Tomato Perugu Pachadi : మ‌నం పెరుగును కూడా ఆహారంగా తీసుకుంటూ ఉంటాం. పెరుగు మ‌న ఆరోగ్యానికి ఎంతో మేలు చేస్తుంది. దీనిని అన్నంతో తిన‌డంతో పాటు వివిధ ర‌కాల వంట‌కాల్లో కూడా ఉప‌యోగిస్తూ ఉంటాం. అలాగే పెరుగుతో మ‌నం వివిధ ర‌కాల పెరుగు ప‌చ్చ‌ళ్ల‌ను కూడా తయారు చేస్తూ ఉంటాం. పెరుగుతో చేసుకోద‌గిన వివిధ ర‌కాల పెరుగు ప‌చ్చ‌ళ్ల‌ల్లో ట‌మాట పెరుగు ప‌చ్చ‌డి కూడా ఒక‌టి. ట‌మాట పెరుగు ప‌చ్చ‌డి చాలా రుచిగా ఉంటుంది. ఈ ట‌మాట పెరుగు పచ్చడిని చాలా సులభంగా తయారు చేసుకోవ‌చ్చు. పెరుగుతో ట‌మాట పెరుగు పచ్చడిని ఎలా తయారు చేసుకోవాలో ఇప్పుడు తెలుసుకుందాం.
పెరుగు ప‌చ్చ‌డి త‌యారీకి కావ‌ల్సిన ప‌దార్థాలు..
నూనె – ఒక టేబుల్ స్పూన్, శ‌న‌గ‌ప‌ప్పు – ఒక టీ స్పూన్, మిన‌ప‌ప్పు – ఒక టీ స్పూన్, ఆవాలు – అర టీ స్పూన్, జీల‌క‌ర్ర – అర టీ స్పూన్, క‌రివేపాకు – ఒక రెమ్మ, ఎండుమిర్చి – 2, చిన్న‌గా తరిగిన ప‌చ్చిమిర్చి – 3, చిన్న‌గా తరిగిన ఉల్లిపాయ – 1, ప‌సుపు – అర టీ స్పూన్, ఉప్పు – త‌గినంత, చిన్న‌గా తరిగిన ట‌మాటాలు – 3 ( మ‌ధ్య‌స్థంగా ఉన్న‌వి), పెరుగు – ఒకటింపావు క‌ప్పు.
ట‌మాట పెరుగుప‌చ్చ‌డి తయారీ విధానం..
ముందుగా ఒక క‌ళాయిలో నూనె వేసి వేడి చేయాలి. నూనె వేడ‌య్యాక శ‌న‌గ‌ప‌ప్పు, మిన‌ప‌ప్పు, ఆవాలు, జీల‌క‌ర్ర వేసి వేయించాలి. త‌రువాత క‌రివేపాకు, ఎండుమిర్చి, ప‌చ్చిమిర్చి, ఉల్లిపాయ, ప‌సుపు, ఉప్పు వేసి క‌ల‌పాలి. ఉల్లిపాయ‌ల‌ను ప‌చ్చి వాస‌న పోయే వ‌ర‌కు వేయించిన త‌రువాత ట‌మాట ముక్క‌లు వేసి క‌ల‌పాలి. త‌రువాత వీటిపై మూత పెట్టి ట‌మాట ముక్క‌ల‌ను మెత్త‌గా అయ్యే వ‌ర‌కు వేయించాలి. ట‌మాట ముక్క‌లు మెత్త‌గా ఉడికిన త‌రువాత స్ట‌వ్ ఆఫ్ చేసి పూర్తిగా చ‌ల్లార‌నివ్వాలి. త‌రువాత పెరుగు వేసి క‌ల‌పాలి. ఇలా చేయ‌డం వ‌ల్ల ఎంతో రుచిగా ఉండే ట‌మాట పెరుగు ప‌చ్చ‌డి త‌యార‌వుతుంది. ఈ పచ్చడిని అన్నం, చ‌పాతీ వంటి వాటితో తింటే చాలా రుచిగా ఉంటుంది. పెరుగుతో త‌ర‌చూ చేసే పెరుగు ప‌చ్చ‌డితో పాటు అప్పుడ‌ప్పుడూ ఇలా కూడా తయారు చేసుకుని తిన‌వ‌చ్చు. ఈ పెరుగుప‌చ్చ‌డిని తిన‌డం వ‌ల్ల మ‌నం రుచితో పాటు చ‌క్క‌టి ఆరోగ్యాన్ని కూడా సొంతం చేసుకోవ‌చ్చు. ఈ పెరుగు పచ్చడిని అంద‌రూ ఎంతో ఇష్టంగా తింటారు.
