Tomato Paneer Pulao : మ‌నం పనీర్ తో వివిధ ర‌కాల రైస్ వెరైటీస్ ను కూడా త‌యారు చేస్తూ ఉంటాము. పనీర్ తో చేసుకోద‌గిన రుచిక‌ర‌మైన రైస్ వెరైటీల‌ల్లో ట‌మాట పనీర్ పులావ్ కూడా ఒక‌టి. పనీర్, ట‌మాట క‌లిపి చేసే ఈ పులావ్ చాలా రుచిగా ఉంటుంది. లంచ్ బాక్స్ లోకి కూడా ఈ పులావ్ చాలా చ‌క్క‌గా ఉంటుంది. చాలా సుల‌భంగా ఎవ‌రైనా ఈ పులావ్ ను త‌యారు చేసుకోవ‌చ్చు. వెరైటీగా తినాల‌నిపించిన‌ప్పుడు అప్ప‌టిక‌ప్పుడు ఈ పులావ్ ను త‌యారు చేసి తీసుకోవ‌చ్చు. ఎంతో రుచిగా ఉండే ఈట‌మాట పనీర్ పులావ్ ను ఎలా త‌యారు చేసుకోవాలో ఇప్పుడు తెలుసుకుందాం.
ట‌మాట పనీర్ పులావ్ త‌యారీకి కావ‌ల్సిన ప‌దార్థాలు..
నెయ్యి – ఒక టీ స్పూన్, నూనె – ఒక టేబుల్ స్పూన్, యాల‌కులు – 2, ల‌వంగాలు – 3, దాల్చిన చెక్క – ఒక ఇంచు ముక్క, సాజీరా – ఒక టీ స్పూన్, బిర్యానీ ఆకు – 1, తరిగిన ప‌చ్చిమిర్చి – 3, తరిగిన ఉల్లిపాయ – 1, తరిగిన క్యాప్సికం – 1, అల్లం వెల్లుల్లి పేస్ట్ – ఒక టీ స్పూన్, ట‌మాటాలు – పెద్ద‌వి రెండు, ఉప్పు – త‌గినంత, ప‌సుపు – పావు టీ స్పూన్, కారం – ఒక టీ స్పూన్, ఉడికించిన ప‌చ్చిబ‌ఠాణీ – 2 టేబుల్ స్పూన్స్, జీల‌క‌ర్ర పొడి – అర టీ స్పూన్, పనీర్ – 200 గ్రా., ఉడికించిన బాస్మ‌తీ అన్నం – ఒకటిన్న‌ర గ్లాస్ బియ్యంతో వండినంత , గ‌రం మ‌సాలా – ఒక టీ స్పూన్, తరిగిన కొత్తిమీర – కొద్దిగా, తరిగిన పుదీనా – కొద్దిగా.
ట‌మాట పనీర్ పులావ్ త‌యారీ విధానం..
ముందుగా క‌ళాయిలో నెయ్యి, నూనె వేసి వేడి చేయాలి. త‌రువాత మ‌సాలా దినుసులు వేసి వేయించాలి. త‌రువాత ప‌చ్చిమిర్చి, ఉల్లిపాయ, క్యాప్సికం వేసి వేయించాలి. త‌రువాత అల్లం వెల్లుల్లి పేస్ట్ వేసి ప‌చ్చి వాస‌న పోయే వరకు వేయించాలి. త‌రువాత ట‌మాటాల‌ను ఫ్యూరీలాగా చేసి వేసుకోవాలి. త‌రువాత దీనిపై మూత పెట్టి నూనె పైకి తేలే వరకు వేయించాలి. త‌రువాత ఉప్పు, ప‌సుపు, కారం, బ‌ఠాణీ, జీల‌క‌ర్ర పొడి వేసి క‌ల‌పాలి. త‌రువాత పనీర్ వేసి క‌ల‌పాలి. దీనిని రెండు నిమిషాల పాటు వేయించిన త‌రువాత అన్నం, కొత్తిమీర, పుదీనా, మ‌రో టీ స్పూన్ నెయ్యి వేసి క‌ల‌పాలి. దీనిని అంతా క‌లిసేలా క‌లుపుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ట‌మాట పనీర్ పులావ్ త‌యార‌వుతుంది. దీనిని రైతాతో తింటే చాలా రుచిగా ఉంటుంది. ఈ పులావ్ ను అంద‌రూ ఎంతో ఇష్టంగా తింటారు.
