Rashmika Mandanna : సినిమా ఇండ‌స్ట్రీలో సినిమాలు హిట్ కావాలంటే చాలా క‌ష్టంతో కూడుకున్న ప‌ని. ఎంతో శ్ర‌మ ప‌డితేనే గానీ విజ‌యం ల‌భించ‌దు. క‌థ, పాట‌లు, మాట‌లు.. అన్నీ బాగుంటేనే సినిమా న‌డుస్తుంది. హిట్ టాక్‌ను సొంతం చేసుకుంటుంది. అందులో న‌టించిన వారికి, దాని కోసం ప‌నిచేసిన వారికి పేరు వ‌స్తుంది. అయితే హీరోలు లేదా హీరోయిన్లు న‌టించే సినిమాలు వ‌రుస హిట్ అవుతుంటే మాత్రం.. వారికి ఫుల్ డిమాండ్ ఏర్ప‌డుతుంది. దీంతో వారు తమ రెమ్యున‌రేష‌న్‌ను అమాంతం పెంచేస్తారు. అది స‌హ‌జంగానే జ‌రుగుతూనే ఉంటుంది. ఇక పుష్ప బ్యూటీ ర‌ష్మిక మంద‌న్న కూడా ప్ర‌స్తుతం అలాగే చేస్తున్న‌ద‌ట. త‌న రెమ్యున‌రేష‌న్‌ను భారీగా పెంచింద‌ని టాక్ వినిపిస్తోంది.
పుష్ప సినిమాతోపాటు ర‌ష్మిక మంద‌న్న ఈ మ‌ధ్య కాలంలో న‌టించిన అనేక సినిమాలు హిట్ అయ్యాయి. దీంతో అమ్మ‌డు స‌హ‌జంగానే త‌న రెమ్యున‌రేష‌న్‌ను పెంచింది. రూ.3 కోట్ల‌కు పైగానే ఈమె ప్ర‌స్తుతం ఒక్క సినిమాకు డిమాండ్ చేస్తోంద‌ట. గీతా ఆర్ట్స్ వారు ఓ సినిమా కోసం ఈమెను సంప్ర‌దిస్తే.. ఈమె ఆ సినిమాకు జీఎస్‌టీతో క‌లిపి ఏకంగా రూ.3 కోట్లు అడిగింద‌ట. దీంతో వారు అంత వ‌ద్దులే అని ఇంకో హీరోయిన్ కోసం వెదుకుతున్న‌ట్లు తెలిసింది.
ఇక త్వ‌ర‌లో షూటింగ్ ప్రారంభం కానున్న పుష్ప 2 సినిమాకు కూడా ర‌ష్మిక మంద‌న్న ఏకంగా రూ.3 కోట్ల రెమ్యున‌రేష‌న్‌ను అడిగింద‌ట. దీంతో వారు ఆమెకు అడిగిన మొత్తాన్ని ఇచ్చేందుకు సిద్ధ‌మ‌వుతున్నార‌ట. ఇలా దీపం ఉండ‌గానే ఇల్లు చ‌క్క‌బెట్టుకోవాల‌న్న సామెత‌ను ఈమె క‌చ్చితంగా ఫాలో అవుతున్న‌ట్లు తెలుస్తోంది. ఇక ఈమె శ‌ర్వానంద్‌తో క‌లిసి ఆడ‌వాళ్లు మీకు జోహార్లు అనే సినిమాలోనూ న‌టించింది. ఈ మూవీ త్వ‌ర‌లోనే విడుద‌ల కానుంది.
