Soya Pulao : మ‌నం మీల్ మేక‌ర్ ల‌తో ర‌క‌ర‌కాల వంట‌కాల‌ను త‌యారు చేసుకుని తింటూ ఉంటాం. మీల్ మేక‌ర్ ల‌తో చేసే వంట‌కాలు చాలా రుచిగా ఉంటాయి. అలాగే వీటిని తీసుకోవ‌డం వ‌ల్ల మ‌న ఆరోగ్యానికి ఎంతో మేలు క‌లుగుతుంది. మీల్ మేక‌ర్ ల‌తో కేవ‌లం కూర‌లు, చిరుతిళ్లే కాకుండా మ‌నం ఎంతో రుచిగా ఉండే పులావ్ ను కూడా త‌యారు చేసుకోవ‌చ్చు. మీల్ మేక‌ర్ పులావ్ చాలా రుచిగా ఉంటుంది. దీనిని ఎవ‌రైనా చాలా తేలిక‌గా త‌యారు చేసుకోవ‌చ్చు. రుచిగా, తేలిక‌గా మీల్ మేక‌ర్ పులావ్ ను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
మీల్ మేక‌ర్ పులావ్ త‌యారీకి కావ‌ల్సిన ప‌దార్థాలు..
మీల్ మేక‌ర్ – ఒక క‌ప్పు, అర గంట పాటు నాన‌బెట్టిన బాస్మ‌తీ బియ్యం – 2 క‌ప్పులు, నెయ్యి – ఒక టేబుల్ స్పూన్, నూనె – 2 టేబుల్ స్పూన్స్, బిర్యానీ ఆకులు – 2, దాల్చిన చెక్క – ఒక ఇంచు ముక్క, ల‌వంగాలు – 5, యాల‌కులు – 4, సాజీరా – అర టీ స్పూన్, అనాస పువ్వు – 1, పొడుగ్గా త‌రిగిన ఉల్లిపాయ‌లు – అర క‌ప్పు, త‌రిగిన ప‌చ్చిమిర్చి – 4, అల్లం వెల్లుల్లి పేస్ట్ – ఒక టేబుల్ స్పూన్, త‌రిగిన బంగాళాదుంప – 1, త‌రిగిన క్యారెట్ – 1, త‌రిగిన ట‌మాట – 1, ప‌సుపు – పావు టీ స్పూన్, కారం – 2 టీ స్పూన్స్, ధ‌నియాల పొడి – ఒక టీ స్పూన్, ఉప్పు – త‌గినంత, గ‌రం మ‌సాలా – ఒక టీ స్పూన్, చిలికిన పెరుగు – అర క‌ప్పు, త‌రిగిన కొత్తిమీర – కొద్దిగా, త‌రిగిన పుదీనా- కొద్దిగా, నీళ్లు – మూడుంపావు క‌ప్పులు.
మీల్ మేక‌ర్ పులావ్ త‌యారీ విధానం..
ముందుగా మీల్ మేక‌ర్ ల‌లో వేడి నీటిని పోసి 10 నిమిషాల పాటు నాన‌బెట్టాలి. త‌రువాత వీటిని చేత్తో పిండి ఒక గిన్నెలోకి తీసుకుని ప‌క్కకు ఉంచాలి. త‌రువాత క‌ళాయిలో నూనె, నెయ్యి వేసి వేడి చేయాలి. నూనె వేడ‌య్యాక మ‌సాలా దినుసులు వేసి వేయించాలి. త‌రువాత ఉల్లిపాయ, ప‌చ్చిమిర్చివేసి వేయించాలి. త‌రువాత అల్లం వెల్లుల్లి పేస్ట్ వేసి ప‌చ్చి వాస‌న పోయే వ‌ర‌కు వేయించాలి. త‌రువాత మీల్ మేక‌ర్, బంగాళాదుంప ముక్క‌లు, క్యారెట్, ట‌మాట వేసి క‌ల‌పాలి. వీటిని 5 నిమిషాల పాటు వేయించిన త‌రువాత కారం, ఉప్పు, ప‌సుపు, ధ‌నియాల పొడి, గ‌రం మ‌సాలా, పెరుగు వేసి క‌ల‌పాలి. త‌రువాత వీటిపై మూత పెట్టి మ‌రో 5 నిమిషాల పాటు ఉడికించాలి. త‌రువాత కొత్తిమీర, పుదీనా వేసి క‌ల‌పాలి. ఇప్పుడు బియ్యం వేసి నెమ్మ‌దిగా క‌ల‌పాలి.
త‌రువాత నీళ్లు పోసి క‌లిపి మూత పెట్టి మ‌ధ్య‌స్థ మంట‌పై 6 నిమిషాల పాటు ఉడికించాలి. ఇలా ఉడికించ‌డం వ‌ల్ల నీరు ద‌గ్గ‌ర ప‌డుతుంది. దీనిని మ‌రోసారి క‌లిపి పైన కొత్తిమీర‌ను చ‌ల్లుకుని మూత పెట్టి చిన్న మంట‌పై మ‌రో 6 నిమిషాల పాటు ఉడికించి స్ట‌వ్ ఆఫ్ చేసుకోవాలి. త‌రువాత మూత తీయ‌కుండా మ‌రో 10 నిమిషాల పాటు అలాగే ఉంచి ఆ త‌రువాత స‌ర్వ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే మీల్ మేక‌ర్ పులావ్ త‌యార‌వుతుంది. దీనిని రైతా లేదా మ‌సాలా కూర‌ల‌తో క‌లిపి తింటే చాలా రుచిగా ఉంటుంది. మీల్ మేక‌ర్ ల‌తో త‌ర‌చూ చేసే వంట‌కాల‌తో పాటు అప్పుడ‌ప్పుడూ ఇలా కూడా త‌యారు చేసుకుని తిన‌వ‌చ్చు. దీనిని ఇంట్లో అంద‌రూ ఎంతో ఇష్టంగా తింటారు.
