్పు చారు చాలా రుచిగా ఉంటుంది. వేడి వేడిగా అన్నంతో ఈ చారును తీసుకుంటే చాలా రుచిగా ఉంటుంది. అలాగే పెసరపప్పుతో చేసిన చారును తీసుకోవ‌డం వ‌ల్ల శరీరానికి చ‌లువ చేస్తుంది. పెసరపప్పుతో చారును తయారు చేసుకోవ‌డం చాలా సుల‌భం. త‌క్కువ స‌మ‌యంలో చాలా సుల‌భంగా ఈ చారును తయారు చేసుకోవ‌చ్చు. రుచితో పాటు ఆరోగ్యానికి మేలు చేసే ఈ పెస‌ర‌ప‌ప్పు చారును ఎలా తయారు చేసుకోవాలో ఇప్పుడు తెలుసుకుందాం.
పెస‌ర‌ప‌ప్పు చారు తయారీకి కావ‌ల్సిన ప‌దార్థాలు..
పెస‌ర‌ప‌ప్పు – ఒక క‌ప్పు, నీళ్లు – రెండున్న‌ర క‌ప్పులు, క‌రివేపాకు – ఒక రెమ్మ, నూనె – 2 టీ స్పూన్స్, ప‌సుపు – పావు టీ స్పూన్, త‌రిగిన ప‌చ్చిమిర్చి – 8, స‌న్న‌గా త‌రిగిన ఉల్లిపాయ – 1, స‌న్న‌గా త‌రిగిన టమాటాలు – 3, చింత‌పండు ర‌సం – పావు క‌ప్పు లేదా త‌గినంత, ఉప్పు – త‌గినంత, త‌రిగిన కొత్తిమీర – కొద్దిగా.
తాళింపుకు కావ‌ల్సిన ప‌దార్థాలు..
నూనె – ఒక టేబుల్ స్పూన్, దంచిన వెల్లుల్లి రెబ్బ‌లు – 4, ఆవాలు – అర టీ స్పూన్, జీల‌క‌ర్ర – అర టీ స్పూన్, ఎండుమిర్చి – 3, ఇంగువ – పావు టీ స్పూన్, క‌రివేపాకు – ఒక రెమ్మ.
పెస‌ర‌ప‌ప్పు చారు తయారీ విధానం..
ముందుగా కుక్క‌ర్ లో ప‌ప్పును తీసుకోవాలి. త‌రువాత దీనిని శుభ్రంగా క‌డగాలి. త‌రువాత ఇందులో నీళ్లు, క‌రివేపాకు, ప‌సుపు, నూనె వేసి మూత పెట్టి 2 నుండి 3 విజిల్స్ వ‌చ్చే వ‌ర‌కు ఉడికించాలి. త‌రువాత మూత తీసి ఇందులో ఉల్లిపాయ ముక్క‌లు, ట‌మాట ముక్క‌లు, చింత‌పండు ర‌సం, ఉప్పు, ప‌చ్చిమిర్చి, మ‌రో రెండు లేదా మూడు క‌ప్పుల నీళ్లు పోసి క‌ల‌పాలి. త‌రువాత ఈ చారును స్ట‌వ్ మీద ఉంచి ట‌మాట ముక్క‌లు మెత్త‌గా అయ్యే వ‌ర‌కు మ‌రిగించి స్ట‌వ్ ఆఫ్ చేసుకోవాలి. త‌రువాత తాళింపుకు క‌ళాయిలో నూనె పోసి వేడి చేయాలి. నూనె వేడ‌య్యాక తాళింపు ప‌దార్థాలు వేసి వేయించాలి. తాళింపు చ‌క్క‌గా వేగిన త‌రువాత దీనిని చారులో వేసుకోవాలి. చివ‌ర‌గా కొత్తిమీర కూడా వేసి క‌లిపి స‌ర్వ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే పెస‌ర‌ప‌ప్పు చారు త‌యార‌వుతుంది. దీనిని అన్నంతో తింటే చాలా రుచిగా ఉంటుంది. ఈ విధంగా తయారు చేసిన పెస‌ర‌ప‌ప్పు చారును అంద‌రూ ఎంతో ఇష్టంగా తింటారు.
